Amerlasuut tunniunneqarsimapput — amerlasuut piniarneqassapput
1 Sallusuissummik ilisimanninnerput immikkut pisinnaatitaaffissuuvoq! Jehovamut tunniulluinnarsimagatta ’iivangkiiliumik paarisaqartitaavugut’. (1 Tás. 2:4) Tamatuma annertuumik akisussaaffeqartippaatigut. Jesus oqarsimavoq: ’Amerlasuunik tunineqartoq amerlasuunik piniarfigineqassavoq.’ — Lúk. 12:48b.
2 Tamanna ilumooqaaq. Guutip oqaasia pillugu ilisimassummik, qatanngutigiiussutsimik nuanningaartumik neriuummillu tupinnangaartumik pilluaqqusaasimagatta ilumut oqartoqarsinnaavoq amerlasuunik tunineqarsimasugut. Taamaattumik tupinnanngilaq annertuumik ilimasuffigineqaratta.
3 Piumasaqaatinut eqqortumik isiginnittuarit: Ilaat isumaqarput annertuallaamik piumaffigineqartugut. Ilagiinnut kristumiunut niaquusutut Jesusip aalajangigassaraa ’sunniineq’ suna pisariaqarnersoq ilagiit naammaginartumik ingerlasinnaassappata. (Evf. 4:15, 16) Neriorsoqqissaarpaatigut ’nammaatani iluaqisoq nammakkiussanilu oqeqaluni’. (Mat. 11:28-30) Killilimmik periarfissaqartut asannittumik eqqarsaatigai,. (Lúk. 21:1-4) Sapinngisarput tamaat tunisigutta, qanorluunniit atsigigaluarpat, pilluaqquneqassaaq. — Kul. 3:23, 24.
4 Imminut aperigit: ’Naalagaaffiup soqutigisai inuuninni sallerpaatippakka? Piffissara periarfissakkalu Guutip aqqanut ataqqinaataasumik allanullu iluaqutaasumik atorpakka? Jehovamut kiffartornera nuannaarutissarsiffigisarpara, imaluunniit namminissarsiorlunga pigisatigut ajunngitsorsiassat nuannaarutissarsiffiginerusarpakka? Apeqqutinut tamakkununnga unneqqarissumik akissutissarsinerup uummatitta pissutiginiagaa qulaassavaa. — Lúk. 6:45.
5 Eqqunngitsuliornissamut ussernartut ingalakkit: Aatsaat taama ussernartorsiortitaatigalutalu imminuinnaq eqqarsaatiginissatsinnut, piumatuunissatsinnut nuannaarniutinillu pingaartitsivallaarnissatsinnut tatineqartigaagut. Ullut tamaasa aalajangiusimasatta akerlianik iliortinniarneqartarpugut. Unamminiarnartut tamakku akiorsinnaajumallugit Jehova ikioqqulluta qinnuigisariaqarparput. (Mat. 26:41) Anersaani aqqutigalugu nukittuunngortissinnaavaatigut. (Jes. 40:29) Ullut tamaasa Guutip oqaasiani atuarnissaq iluaqutaasorujussuuvoq. (Tuss. 1:2, 3) Imminut aalangersimaffigineq naalakkersinnaanerlu aamma pingaaruteqartorujussuupput. — 1 Kor. 9:27.
6 Ajunngitsunik asanninneq naammanngilaq, aamma ajortut uumissortariaqarput. (Tuss. 97:10) Tassa imaappoq eqqunngitsumik kipisagisaqarneq ineriartortinnaveersaartariaqarpoq. Ussatit 6:16-19-imi Jehovap uumigisai arfineq-marluk taagorneqarput. Jehovamut iluarisaajumasup aamma ajortut uumigisariaqarpai. Sallusuissut pillugu eqqorluartumik ilisimasaqalereersimagatta kissaatigisariaqarparput ilisimasaq tamanna naapertorlugu iliornissarput, isumarput ajunngitsunut sammitinniartuarlugu.
7 Eqqortuliorneruvoq qinussalluni pissutsit atukkatta ’Naalakkap suliaani naammassisaqangaartuinnarnissatsinnut’ periarfissaqartittuassagaatigut. (1 Kor. 15:58) Amerlasuut paasisimavaat Jehovamut kiffartornermi ulapinneq sernissuutaasoq, pingaanngitsunut piffissaqartitsineq ajorami.
8 Suut tamaasa eqqarsaatigissagaanni Jehovap uagutsinnut piumasaqaatai ingasattajaartuunngillat. (Mika 6:8) Kiffartornitsinni immikkut pisinnaatitaaffinnut tamanut qujamasuutiginnittuusariaqarpugut. (Evf. 5:20) ’Erloqilluta’ tamaviaarlutalu akiuuttuarumavugut, nalunagu akissarsiassarput piumaffigineqarnitsinnit annerungaartoq. — 1 Tim. 4:10. (kmD 95/3 Meget er givet . . .)