Inuk inuit inuusimasut pingaarnerpaartaat
1 Atuakkamik nutaamik Inuk inuit inuusimasut pingaarnerpaartaat-mik tunineqaratta, qulequtaata qularnanngitsumik aalapernaasilersippaatigut. Inuk pingaarnerpaasutut tikkuarneqarpat ima paasisariaqarpoq taassuma inuit milliardillit nunami inuusimasut tamaasa akimorai. „Pingaartoq“ ilaatigut ima nassuiarneqarsinnaavoq: „akitsisitaasoq, pitsaasumik pissuseqartoq“. Inuk taamaakkuni asseqanngilluinnarsimassaaq!
2 Jesus Kristus, Guutip ernera, ilumut taama nersortariaqarpoq. Nunami naammassisimasai pisuussutsimut, sapiitsuliornernut silamiorpaluttunut naalakkersuinikkulluunniit pissaanermut atuumassuteqanngivipput. Pilimanngitsumik tunuliaqutaqarpoq inuunermilu annerpaartaani malunnarniartuunani inuusimalluni. 30-nilli ukioqarluni Palæstinami sumi tamaani inunnit maluginiarneqalerpoq oqaatsini iliuutsinilu pissutigalugit. Inunnit misigineqarsimanngisaannartunik periaaseqarluni Jehovap kinaassusia siunertaalu saqqummersippai. Oqaluussineq inuup allap ataatsip angusimanngisaannagaa suliaraa, maluginiarnartunik tupinnartuliortarluni silarsuassamilu nutaami innuttaasussat tunngavilerlugit.
3 Atuakkamik tamatuminnga pisariaqartitsineq: Paulusip kajumissaarpaatigut Jesus maligassatut tumisiugassatullu isigeqqullugu. (Epr. 12:2) 1985-imiit 1991-ip tungaanut Peqatigiiffiup Vagttårnet-imi ilanngutassiat 149-t kinguleriiaat Jesusip inuuneranut kiffartuussineranullu tunngasut ilannguttarsimavai. Ilanngutassiat tamakku ikiortigalugit Jesusip oqaasii uagullu pilluta iliuusii maluginiarnerulersimavavut. Tamakkunani erseqqissarneqarpoq taassuma maligassiaa maleruartariaqaripput. Ilanngutassiat tamakku tamarmik maanna ataatsimut eqikkarneqarlutik atuaganngortinneqarsimapput. Tassaavoq atortussaq pitsaasoq inuit allat Jesusimut isigiuarnissaannut taassumunngalu, Jehovap ’siulersuisunit naalakkersuisunillu pissaasunillu naalagaasunillu tamanit annerussaartunngortitaanut’, innuttanngornissaannut ikiornissaannut. — Evf. 1:21.
4 Atuakkap imai assiliartaalu: Atuagaq neqeroorutigigaangakku kapitaliisa 133-t ilaat, Jesusip inuuneranut, kinaassusianut, ajoqersuineranut suliaanullu tunngasut, ersersinnerusinnaavatit. Kapitali 24-mi nassuiarneqarpoq sooq nunamut pisimasoq. Kapitali 35-mi Qaqqami oqaluusaa tusaamasaasoq sammineqarpoq. Kapitali 43-mi ersersinneqarpoq Jesusip assersuusiat atorlugit ajoqersueriaasia malugisariaqartoq. Kapitali 133-mi allaatigineqarput Jesusip suliassani naammassippagu pilluaqqussutissat inuiaat nuannaarutigisinnaasaat. Kapitalit tamarmik naggataanni apeqqutit oqaloqatigiinnerup nanginnissaanut iluaqutigisinnaavavut; allassimaffiit issuakkat takutippaat sumi Bibelimi oqaluttuaq nassaarineqarsinnaasoq. Assilissat kusanartut ilaat Jesusip kinaassusianik nakuusumik, allanik misiginneqataangaarneranik oqaluussinermilu qasusuitsumik ilungersorneranik ersersitsisut takutissinnaavatit. — Malugikkit kapitalit 26, 44, 95, 117 123-lu.
5 Decemberimi atuagaq nutaaq tamanna neqeroorutigissavarput. Imaasa assiliartaasalu angorniorluta inunnut allanut neqeroorutiginissaanut pissutissilluarpaatigut. Kinaluunniit naassaanngitsumik inoorusuttoq Jesus Kristusimik ilisimasaqartariaqarpoq. (Juánase 17:3) Atuakkap siaruarternissaa ilungersuutigigutsigu inuppassuit inuk inuit inuusimasut pingaarnerpaartaat ilisarilersinnaassavaat. (km 91/12 Det største menneske . . .)