Soqutiginninneq ineriartortinniarlugu iliuuseqapallattarit
1 „Ullumi iliuuserisinnaasatit aqagumut kinguarteqinagit.“ Taama oqartoqartarpoq, suliassat pisariaqartut utaqqisinnagit suliaripallannissaat kajumissaarutiginiarlugu. Kinguliani eqqartorneqartukkut erserpoq tamanna oqaluussinitsinni atorluarsinnaagipput.
2 Qatanngutip arnap angut atuakkamik tunisiffigisimavaa neriorsorlugulu aggeqqikkumaarluni. Nalunaaquttap akunnera ataaseq qaangiuttoq qatanngut arnaq alla kukkulluni angummut taassumunnga kasuttorpoq. Angutip atuagaq tigumiarlugu matu ammarpaa oqarlunilu: „Aggeqqikkumallutit oqaravit ilimaginngikkaluarpara taama aggiaartiginissat, ajunngilaq isiinnarit, atuaqqissaarnissamut piareersimavunga.“
3 Naak taama aggiaartigineq ajoraluartugut tamatuma ersersippaa soqutiginninneq ineriartortinniarlugu iliuuseqapallattarnissaq eqqaamassallugu pingaartorujussuusoq. Martsimi atuagaq Åbenbaringen — Det store klimaks er nær! neqeroorutigissavarput. Atuagaq taanna, Kristumiut Allagaataat Griikerisuut atuagartaannik kingullermik nassuiaasoq, aviisitut aamma radiokkut tv-kkullu nutaarsiassatut soqutiginartinneqartigaaq, silarsuarmi pisunik inuit tamarluinnarmik inuunerannik attuisunik paasissutissiimmat.
4 Inuit ikiorneqarnerunissartik pisariaqartippaat: Inuit paasillugulu akuersaassappassuk ’Åbenbaringensbogimi’ paasissutissat inuunerminnut siunissaminnullu attuumassuteqartuusut, pisariaqarpoq pulaaqqissallugit. Paulus allassimavoq: ’Uanga ikkussuivunga, Apollos imerterivoq, Guutilu naajartortitsivoq.’ (1 Kor. 3:6) Tassa Jehova ’naajartortitsisuuvoq’, Paulusili Apollosilu taassumunnga suleqataapput. ’Ikkussuinissaq imerterinissarlu’ taakku akisussaaffigaat. Uaguttaaq Guutimut suleqataavugut, taamaattumik naammanngilaq ’ikkussuiinnassagutta’. Soqutiginnittup naapitatta soqutiginninnerata ineriartortinniarnissaa inuttut akisussaaffigaarput, taamaattumillu pulaaqqittariaqarparput, sapinngisamik pulaaqqaarnitsinnit ullualunnguit qaangiunneranni. Qanoq taamaaliorsinnaavugut?
5 Pulaaqqinnissamut periarfissiorit: Piffissamik aalajangersimasumik isumaqatigiissusiornissaq ajornaatsuinnaaneq ajorpoq, immaqalu pulaakkatta isumaqatigiissuterput puiortarpaat. Taamaakkaluartorli misiliisarit. Ullualunnguit ingerlaneranni aggeqqinnissannik isumaqatiginnigit, piffissaq pulaarfissat ersarissumik allaguk, piffissarlu eqqorlugu aggerit. Tamatumuuna pulaakkavit takusinnaassavaa isumaqatigiissutersi ilumoorukkit. Aggeqqinninni pulaakkat angerlarsimanngikkaluarpat, naapinnissaata tungaanut misilittaruk. Immaqa qasusuissutsit pulaakkavit sallusuissummik misissuinissaminut kajumississutigissavaa.
6 Siullermik pulaakkatta soqutiginninnera qanoq annertutiginersoq ilisimaqqissaarsinnaannginnatsigu, allattuiffitsinnut aggeqqinnissarput allattariaqarparput, immannguaannarluunniit soqutiginnippasikkaluarpat. Soqutiginninneq ineriartortinniarlugu iliuuseqapallanneq kinguneqarluartarpoq. Imaassinnaavoq pulaakkavit ’Åbenbaringsbogimut’ soqutiginninnera annerulersissimagit, aggeqqinnerillu tupaallaatigisannik nuannaajaallaatigigaa. Taamaattumik soqutiginninneq ineriartortinniarlugu iliuuseqapallattarit! (km 92/3 Følg hurtigt interessen op)