Ilagiit atuakkamik atuaqqissaaqatigiittarnerannik aaqqissuussaq
Imm. 3: Oqaluussinermut qitiusoq
1 Ilagiit atuakkamik atuaqqissaaqatigiittarfigisaanni aammattaaq oqaluussiartulernermi katersuuttoqartarpoq. Oqaluussisartut amerlanerit naleqqutsitaanni oqaluussiartulernermi katersuunnerit piffissalertariaqarput, oqaluussinerullu aaqqissuunneqarneranut atatillugu pisariaqartutigut ikiuuttoqartariaqarluni.
2 Atuaqqissaarneq oqaluussinerlu eqqarsaatigalugit ataatsimooqatigiit assigiinngitsut aaqqissuulluagaagaangamik anersaakkut nakussatsissinnaanerusarput. Tamatta kajumissisinneqarnissarput pisariaqartipparput, aamma oqaluussinitsinni qanoq ililluta akerliliissutit akisinnaanerivut, qanoq ililluta oqaloqatigiinneq aallartissinnaaneripput, qanoq ililluta Bibelimik atuaqqissaaqatigiinnissamik neqeroorfiginnissinnaanerluta imaluunniit pulaaqqiinermi qanoq oqaaseqarsinnaanerluta siunnersorneqarnissarput pisariaqartipparput. Ilagiit atuakkamik atuaqqissaaqatigiittarfianni oqaluussiartulerluni katersuunnermi tamakku pineqarsinnaapput. — Gal. 6:9, 10.
3 Atuaqqissaaqatigiinnermik aqutsisup suliassaa: Ilagiit atuakkamik atuaqqissaaqatigiinneranni aqutsisoq siulersuisarpoq ataatsimooqatigiillu oqaluussinissaannik aaqqissuusinissaq akisussaaffigalugu. Oqaluussisartut akuttunngitsumik oqaluussiartoqatigisarpai. (1 Pîtr. 5:2, 3) Katersuunnerit piareersagaalluartut unnersuussutinik Bibelimeersunik atoriaannaasunillu saqqummiussiffiusut oqaluussisartunut pissarsiffiusarput. Pitsaanerussaaq atuakkamik atuaqqissaaqatigiittartut tamarmik immikkut oqaluussiartulernermi katersuuttarpata, pisariaqarpalli ataatsimooqatigiit ikinnerusut marluk immaqa katersuuteqatigiissinnaassapput. Immikkut ittumik pisoqartillugu ataatsimooqatigiit tamarmik ataatsimut katersuukkaangata atuaqqissaaqatigiinnermi aqutsisartut tamarmik immikkut aquttakkatik isumagisariaqarpaat.
4 Katersuuttarnerit piffissami sumiiffimmilu aalajangersimasumi ingerlanneqartarpata, oqaluussisartut kajumissaarneqarput aalajangersimasumik akuttunngitsumik oqaluussiartoqataasarnissaannik, tamanna naapertorlugu pilersaarusiorsinnaapput, nalussanngilaallu tamatigut oqaluussiartorfissaqarlunilu oqaluussiartoqatissaqartoq. (Naleqqiuguk Lúkarse 10:1.) Atuaqqissaarnermillu aqutsisartoq najuutinngitsuussagaluaruni oqaluussiartorfissaqarnissaa ataatsimooqatigiillu katersuuttarnissaannik pilersaarusiornissani isumagisariaqarpaa. Qatanngummillu angummik pisinnaassusilimmik katersuunnermik aqutsisinnaasumik peqanngippat atuaqqissaarnermik aqutsisartoq qatanngummik arnamik toqqaasinnaavoq. Allanngortitsigallarnerit ajornanngippat sapaatip akunneranik sioqqullugit nalunaarutigineqartariaqarput.
5 Suleqatigiinneq pisariaqarpoq: Tamatta oqaluussinermut siunertaqarluartumik peqataanissarput ilungersuutigisariaqarparput. Oqaluussisartut piareersaqatigiinnissamik aaqissuussinissaminnik namminneerlutik iliuuseqarsinnaapput, oqariaatsit periaatsillu oqaluussinerminni atorsinnaasatik piviusorpalaartut sungiusarlugit. — Uss. 27:17.
6 Oqaluussisartumit misilittagaqarluartumit ajoqersuganngortitsinissamut pikkorinnerulernissannut ikiorterusussinnaavit? Taava atuakkamik atuaqqissaaqatigiinnermi aqutsisorsi oqaloqatiginiaruk. Taava immaqa oqaluussisartumik pisinnaalluartumik suleqatissarsissussinnaassavaatit. Tamannali iluaqutigissagukku ilinnut siunnersuutigineqartut atortariaqarpatit, isumaqatigiissutitillu eqqortittarlugit.
7 Atuakkamik atuaqqissaaqatigiinnermik aqutsisup toqqagai ikiuiumatuusariaqarput piumaffiginnippallaartuunatillu. Misilittakkat ersersissimavaat oqaluussinermut isumalluartumik oqimaaqatigiissumillu isumaqarfiginnittut atoriaannaasunillu iliuuseqartartut inunnik allanik ikiuillaqqinnerusartut. Siuariaateqartut tamatigut nersualaartariaqarput, taamalu pisoqareeraangat piviusorsiortumik ataatsimut anguniagalertoqarsinnaavoq. — Naleqqiuguk Lúkarse 19:17-19.
8 Oqaluussinermi angusaqarnissatsinnut ajoqersuganngortitsinissatsinnullu ikioqatigiinnissarput kissaatigaarput. Silarsuarmi pissutsit ajorsiartuinnarnerata ersersippaa suliaq tamanna nukinginnartuusoq. Inuit inuunerannut tunngavoq, katersuinerlu Jehovap siuarsapallappaa. (Jes. 60:22) Taamaattumik ilagiinni atuakkamik atuaqqissaaqatigisartakkavut qanimut suleqatigisigik immitsinnut kajumissaaqatigiiutigaluta suliarput naammassisinnaaqqullugu. — 2 Tim. 4:1, 2, 5. (kmD 9/91 Menighedsbogstudieordningen — 3. del)