Utertitsissummik pingaartitsinerit ersersittaruk
1 Kulturini tamani ikinngut eqqarlerluunniit toqusimasoq pingaartinniarneqartarpoq. Ingammik inuk inoqamminik annaassiniartilluni toqusimasoq pingaartinniarneqartarpoq. Inuunissamik naassaanngitsumik neriugisallit tamarmik utertitsissummik pingaartitsinissaminnut pissutissaqarluarput aprilip ulluisa 6-anni Kristusip toqusimaneranik eqqaaniaalluni nalliuttorsiorneq najuuffigalugu. — 2 Kor. 5:14; 1 Juán. 2:2.
2 Jehovap asanninnera pingaartiguk: Jehova Guutimut qujamasungaartariaqarpugut, taassumami utertitsissut pilersissimavaa! (1 Juán. 4:9, 10) Jehovap asanninnera takuneqarsinnaavoq utertitsisoq tunniussimammagu, inngilit milionilippassuit naapertuilluartut ilaannaajunngitsoq, kisianni ernituani asangaakkani. (Uss. 8:22, 30) Erneq taanna, Jesus Kristus, Jehovamik ilisarisimanninnerpaajusoq, oqarsimavoq ’Guutip silamiut ima asatigigai ernitui tunniullugu kinaluunniit taassumunnga uppertoq tammaqqunagu, naassaanngitsumilli inuussuteqaqqullugu’. — Juán. 3:16.
3 Jesus Kristusip asanninnera pingaartiguk: Aamma Jesus Kristus pingaartingaartariaqarparput, taassuma tarnini amerlasuut utertinneqaatissaannik tunniussimammagu. (Mat. 20:28) Taassuma asanninera erserpoq utertitsissummut atatillugu Jehovap piumasaanut naalannissaminut piumassuseqaneratigut. Eqqarsaatigeriakkit uagut utertinniarluta suut qimattariaqarsimasai — Ataatamini inngilinilu naapertuilluartuni salliutitaalluni inuuneq. Inuit ajortiliusut akornanni inuunissani naalatsigitinnissanilu imaluunniit utertitsissutitut toqutaanissani ersilissutiginngilai. Akerlianik ’kiffap taattua atisimavaa inuillu assigilerlugit . . . imminik nikanarsarpoq naalaannarluni toqumut allaat, massami nappakkami naalliutsitaaffimmi toqumut allaat’. — Fil. 2:5-8, (NV).
4 Qanoq ililluta utertitsissummik pingaartitsinerput ersersissinnaavarput?: Oqaatsitiguinnaq utertitsissummik pingaartitsinerput takutissanngilarput. Guutip Jesus Kristus aqqutigalugu aaqqissuussaa annassutissaq pillugu ilinniartariaqarpugut. (Juán. 17:3) Taava utertitsissummut uppernerput ersersittariaqarparput. (ap. sul. 3:19) Uppernerup Jehova Guutimut tunniulluinnarnissatsinnut kuisinnissatsinnullu kajumissisittariaqarpaatigut. (Mat. 16:24) Tunniulluinnarnitsinnut malitsigitillugu periarfissat tamaasa atorlugit allat utertitsissut iluaqutigalugu annaanneqarsinnaanissaannik oqaluttuuttariaqarpavut. — Rûm. 10:10.
5 Kikkut tamarmik piumasarisanik tamakkuninnga naammassinninnissaminnut periarfissaqarput. Mika 6:8-mi ima allassimasoqarpoq: „Illit inuk, . . . nalunngereeepat suut [Jehovap] ilinnit piumasarigai: Iluartumik iliussasutit, ilumoortumik asannissasutit, makitajuillutillu Guuti peqatigalugu inuussasutit.“ Davidip Jehova ima oqarfigisimavaa: „Suut tamarmik ilinnit pipput, makkuttaaq tunniussavut ilinnit pisarisimavavut.“ 1 Israelikkut 29:14.
6 Jehovap uagut pilluta iliuuserisimasaanik pingaartitsinerput itinerulersinniarlugu ilaqutariittut atuakkami Inuk inuit inuusimasut pingaarnerpaartaat-mi kapitalit 112-116 eqqaaniaalluni nalliuttorsiorneq sioqqullugu atuarsinnaavavut. Taamaalilluta isumakkut piareersarsinnaavugut 1993-imi aprilip ulluisa 6-anni eqqaaniaalluni nalliuttorsiornermi utertitsissummik pingaartitsinissatsinnut. (kmD 2/93 Vis værdsættelse . . .)