Biibilimik atuaqqissaarnissaq neqeroorutigisaruk — nakimaallutit
1 Nakimaalluta oqaluussinissatsinnut pissutissaqarluarpugut. Qularnaatsumik neriugisaqarpugut, tatigivarpullu Jehovap nakimaannerulernissatsinnik qinnutivut tusartarai. — ap. sul. 4:29, 31.
2 Biibilimik atuaqqissaaqatiginninnissat nakimaallutit neqeroorutigisarpiuk? Ullut kingullit 14-it ingerlaneranni qasseriarlutit nakimaallutit Biibilimik atuaqqissaaqatiginninnissat neqeroorutigaajuk? Unneqqarissumik akinerup nakimaannerunissamik pisariaqartitsineq erseqqissarsinnaavaa. Jehovap nalunaajaasuisut Biibilimik ilinniartitsinissamik neqeroorutiginnittartutut ilisimaneqartariaqarpugut.
3 Taamaattumik nakimaalluta attaveqarfigisatsinnut tamanut atuaqqissaaqatiginninnissaq neqeroorutigisariaqarparput. Allaat atuagassianik marlussunnik naqitaaqqamilluunniit tunisimasavut oqaluttuussinnaavavut pulaarnitsinnut siunertaasoq tassaasoq Biibilimik ilinniartinnissaanik neqeroornissaq. Pulaaqqaarnermi, pulaaqqinnermilu, ima aallarniisoqarsinnaavoq: „Aggerpunga takutikkiartorlutit qanoq ililluni Biibili atuaqqissaarneqarsinnaasoq,“ taavalu atuagassiaatitta ilaat atorlugu atuaqqissaariaaseq takutissinnaavat.
4 Nakkutilliisoq angalasartoq ima oqaluttuarpoq: „Oqaluussisartunngorlaaq ima aallarniivoq: ’Ullumikkut aggerpugut takutinniarlutit qanoq ilillutit Biibilimut tunngasunik ilikkagaqarnerusinnaasutit. Uanga qanoq ilillunga Biibilimik atuaqqissaarsimanersunga takoriassagit.’ ’Paratiisilersaarummi’ immikkoortut siulliit qulit sammivaat, aallarniillutik naggasiillutillu qinullutik, ullullu marluk qaangiuppata sammeqqissallugu isumaqatigiillutik. Sapaatikkut uia ataatsimiinnermut najuuppoq, taamanimiillu sapaatip-akunneranut marloriarluni atuaqqissaarneq ingerlanneqartarpoq. Nutaaq maannakkut sapaatit tamaasa ataatsimiigiartarpoq.“
5 Qatanngutip arnap suleqatini oqaluttuussimavaa sooq aasat tamaasa Silkeborgiliartarluni. Oqaluttuussaa soqutiginninnermik ersersitsivoq oqaluttuarlunilu sapaatip-akunnerani kingullermi atuakkanik atorniartarfimmi biibilimik atorsimalluni. Atuarnerani apeqquterpassuarnik allattuisimavoq neriuutigalugulu ullut arlaanni apeqqutinut akissutissaqartumik naapitsisinnaajumaarluni. Qatanngutip arnap Biibilimik atuaqqissaaqatiginissaanik neqeroorfigaa, massakkullu aalajangersimasumik atuaqqissaaqatigiittarput.
6 Periarfissani tamani nakimaalluta Jehovalu tatigalugu oqaluussisarutta atuaqqissaaqatiginninnissatsinnillu neqeroortarutta eqqortumik isumaqartut oqaluussiffigisartakkatsinniittut ’nalliuttoq nuannersoq, ulloq annaassivik’ suli ingerlatillugu angusinnaassavavut. — ap. sul. 14:3; 2 Kor. 6:2. (kmD 95/3 Tilbyd Bibelstudium med frimodighed.)