Siuariartortumik pulaaqqiisarnikkut anersaakkut ineriartortitsigit
1 Soqutiginninnermik ersersitsisimasut ikiorniarlugit pingaaruteqarpoq aalajangersimasumik pulaaqqittarnerisigut anersaakkut inuussutissanik tuniorartuarnissaat. (1 Kor. 3:6-9) Siuariartortumilli pulaaqqiisinnaajumagutta pulaagassarput eqqarsaatigalugu piareersartarnissarput pingaaruteqarpoq.
2 Pingaaruteqarpoq pulaaqqiinermi kingullermik oqallisigisimasaq nangeqqissallugu. Naak nassuiaatereersimagaluarlugu atuagaq pisimasaa apeqqutinut oqallisigisimasatsinnut akissutissartaqartoq, imaassinnaavoq paasilluarsimanngikkaa imaluunniit akissut atuarsimanngikkaa. Pulaaqqaarnerani ilanngutassiami qulaaniittumi immikkoortumi 2-mi siunnersuutigineqartoq atorsimagukku immaqa siunnersuut manna atorsinnaavat:
Inussiarnersumik ilassinnereeruit oqarsinnaavutit:
◼ „Kingullermik oqaloqatigiikkatta sooq utoqqalisarlutalu toqusarnerput eqqartorparput. Oqaloqatigiinnerput eqqarsaatigisimavara, allassimaffillu pissutaasumik naatsumik nassuiaasoq nanisimavara. [Rûmamiunut agdlagkat 5:12 atuaruk.] Eqqarsaat tamanna qanoq isumaqarfigaajuk? [Pulaakkat oqaaseqartiguk.] Naluara malugisimanerit, atuakkami uannit pisanni versi tamanna soqutiginartumik oqaaseqarfigineqarpoq. [Aperiuk atuagaatini aasinnaaneraa. Imaluunniit illit pinni qupperneq 74 quppersinnaavat. Immikkoortoq 15 atuaruk oqaloqatigiissutigisiullu.] Apeqqulli pissusissamisoortoq saqqummerpoq: Toqugutta qanoq pisoqassava? Akissut kapitalimi tulliuttumiippoq, immaqa tulliani aggeqqikkuma tamanna oqaloqatigiissutigisinnaavarput?“
3 Pulaaqqaarninni ilanngutassiami qulaaniittumi immikkoortoq 3 atorsimagukku immaqa siunnersuut una atorsinnaavat:
Ilisaritereeruit ima oqarsinnaavutit:
◼ „Kingullermik oqaloqatigiissutigaarput toqu pillugu isumarput ullumikkut inuunitsinnik ilusileeqataasartorujussuusoq. Oqaloqatigiinnerput assut eqqarsaatigisimavara, allassimaffimmillu assut ilinnut takutikkusutannik nassaarsimavunga. [sarĸúmersitat 21:3, 4 qupperuk atuarlugulu.] Imaassinnavoq isumaqartutit upperissallugu ingasappallaartoq. Uangali eqqarsartaasera malillugu eqqarsalaassaguit taava allassimaffik manna eqquuppat nunarsuarmi pissutsit qanoq issagaluarpat? [Pulaakkat tusarnaaqqissaaruk.] Atuakkami kingullermik pisanni allassimaffik taanna innersuussutigineqarpoq. Tassa quppernermi 162-mi. Malugiuk titartaasup allassimaffik tamanna eqquuppat nunarsuarmi pissutsit qanoq titartarsimagai. [Quppernermi 156-58-imi aamma 161-62-imi assiliartat takutikkit.] Ilaa pissutsinuku taamaattut tamatta maqaasigivut? [Pulaakkat akili.] Ilumoorluinnarputit. Taava apeqqutaalerpoq tamanna takorluuinerinnaanersoq. Kapitali tullissaanut atuarsinnaassugukku oqallisigisinnaavarput piviusorsiortuunersoq imaluunniit naamik. [Aggeqqinnissannik isumaqatigiissuteqarfigiuk.]“
4 Atuagassianik pisimasut pulaaqqikkaangatsigik: Ilanngutassiaq aalajangersimasoq pulaakkavit soqutigisaa saqqummiussimagukku tassani allanik erseqqissaassuteqarsinnaavutit, allassimaffik pingaarnerpaatitaasoq tamatumunngalu nassuiaat innersuussutigalugit. Pulaakkat suli soqutiginnippasippat atuagassiat naleqassusiat erseqqissarsinnaavat. Atuagassiat normui saqqummersussat tulliuttut oqaluuserisassinnut attuumassuteqartunik imaqarpata innersuussutigisinnaavatit.
5 Siuariartortumik pulaaqqiisarnitsigut soqutiginninnermik malittarinnikkutta Jehovamut tullitsinnullu asanninnerput ersersissavarput. (Juán. 13:34, 35) Aalajangersimasumik siuariartortumillu pulaaqqiisarnitsigut oqaluussiffigisartakkatsinni inuit anersaakkut ineriartornissaannik ikiortigik. (kmD 94/2 Stimuler den åndelige vækst . . .)
Atuakkamik atuaqqissaarnermik aqutsisunut Qulaani siunnersuutigineqartut sapaatip-akunnerani 14.-21. februaarimi katersuunnerni sammineqassapput.