Oqaluussinissamut katersuunnerit iluaqutaalluartut

1. Katersuuttarnerup suna siunertaraa?

¹ Ilaanni Jiisusip ajoqersukkani 70-ita oqaluussiartortillugit aallartinnginneranni naapeqatigeqqaarpai. (Luk 10:1-11) Qiimmassarpai eqqaasillugit ‘katersuinermi naalagaasumit’, Jehovamit, siulersorneqaramik kisimiinnginnerarlugit. Aamma oqaluussinermi iluaqutissaannik siunnersorpai ‘marlukkaarlugillu aallartillugit’. Ullumikkut aamma oqaluussiartunnginnitsinni katersuuttarnivut taamatut siunertaqartarput, qiimmassarneqarlutalu sapiissuseqalersineqartarpugut aaqqissugaasarlutalu.

2. Katersuunneq qanoq sivikitsigisalissava?

² Ulloq manna tikillugu katersuuttarnerit, oqaluussisartoqatigiit aaqqissuunneqartarnerat, oqaluussiffissanik agguaassisarnerit qinunerlu ilanngullugit, minutsini 10-15-inut sivisussuseqartarput. Tamanna maanna allannguiffigineqartussanngorpoq. Apriilip aallaqqaataaniit katersuuttarnerit minutsini 5-7-inut sivisussuseqartalissapput. Ilagiinnili ataatsimiittoqaqqammersimatillugu, najuuttut anersaakkut sammisaqaqqammernerat pissutigalugu, katersuunneq sivikinnerusinnaavoq. Sivikitsunnguamik katersuuttarutta oqaluussinissarput sivisunerussaaq. Taamaalilluni pionerit oqaluussisartulluunniit allat oqaluussillutik aallartereersimasut unillatsiarnerat sivikinnerussaaq.

3. Katersuunneq tamanut iluaqutaanerusussanngorlugu qanoq aaqqissuunneqqassava?

³ Katersuunnerit oqaluussisartunut iluaqutaanerusussanngorlugit aaqqissuunneqartassapput. Ataatsimut katersuunnatik ilagiit ilaasa oqaluussisartoqatigiiginnaallutik katersuunnissartik iluarinerusarpaat. Taamaaliornikkut oqaluussisartut katersuuttunukarnissaat oqaluussiffissamukarnissaallu pisariunnginnerussarpoq. Oqaluussisartut aaqqissuunneqapallassinnaapput, immaqalu aamma kikkut pisariaqartitsinersut oqaluussisartoqatigiinni nakkutilliisumit maluginiarneqarnerussallutik. Utoqqaanertaqatigiit pissutsit nalilersorsinnaavaat pitsaanerusorisartillu aalajangiullugu. Qinnummik naatsumik naggasiisoqannginnerani kina angalaaqatiginiarnerlugu angalaarfigisassartillu tamarmik ilisimariissavaat.

4. Sooq katersuuttarneq ataatsimiinnernut allanut naleqqiullugu pingaannginnerusutut isigineqassanngila?

⁴ Ataatsimiinneq pingaarutilik. Katersuuttarneq oqaluussiniartunut iluaqutissatut aaqqissuussaammat ilagiinniittunit tamanit peqataaffigineqarnissaa ilimananngilaq. Tamannali soqutaannginnerusutut imaluunniit ilagiinni ataatsimiiffissanut allanut naleqqiullugu pingaaruteqannginnerusutut isigineqassanngilaq. Ataatsimiittarnerit allat tamaasa assigalugit katersuuttarneq Jehovamit aaqqissugaavoq ‘asaqatigiinnermut ajunngitsuliornermullu kajumissaaqatigiittarniassagatta’. (Hebr 10:24, 25) Taamaattumik eqqartuineq Jehovamut unnersiutaaqqullugu najuuttunullu iluaqutaasinnaaqqullugu aqutsisoq piareersarluarsimasariaqarpoq. Oqaluussiartorniarlutik pilersaaruteqartut sapinngisamik katersuuttunut najuunniartariaqarput.

5. (a) Katersuunnissamut atatillugu kiffartornermik nakkutilliisoq qanoq akisussaaffeqarpa? (b) Qatanngutip arnap katersuunneq qanoq aqussavaa?

