Inuk pingaarnerpaaq maleqqullugu allanik kajumissaarigit
1 Matîuse 5:14 napertorlugu Jesus ajoqersukkaminut oqarsimavoq: ʹSilarsuup qaamasoraasi.ʹ Jesusip ajoqersugaasa inunnut tamanut Jehovap naalagaaffia taassuma asannissusia Jesus Kristusikkullu pilliutaa oqaluussissutigisussaavaat. Suliassaq tamanna eqqarsaatigalugu decembarimi atuagaq Inuk inuit inuusimasut pingaarnerpaartaat neqeroorutigissavarput. Siunnersuutit immaqa atorsinnaasatit aajuku.
2 Imminut ilisaritereeruvit illit nammineq oqaatsitit atorlugit ima oqarsinnaavutit:
◼ “Inuppassuit eqqarsaatigisarpaat Jesus nunamiikkallarami qanoq ittuusimanersoq. Allani sutigut immikkooruteqarnersoq illit qanoq ilimagaajuk? [Pulaakkat akili.] Uani atuakkami, Inuk inuit inuusimasut pingaarnerpaartaani, eqqartorneqarpoq inuusimanerani kiffartorneranilu pingaartut, atuartorlu paasisaqalersittarlugu inuttut qanoq ittuusimaneranik. Amerlasoorpassuit atuagaq atuareeraagamikku misigisarput inuttut namminneq ilagisimallugu, naallioqatigisimallugu qanimullu kiffartornera qimerloorsimallugu.“ Atuakkap assiliartaa siulleq, atuakkap taaguutaanik oqaasertalik, takuteriaruk. Siulequtaanut ingerlaqqeriaruit atuarlugulu qulequttap ataani immikkoortup aappaa „Taanna pillugu ilinniarneq iluaqutigiuk“. Pulaakkat soqutiginnippasippat atuagaq neqeroorutigiuk.
3 Imaluunniit imatut oqarsinnaavutit:
◼ „Ulluni makkunani arlallit Jesus eqqarsaatigisarpaat. Kisianni silarsuarmi ajortorpassuit eqqarsaatigilerlugit ilaasa eqqarsaatigilersarpaat ilumut Jesusip soqutigineraativut. Illit qanoq isumaqarpit?“ Pulaakkat akili. Taava ʹJesusilersaarummiʹ kapitali 24 takutiguk naatsumillu eqqartulaarlugu suna pillugu Jesus nunamukarsimasoq. Atuaruk Juánase 15:13, Jesusip inunnut asanningaarnerata allaatigineqarnera. Eqqaamajuk atuagassiat nutaat, atuagassiaaqqat imaluunnit quppersagaaqqap naleqquttup neqeroorutiginissaat, atuagaq pulaakkavit perusunngippagu.
4 Siunnersuutit allat:
◼ „Inuusuttut amerlanerit nuannaartorisassaminnik ujaasisarput malinniagassaminnik, kisianni maligassaalluartunik nassaaruminaappoq. Eqqarsaatigisimaviuk Jesus Kristus naammalluinnartumik tamanut maligassiuisimammat? [Akissummut tusarnaarluaqqissaarit. Kingornatigut Pîtrusip agdlagai siullît 2:21 atuaruk allassimaffillu pulaakkannut eqqartorlugu.] Inuunera tamarmi Ataataminut qilammiusumut pallorfiginninnermut sammivoq. Qanoq isumaqarpit silarsuaq qanoq ittuussanersoq amerlanerit Jesus assiginiarsarisuuppassuk?“ Pulaakkat akili. Atuakkap quppernerisa kingulliup immikkoortup tullianut qupperit, tassani allattorsimapput pissusii immikkut ittut. Nassuiaruk ʹJesusilersaartipʹ qanoq tamatta kristumiutut ajunnginnerusumik inuulertissinnaagaatigut.
5 Imaluunnit saqqummiussineq una atorsinnaavat:
◼ „Jesus eqqartorneqaraagat naalungiarsuttut inuttulluunnit naalliuuteqarpasissutut toqulersutut takorloortarpiuk? [Pulaakkat akili.] Jesus pillugu amerlanerit taamaallaat inunngornera toqusimaneralu killigalugu paasisimasaqarput. Inuugallarami oqaaserisimasarpassui iliuuserisimasaalu qaqutigoortut tusarneqarpiartanngillat. Suliarisimasaa inunnut inuusunut nunami maani inuusimasunullu tamanut sunniuteqarsimapput. Taamaattumik pingaaruteqarpoq tanna pillugu sapinngisamik annertuumik ilisimasaqalernissarput. Maluginiariaruk uani Juánase 17:3-mi tamanna erseqqissarneqartoq.“ Taava atuaruk ʹJesusilersaartipʹ siulequtaata quppernerani siullermi immikkoortut sisamaat. Pulaakkat nassuiaaguk atuakkap qanoq nammineerluni atuaqqissaarneqarsinnaaneranik.
6 Allattueqqissaarit sumi soqutiginnittunik ersersitsisoqarsimaneranik atuakkamillu pisimasut allattorlugit, taamaalilluni soqutiginninneq pulaaqqiininni uterfigeqqinniassagakku. Piffissaagallartillugu, asannilluta peqqusersuitsut ujarniartigit ikiorlugillu ajoqersuganngortillugit annaassisitsinnut, Jesus Kristusimut. — Mat. 16:24. (kmD 94/12 Indbyd andre til at følge største menneske)