Pulaaqqiinissat eqqaamajuk!
1 Tusagassamik nuannersumik oqaluussisartutut ajoqersuganngortitsiortoqquneqarpugut. (Mat. 28:19, 20) Taamaaliorniarnitta ilaa tunngaviunerusoq tassaavoq pulaaqqiisarneq. Nalunngilarput annaassiniarnermik sulinerusoq taamaattumillu tamaviaarluta soqutiginninnermik ersersitsisut isumaginiartassavavut. Illit taamaaliortarpit?
2 Atuagassianik tigusisut tamaasa pulaaqqittariaqakkattut isigisariaqarpatit. Taamaattorli allanittaaq pissutissaqarsinnaavugut pulaaqqiinissatsinnut, tassami inuppassuit atuagaativut atuagassiaativullu tigujumanngikkaluarlugit tusagassaq Bibelimeersoq oqaloqatigiissutigerusuttarpaat. Soqutiginnittut naammattoorutsigik tamatigut pulaaqqittariaqarpavut soqutiginninneq sakkortunerulersinniarlugu.
3 Atuagassianik tunisimasatit pulaaqqittakkit: Atuakkat atuagassiallu agguaanneqarsimasut pulaaqqiisimanernit amerlaneroqimmata, pulaaqqiisarnermi siumukarnissatsinnut periarfissaqarluarpugut. Pioneri ilaanni atuakkamik tunisivoq isumaqarlunili pulaarfigisani soqutiginnippasippallaanngitsoq. Ualit ilaanni pulaarfissani allat tamaasa naammassigamigit, taanna pulaaqqissallugu aalajangerpoq — Bibelimillu atuaqqissaaqatigisalerlugu.
4 Qatanngutip angutip angut atuagassianik marlunnik tunivaa allamilli iliuuseqarnani angut soqutiginninngissorigamiuk. Ullorpaaluit tamatuma kingorna angutip ilagiit najukkaminiittut allaffigai kuisinnissaminik qinnuteqarluni. Ilaannikkut pulaaqqaarnermi naqitigaaraannarmik immaqa tunisisinnaasarpugut. Naqitigaaqqalli pulaaqqiinerni sunniuteqarluarsinnaapput takutinniaraangatsigu qanoq ililluta Bibelimik atuaqqissaaqatigiissinnaasugut. Nakkutilliisup angalasartup qatanngut arnaq ilagalugu oqaluussilluni arnaq naqitigaaqqamik tunivaa. Pulaarneq sivikikkaluarpoq, nakkutilliisulli qatanngut arnaq pulaaqqiinissaanut kajumissaarpaa. Taanna taamaaliorpoq, ingerlaannarlu Bibelimik atuaqqissaaqatigisalerlugu.
5 Pulaarfigisaq soqutiginnippasikkaangat: Naak pulaarfigisaq pulaaqqaarnermi atuagassiamik tigusinngikkaluartoq, isumaqartariaqanngilaq soqutiginninngitsoq. Specialpioneriusup malugaa arnaq atuagassianik tigusiumaneq ajortoq soqutiginnikkiartulersoq. Pionerip atuagassiat ilillugit atuagassiaaraq saqqummermagu, arnaq immikkoortut ilaannik oqaloqatigiissuteqarnissamut piumassuseqalerpoq. Arlalialunnik pulaarfigineqareerami Bibelimik atuaqqissaaqatigineqartarusulerpoq sapaatip-akunneranut marloriarluni.
6 Oqaluussisartut ilaat oqaluttuarput ilaannikkut ima oqarfigineqartarlutik: ’Atuakkamik/atuagassiamik/atuagassiaaqqamik tunineqareernikuuvunga, tunisisorlu pulaaqqissalluni neriorsuigaluarpoq, pulaaqqinngilaangali!’ Taamaattariaqanngikkaluarpoq. Jehovamut tunniulluinnarsimasut tamarmik ajoqersuganngortitsiniarnermut peqataanissaminnut akisussaassutsimik misigisariaqarput. Akuttunngitsumik soqutiginnippasittut tamaasa pulaaqqittarukkit, illit ’tusartitillu’ pilluaqquneqangaarumaarpusi. — 1 Tim. 4:16. (km 92/2 Husk at komme igen)