⁵ Aqutsisup piareersagassaa. Ilagiinni ataatsimiinnermut pisassalik piareersarluartariaqarmat siusissukkut saqqummiussassaq tunniunneqareersimassariaqartarpoq. Katersuunnissamut tunngatillugu aamma taamaappoq. Oqaluussisartoqatigiit immikkoorlutik katersuuppata soorunami oqaluussisartoqatigiinnut nakkutilliisup imaluunniit ikiortaata katersuunneq aqussavaa. Ilagiilli ataatsimut katersuunniartillugit kiffartornermik nakkutilliisup aqutsisussaq toqqassavaa. Kiffartornermik nakkutilliisut ilaat ataatsimut katersuutitsisussamut pilersaarummik aqutsisussanut tunniussisarpoq allakkanullu nivinngaavimmut nivinngaasinnaasarluni. Kiffartornermik nakkutilliisoq aqutsisussanik pilersaarusiuleruni naliliisinnaassuseqartariaqarpoq eqqaamallugu katersuunnerit taakku pitsaassusiinut aqutsisup ilinniartitsillaqqinnera aaqqissuussillaqqineralu apeqqutaammata. Ulluni aalajangersimasuni katersuunnerni utoqqaanertamit, ilagiinni kiffartortumit qatanngummilluunniit angummik kuisimasumik piukkunnaatilimmik najuuttoqarsinnaasoqanngippat kiffartornermik nakkutilliisup qatanngut arnaq piukkunnaatilik aqutsisussanngortissinnaavaa. — Takuuk allaaserisaq “Qatanngut arnaq aqutsisussanngorpat.”

6. Sooq aqutsisussap piareersarluarsimanissaa pingaaruteqarpa?

⁶ Teokratiimik Ilinniarfimmut aamma oqaluussinermut tunngasumik ataatsimiinnermut pilersaarusiaq tigugaangatsigu piareersarluaqqissaartarpugut. Ataatsimiigiartilluta oqaasissavut aatsaat eqqarsaatigineq ajorpavut. Taamaattumik katersuutsitsisussaq ataatsimiinnermi saqqummiussinerni piareersarluartarnermisut piareersarluartassaaq. Katersuuttarnissaq sivikinnerulissammat tamannalu sunniuteqarluarlunilu piffissaq eqqorlugu naammassineqassappat piareersarluarsimanissaq suli pingaaruteqarnerulerpoq. Piareersarluarnermut aamma ilaavoq angalaarfigisassamik siumut piareersimatitaqarneq.

7. Suut aqutsisup eqqartorsinnaavai?

⁷ Oqaluuserineqarsinnaasut. Angalaarfigisartakkani pissutsit assigiinngitsuusarmata inussiaq aalajaatsoq katersuutitsinernut najoqqutassialiorneq ajorpoq. Ungalusaq “Katersuutsitsinerni atorneqarsinnaasut”-mik qulequtalik najoqqutarineqarsinnaavoq. Nalinginnaasumik katersuunnermi najuuttut eqqartueqatigalugit ingerlanneqartassaaq. Pisuusaartitsinermik piareersarluakkamik imaluunniit jw.org-imi isiginnaagassiamik oqaluussinermi ilaannikkut takutitsisoqarsinnaavoq. Katersuunnissamut piareersarnermi aqutsisup eqqarsaatigissavaa oqaluussiniartut ulloq taanna angalaarnissamut suna qiimmassaatigisinnaallugulu sapiissuseqalissutigisinnaaneraat.

8. Arfininngornikkut sapaatikkullu katersuunnerni suut eqqartorneqarsinnaappat?

⁸ Arfininngornikkut oqaluussisartut amerlanerit Napasuliaq Alapernaarsuiffik Vågn op!-ilu neqeroorutigisarpaat. Arfininngornikkut oqaluussinermut peqataasartut amerlasuut ulluinnarni angalaarneq ajorput, taamaattumik ilaqutariittut atuaqqissaaqatigiinnermi saqqummiussassamik sungiusagartik eqqaamarpiarunnaarsimassarlugu. Taamaammat iluaqutaassaqaaq aqutsisup aallarniutitut siunnersuutit ilaat Guutip naalagaaffianut kiffartorneq-up tunuaniittoq uteqqinneqartartuuppat. Ilaatigut eqqartorneqarsinnaapput atuagassiaatitsinnik neqeroornitsinnut qanoq ililluta illoqarfigisatsinni nutaarsiassat, pisimasut nalliuttulluunniit ilanngussinnaagivut imaluunniit pulaakkap atuagassiat tiguppagit pulaaqqiinissaamut qanoq periarfissaqalertitsisinnaasugut. Atuagassiat neqeroorutigineqareersimappata katersuutsitsinnermi aqutsisoq aperisinnaavoq naatsunnguamik siunnersuuteqartoqarsinnaanersoq imaluunniit misigisimasamik kajumississutaasumik oqaluttuartoqarusunnersoq. Sapaatini katersuutsitsinerni qaammammi neqeroorutissaq assingusumik atorniarnerlugu aqutsisup aalajangersinnaavaa. Biibililersaarutit atuaqqissaarutissat, soorlu quppersakkat Tusagassat nuannersut aamma Guuti tusarnaaruk taavalu atuagaq Biibilimi ajoqersuutigineqartut, ullut tamaasa neqeroorutigineqarsinnaasarmata sapaammi katersuunnermi aqutsisup taakkua arlaat qanoq neqeroorutigineqarsinnaasoq naatsumik sammisinnaavaa.

