Tusagassamik nuannersumik saqqummiussineq — Inuk inuit inuusimasut pingaarnerpaartaat atorlugu
1 Ukiut ingerlanerini naqitikkatta tamarmik arlaatigut Jesus Kristusip inuunera kiffartuussineralu eqqartortarsimavaat. Tamanna pissusissamisoorluinnarpoq, ’allamik annaffissaqanngimmat, atermimmi allamik annassutissatsinnik qilaap ataani inunni tunniussaasoqanngilaq’. (Ap. sul. 4:12) Atuagaq nutaaq tamanna immikkut ittuuvoq tassaagami atuagaatitsinni Jesusip inuuneranut tunngasuinnarnik imalik siulleq.
2 Allanut neqeroorutigiuk: Atuakkami soqutiginartut suut innersuussutigisinnaavavut? Kapitali 5-imi apeqquteqarpoq ukiup taamaalineranut naleqquttumik, „Jesusip inunngornera — sumi qangalu?“ Meeqqat inuusuttullu immaqa soqutiginnilersissinnaavatit kapitali 44-mi oqaluttuaq pissanganartoq „Anorip naalappaa“ atorlugu. Timikkut nappaatillit peqqiitsullu qularnanngivissumik kapitali 57, „Naalliuttunik naakkinninneq“, qiimmatsaatigissavaat. Kapitali 90-ip, „Makinnissamik neriuut“-ip, asasamik toquneranik aliasuuteqarsimasut tamaasa killissavai. Silarsuarmi pissutsit aarlerinartut oqaloqatigiissutigigutsigik kapitali 111, „Ullunut kingullernut nalunaaqqutit“, innersuussutigisinnaavavut.
3 Illumiit illumut oqaluussininni oqarsinnaavutit: „Inuiaat oqaluttuarisaaneranni tamatigut allat inuunerannut sunniuteqangaartunik inoqartarsimavoq. Taamaattumillu soqutiginartumik aperisinnaavugut: Kina inuit inuusimasut pingaarnerpaartaraat, sunalu pillugu inuk ’pingaartumik’ taaneqarsinnaava? Illit qanoq isumaqarpit? [Pulaarfigisat eqqarsarnissaanut akinissaanullu piffissaqartiguk. Akissuteqarpat akissutaa oqaaseqarfigisinnaavat.] Taavalu nangillutit oqarsinnaavutit: „Oqaluttuarisaanermik ilisimatuup tusaamasaasup apeqqut tamanna misissorsimavaa; ima oqarsimavoq: [Taava atuakkap siulequtaani immikkoortoq 2 atuaruk.] Taassuma Jesus Kristus tikkuarpaa. Illit tamanna tupigusuutigaajuk, imaluunniit isumaqatigaajuk? [Pulaakkat oqaaseqartiguk.] Naak nunami kristumiuunerarfiusumi inuugaluarluta, Jesusilu maannakkorpiaq eqqartorneraluaqisoq, taanna inuttut ilisimasaqarfigilluarnerparput? Ajoqersuinera sumut tunngava? Qanoq inooriaaseqarsimava allallu qanoq iliorfigisarsimavai? [Pulaakkat oqaaseqartiguk.] Tamatumunnga atatillugu Bibelimi allassimaffik takutikkusuppara. [1 Pîtruse 2:21 atuaruk.] Tassani kajumissaarneqarpugut malinniaqqissaaqqullugu. Amerlasuut qularnanngitsumik oqarumassapput: Sooq taamaaliussaagut? Taamaaliorutta qanoq kinguneqassava? Iluaqutaassava? Atuakkami matumani, Inuk inuit inuusimasut pingaarnerpaartaat,-ni takutinneqarpoq Jesus qanoq ittuusimasoq, sunalu pillugu uagut taassuminnga ilisarisimanninneq malinninnerlu iluaqutigissagivut.“ Oqaloqatigiilluarussi kapitalit ilaat siuliini eqqartorneqartut innersuussutigisinnaavatit. Taavalu oqaloqatit nassuiaaguk qanoq ililluni atuakkamik pisinnaasoq.
4 Qularnanngitsumik atuakkamik perusuttut atuarusuttullu amerlasuut naapissavatit. Atuakkamik pisut tamaasa pulaaqqinniakkit. Ilaatigut immaqa atuagaq atorlugu atuaqqissaaqateqalersinnaavutit. Ingammik ilaquttariinni aamma meeqqanik inuusuttunillu atuaqqissaaqatiginninnermi pitsaassaaq. Allanut atuagaq Inuk inuit inuusimasut pingaarnerpaartaat neqeroorutigisarutsigu, inuunissamut naassaanngitsumut aqqummik nanisinissaannut ikiorsinnaavavut. (km 91/12 Fremholdelse af den gode nyhed)