Aqqusinermi nalunaajaalluarnikkut soqutiginnittunik ujaasisa

¹ Jesus ajoqersukkaminut oqarsimavoq Naalagaaffik pillugu nutaarsiassamik nuannersumik tusarnissaminnut ’qinngaqqunnanngitsunik’ ujaasissasut. (Mat. 10:11) Inuilli angerlarsimaffiini naapinnissaat sumiffinni amerlasuuni ajornarsiartuinnarsimavoq. Tusarliussamik tusarnissaminnut qinngaqqunnanngitsut tamaasa anguniarlugit qanoq iliortoqarsinnaava?

² Illumiit illumut oqaluussinermi naapissimanngisat aqqusinermi nalunaajaanikkut naapinneqarsinnaasarput. Taamaaliorsinnaavugut bussit unittarfiini, inissiarsuit isumannaarsaasersorluakkat eqqaanni, iloqannginnersani allanilu inuit angalaarfigisaanni.

³ Aqqusinermi nalunaajaaneq ilaasa tunuarsimaarfigisarpaat. Immaqa tunuarsimaartarput ittooramik imaluunniit akerlilersuisunit illaruaatigineqarnissartik ersissutigigamikku. Isumakuluutit taama ittut amerlanertigut ingasattajaarnerusarput. Aqqusinermi naluanaajaanermik misilittagaqarluartut oqartarput taamaaliorneq illumiit illumut oqaluussinermit sapernarnerunngitsoq. Oqaatigisarpaat inuit assigiinngitsunik pissuteqartumik unitsinneqartarnertik sungiusimagaat, ilaallu tusarnaarumanerusartut angerlarsimaffinnut pulaarneqartuugunik tamaannaviaratik. Taamaattumik ’ersisuillisariarluta’ iliuuseqarutta immaqa tupaallaatigisatsinnik oqinaassavarput. — 1 Tás. 2:⁠2.

⁴ Qanoq ililluta sunniuteqarnerpaamik aqqusinermi nalunaajaasinnaavugut? Piareersarluarsimanissaq pingaartorujussuuvoq. Atuagassiat atuareertakkit saqqummiussassannik inuit soqutigiunnagaannik qinersisarlutit. Sekundini 30-ni saqqummiussissalluni naleqqutissaaq. Inunnik attaveqarfiginnilernissaq siunertaammat pitsaassaaq amerlasuut sanioqquaffigisaanniissalluni. Naak oqaluussisartumik allamik qanittumiititaqarnissaq ilalernarsinnaagaluartoq taamaattoq pitsaanerpaasarpoq kisimiilluni sulinissaq. Oqaluussisartut ingerlaqatigiikkaangamik oqaloqatigeeqqajaasinnaasarput taamaattumillu sanioqquttut immaqa Naalagaaffimmik tusarliussamut tusarusussinnaagaluartut arajutsillugit.

⁵ Pitsaanerusarpoq inunnut ataasiakkaanut saaffiginninnissaq atuagassiat nittarsaallugit nikorfaannarnerminngarnit. Inuit isaasigut attaveqarfiginiartakkit. Inussiarnersumik toqqaannartumillu oqalullutit aallartittarit. Immaqa ilaatigut pisariaqarsinnaasarpoq oqaloqatigiligaq oqaloqatigiitigalugu ingerlaqatigilaassallugu. Ajunngitsumik qisuariarpat atuagassianik neqeroorfigisinnaavat. Atuagassianik perusunngippat immaqa naqitaaqqamik neqeroorfigisinnaavat.

⁶ Pitsaanerpaasarpoq naatsunnguamik saqqummiussissalluni apeqqummik saqqummiussilluni imaluunniit arlaannit oqaaserineqarsimasunik. Soqutiginnippat aqqanik najugaanillu aperisinnaavat, immaqaluunniit oqarasuaataata normua piumallugu soqutiginninnera malittariniassagakku. Ima oqarfigisinnaavat: „Paasisaqarnerorusukkuit najukkannut pulaarsinnaavakkit imaluunniit Jehovamut nalunaajaasumut allamut pulaartillutit.“

⁷ Utoqqaanertap aqqusinermi nalunaajaatilluni arnaq Jehovap nalunaajaasuinik oqaloqateqarsimanngisaannartoq saaffigisimavaa. Atuakkamik pivoq qatanngummillu arnamit pulaarneqarumasimalluni. Soqutiginnittorpassuit suli nassaarineqarsinnaapput, ikiorneqarsinnaappullu sunniuteqarluartumik aqqusinermi nalunaajaasarutta. — ap. sul 17:⁠17. (kmD 94/7 Lad os finde de interesserede. . .)