Ullukkullu unnuakkullu kiffartorit
1 Immikkut pisinnaatitaaffimmik tunineqarsimavugut — tassa Jehovamut nalunaajaasuunermik. Oqaluussisartunut nunarsuaq tamakkerlugu peqatigiiusunut Naalagaaffik pillugu oqaluussinermut aatsaat taama annertutigisumut Jehovap atugaanut ilaavugut. (Mák. 13:10) Piffissap nukinginnassusia eqqarsaatigalugu immitsinnut aperisariaqarpugut: ’Sapinngisara tamaat suliamut tamatumunnga peqataasarpunga?’
2 Naluarput piffissap ingerlanerani inuit qassit oqaluussinitsinnut ajunngitsumik qisuariassasut. Jehovap neriorsorpaatigut taakku tassaajumaartut ’amerlangaartut’, tamarmik imminut ’kiffartortut ullukkullu unnuakkullu’. (sar. 7:9, 15) Oqaluussisartut 5 millioninit amerlanerusut maanna Guuti kiffartuullugu ulapputeqartut, ataatsimiittunut peqataallutik tusarnaartuuinnanngillat aammali nunarsuaq tamakkerlugu nutaarsiassamik nuannersumik oqaluussissutiginnittuullutik.
3 Ullut tamaasa Jehovamik unnersiutiginninnissamut periarfissaqarpoq, toqqaannartumik oqaluussinikkut imaluunniit periarfissaq iluatsillugu. Eqqarsaatigiuk tamatta aalajangeraluarutta ullut tamaasa inummut ataatsimut sallusuissut oqaloqatigiissutigisarniarlugu, qanoq nalunaajaatiginninneq annertutigissasoq. Jehovamut qujamasunnitta angorniorluta taassuminnga oqaluuserinnilersittariaqarpaatigut. — Tuss. 92:2, 3.
4 Allat kiffartuussileqqullugit ikiukkit: Jehovap pilluaqqulluta amerliartortittuarpaatigut. (Hag. 2:7) Ukiup kiffartuussiffiusup matuma siuliani angerlasimaffimmi atuaqqissaaqatigiinnerit agguaqatigiissillugit qaammatit tamaasa 5016-it ingerlanneqarsimapput. Anguniagaraarpullu taakkua Jesusimut ajoqersuganngoqqullugit ikiornissaat. (Mat. 28:19, 20) Taakku ilarpassui siumukalereersimapput maannalu ataatsimiinnernut najuuttarlutik. Ilisarisimasaminnut ’Guutip malunnangaartuliai’ oqaluuserisalersimavaat. (ap. sul. 2:11) Taakku oqaluussinermut peqataalernissaannik kajumissaarneqarsinnaappat?
5 Apriilimi immikkut iliuuseqartariaqarpugut nutaat piukkunnaateqalersimasut oqaluussinermut peqataanissaannik kajumissaassallutigik. Atuaqatigisartakkat peqataalernissaminut kissaateqarnerminik ersersitsisimava? Biibilimi piumasarineqartunut inuunini naapertuuttunngortissimavaa? (Takukkit Organiseret til at fuldføre vor tjeneste-mi, quppernerni 94-96-imiittut.) Ilinniartup kissaatigippagu oqaluussinermut peqataarusulluni, taava nakkutilliisumut siulittaasumut tamanna oqaloqatigiissutigisinnaavat, taassumalu utoqqaanertat marluk tamatuminnga suliassissavai. Kuisimanngitsutut oqaluussisartunngornissaminut piginnaanngorsimappat kajumissaarsinnaavat oqaluussiartuleruit ilagiumallugu. Ingammik oqaluussinermut tunngasunik nakkutilliisup ilagiillu atuakkamik atuaqqissaaqatigiinneranni aqutsisuusartut oqaluussinissamut piukkunnaateqalersimasut apriilimi aallartissinnaasut maluginiartariaqarpaat.
6 Angajoqqaat eqqarsaatigisinnaavaat meeqqat kuisimanngitsutut oqaluussisartunngornissamut piukkunnaateqalersimanersut. (Tuss. 148:12, 13.) Meeqqavit nammineq Naalagaaffimmik oqaluussissutiginninnermut peqataalernissani kissaatigippagu, ajunngitsumillu ileqqoqarpat, taava ilagiinni utoqqaanertat ilaannut oqaluussinermut nakkutilliisumut oqaloqatigiissutigisinnaavat. Taava utoqqaanertat marluk meeqqallu marluullusi oqaloqatigereerpasi aalajangissavaat oqaluussisartutut piginnaanngorsimanersoq. Ingammik nuannaarnissamut pissutissaqartarpoq meeqqat Guutimik unnersiutiginninnitsinni peqatigileraangatigut.
7 Jehova kisimi illernartumik kiffartorfigineqarnissamut qinngaqqunnanngilaq. (Lúk. 4:8) Qanortoq taassuminnga „nipituumik“ unnersiutiginnissinnaanermik immikkut pisinnaatitaaffik tamakkiisumik peqataaffigisigu. — Tuss. 109:30; 113:3. (kmD 96/4 Yd hellig tjeneste dag og nat)