Piareersarneq kinguneqarluartitsinissamut matuersaataavoq
1 Oqaluussiartornissamut piareersarnerup ikiortarpaatigut oqaluussinermut nangaassuteqarutta. Matu tikikkiartuleraangatsigu nalusanngilarput qanoq oqarnissarput. Akerliliisoqaratarsinnaanera annilaanngatigisariaqartanngilarput. Oqaluussereersimallutalu angerlaraangatta nuannaartarpugut, nalunnginnatsigu ajunngitsumik naammassisaqarsimalluta. Aap, piareersarluartarneq oqaluussinermut ajoqersuinermullu pikkorinnerulersitsisarpoq.
2 Paulusip piareersarnissaq pingaartippaa kajumissaaramisigut ’isikkatsigut kamissimalluta iivanngkiiliu eqqissinartoq piareersaatigeqqullugu’. (Evf. 6:15) Tamanna nassataqarpoq isumap uummatillu piareersarnissaannik taamalu ajunngitsumik piumassuseqartumillu isiginnittaaseqarnermik. Allat sallusuissummik oqaluussiffiginissaannut piareersimasaraangatta, iliuuserisimasavut akilerneqartarput inerititaqassallutillu. Pilluarnerulersissavaatigut. — ap. sul. 20:35.
3 Qanoq oqaluussinissamut piareersartoqarsinnaasoq: Siullermik saqqummiusseriaatsimik illit nuannarisannik toqqaagit, immaqa ’Ræsonnerebog’-imi eqqartorneqartut ilaannik imaluunniit Naalagaaffimmik kiffartorneq-meersumik. Allassimaffiit atugassatit eqqarsaatigilluakkit, aalajangerlugulu oqaatsit suut pingaarnerutissallugit. Saqqummiusseriaatsit alanngaarniarsarinissaat pisariaqanngilaq; ajunnginnerusarpoq isumaanik paasinnissimaneq namminerlu oqaatsit atorlugit saqqummiullugu pulaakkannut soqutiginarsorisattut. Tusarliussamik saqqummiusseriaatsimik pitsaasumik nassaaruit, allanngoqattaartittariaqanngilat.
4 Atuagassiaq neqeroorutiginiakkat misissuataaruk, soqutiginartunillu toqqaallutit. Angalaartarfinni inuit soqutigissagunagaat toqqartariaqarpat. Eqqarsaatigiuttaaq naapitannut assigiinngitsunut qanoq saqqummiussinerit naleqqussarsinnaanerlugu: angummut, arnamut, utoqqarmut inuusuttumulluunniit.
5 Misilissimaviuk ’sungiusarfeqartarlutit’? Ilaqutariit oqaluussisartulluunniit ilaat katersortikkit saqqummiusseriaaserlu suna sunniuteqarluarnerussanersoq oqaluuseralugu; taava sungiusarsinnaavasi, taamaalillusi saqqummiusseriaaseq eqqaamalluarsinnaassavarsi. Pissutsit akerliliinerillu piviusorsiortissigik. Taamatut sungiusartarneq qulannginnerulluni oqalussinnaalersitsisarpoq, pitsaanerusumik kinguneqartarluni, imminullu tatiginerulersitsisarluni.
6 Piareersarnerup sungiusarnerullu saniatigut, imminut aamma aperisariaqarpoq: ’Atisakka oqaluussiartornissamut naleqquppat? Pisariaqartut pooqattanniitippakka, atuagassiammi atugassakka? Ajukkunnanngillat? ’Ræsonnerebogi’, naqitaaqqat, illumiit illumut allattuiffiit aqerluusarlu nassarpakka?’ Isumatusaarluni piareersarsimagaanni oqaluussiartorneq pissarsiaqarluarnarnerusarpoq.
7 Sapinngisarput tamaat piareersareeraangatta, Jehovap anersaava qinnutigisariaqarparput ajunngitsumik kinguneqarnissaanik ikioqqulluta. (1 Juá. 5:14, 15) Piareersarnerup pingaaruteqassusia eqqumaffigigutsigu suliarput nuannaarutissarfiginerussavarput, ’kiffartuutigisarput naammassillugu’. — 2 Tim. 4:5. (kmD 3/96 Forberedelse er nøglen til et godt resultat)