Patajanak neriuutinnik tamanut nassuerutiginnittarnerit aalajangiusimajuk
1 Napasuliaq Alapernaarsuiffik-mik atuaqqissaarneq ullumikkut Guutip innuttaanut anersaakkut ’inuussutissanik piffissaq eqqorlugu’ pilersuiffiuvoq pingaarneq. (Mat. 24:45, NV) Ataatsimiinnermut tamatumunnga najuunnissaq marlunnik pingaartunik siunertaqarpoq — anersaakkut ineriartortinneqarnissaq neriuummillu tamanut nassuerutiginninnissaq. — Epr. 10:23-25.
2 Iluaqutigaarput: Missiliuunneqarpoq ilagiit amerlanersaanni aggornerit pingajuisa kisimik atuaqqissaaqatigiissutissaq atuareersimasaraat. Tamatuma amerlaqatingajai akeqataasarput. Anersaakkut inuussutissat pikkunartut Napasuliaq Alapernaarsuiffik-mi sammineqartut ataatsimiinnerinnarmi tamakkiisumik pissarsiffigineqarsinnaanngillat. Atuaqqissaaqatigiissutissap siumut piareersareersimanissaa pingaaruteqarpoq.
3 Piareersaleraangavit ilanngutassiap naggataani apeqqutit sinaakkusikkat atuarlugillu eqqarsaatinniitinnissaat iluaqutigissavat. Ilanngutassiap pingaarnersaasa eqqaamanissaannut iluaqutigissavat.
4 Atuaqqissaaqatigiissutigineqarnerani saqqummiunneqartut tusarnaaqqissaartakkit. Atuaqqissaaqatigiinnermik aqutsisup aallaqqaasiutigalugu oqaasii maluginiakkit. Immaqa pingasunik-sisamanik apeqquteqarpoq akineqarumaartussanik, imaluunniit kingullermik atuaqqissaaqatigiissutigineqarsimasoq maannakkut sammineqalersumut tunngasimappat uteqqiivoq. Biibilimi siulittuut imaluunniit Biibilimi najoqqutassaq pillugu paasinninneq nutarsarneqarsimappat tamanna eqqaasitsissutigissavaa. Soorunami atuaqqissaaqatigiinnermik aqutsisoq naatsunik oqaaseqartassaaq, atuaqqissaarnermut siunertaammat ilagiinnut ilaasortaasut neriuumminnik saqqummiinissaannik periarfissinnissaat. Allat ilikkakkaminnik saqqummiigaangata tusarnaaqqissaartarit. Upperninnut nakussatsissutaasinnaavoq.
5 Neriuutit nassuerutigiuk: Atuaqqissaaqatigiinnerni aalajangersimasumik akisarpit? Naatsumik erseqqissumillu akinissaq pitsaaneruvoq. (Naleqqiuguk Lúkarse 21:1-4.) Akissut paasiuminartoq uummammillu pisoq pingaartinneqartarpoq. Akissut siulleq naatsuullunilu erseqqissuusariaqarpoq. Kingornatigut allat allassimaffimmik saqqummiinissaannut immikkoortumiluunniit aalajangersimasumik erseqqissaateqarnissaannut tamanna periarfissiissaaq. Taamaalilluni amerlasuut neriuutiminnik saqqummiinissaminnut periarfissaqassapput. Nuannaarpasissumik ineriartornartumillu tamatigut akisariaqarpoq.
6 Atuaqqissaartarnermut peqataasaleqqammeruit imaluunniit akinissannut annilaangasaruit atuaqqissaarnermik aqutsisoq ikiortiserisinnaavat. Qinnuigiuk immikkoortoq aalajangersimasoq pilerussiuk nappaanissat alaatsinaaqqullugu. Allassimaffimmik atuarumasoqarnersoq aperippat imminut neqeroorutigisinnaavutit allassimaffiullu atorneqarnera naatsumik nassuiarlugu. Atuagassiap sinaanut allattuilaarsimaguit iluaqutigissavat. Eqqaamajullu aamma inuusuttuugaluarlutit meeraagaluarlutilluunniit akinissat assut tikilluaqqusaammat pingaartinneqarlunilu. — Mat. 21:16.
7 Uppernitsinnik saqqummiinissarput pingaartorujussuuvoq, Napasuliaq Alapernaarsuiffik-mik atuaqqissaaqatigiinneq tamatumunnga periarfissaalluarpoq. Akinissannullu tunuarsimaartuuguit sapinngisannik tamanna anigorniarniaruk ataasiinnarmilluunniit akisalerlutit aallartillutit. Taava ataatsimiinnermut tuniseqataassaatit, iluarusunnerussaatillu. Tulliani Napasuliaq Alapernaarsuiffik-mik atuaqqissaarnissamut ataatsimik akinissat piareersariassagit. — Uss. 15:23. (kmD 94/3 Hold fast . . . )