9. Immikkut ittumik suliniartoqarpat sapaatip-akunnerata naanerani suut eqqartorneqarsinnaappat?

⁹ Sapaatip-akunnerata naanerani immikkut ittumik suliniartoqarpat ilagiinni katersuunnermi aqutsisup aalajangersinnaavaa qaaqqusissummut imaluunniit naqitaaqqamut ilanngullugit atuagassiat tunniunneqassanersut, imaluunniit soqutiginninnermik ersersitsisoqarpat qanoq iliortoqarsinnaanera eqqartussanerlugu. Aamma misigisimasanik immikkut suliniarnerup pingaaruteqassusianik ersersitsisunik oqaluttuartitsisinnaavoq.

10, 11. Sooq najuuttut piareersartarnerat katersuunnerup iluatsilluarnissaanut pingaaruteqartarpa?

¹⁰ Oqaluussisartup piareersagassaa. Katersuunnerup iluatsilluarnissaanut najuuttut aamma akisussaapput. Oqaluussiartornissamut piareersareersimagaanni, immaqa ilaqutariittut atuaqqissaaqatigiinnermi, katersuunnermi oqaluusseqatigiinnermiluunniit kaammattuutaasinnaasumik oqaaseqalaarnissamut piareersimasoqarsinnaavoq. Oqaluussiffigisassaminni aallartikkasuarniassammata katersuuttunukannginnermi atuagassianik Biibililersaarutinillu naammattunik nassataqarnissaq piareersarnermut ilaavoq.

¹¹ Aamma katersuunneq suli aallartinngitsoq takkutissalluni pingaaruteqarpoq. Soorunami ataatsimiinnernut tamanut inortuinaveersaartarpugut. Pingaartumik katersuunnermi inortuinaveersaarnissaq pingaaruteqarpoq. Sooq? Aqutsisup oqaluussisartoqatigiit aaqqissuutinnginnerini eqqumaffigisassat arlallit eqqarsaatigeqqissaareertarmagit. Oqaluussisartut ikittuinnaat takkussimappata tamaasa oqaluussiffissamut naammassineqanngitsumut ilaserisinnaavai. Angalaarfigisartagaq ungasiartumiippat pisuinnarlutik katersuuttunukarsimasut biililinnut ilaaffissarsiuussinnaavai. Angalaarfissaq pinerluttoqarajuffiuppat aqutsisup angut arnarlu angalaaqatigiississinnaavai imaluunniit arnat angutit qanittuanni angalaartillugit. Oqaluussisartut pisinnaasamikkut killeqartut pukkitsuni majuartarfeqarpianngitsuniluunniit angalaarfissarsisinneqarsinnaapput. Oqaluussisartunngorlaat misilittagaqarnerusumik angalaaqatissarsisinneqarsinnaapput. Oqaluussisartunik inortuisoqartillugu pilersaarutigineqartut allanngortinneqartariaqartarput. Soorunami ullut ilaanni pissutissaqavilluta inortuisariaqartarpugut. Katersuunnermulli inortuikulavallaarutta imminut aperisinnaavugut tamanna pingaartitsinnginnermik imaluunniit pilersaarusiortannginnermik peqquteqarnersoq.

12. Nammineerlutit angalaaqatissarsineq ileqqorigukku suna eqqarsaatigisinnaaviuk?

¹² Katersuunnerup aallartinnginnerani katersuuttunukartut katersuunnermi isumaqateqarniarsinnaapput imaluunniit aqutsisumit toqqaassunneqarsinnaallutik. Nammineerlutit angalaaqatissarsineq ileqqorigukku ikinngutiginerpaasat kisiat angalaaqatigiinnartarnagu oqaluussisartunik assigiinngitsunik angalaaqateqartalernikkut ‘ammarsinnaavit’? (2 Kor 6:11-13) Oqaluussisartunngorlaaq ilinniartitsillaqqinnerulernissaanik ikiorniarlugu angalaaqatigisarsinnaaviuk? (1 Kor 10:24; 1 Tim 4:13, 15) Katersuunnermi siunnersuutinut, aamma sumi angalaarfissarsinerlutit, tusarnaaqqissaarit. Katersuunneq naappat aaqqissuussanik allanngortitsinaveersaarit ingerlaannarlu angalaarfissannukarlutit.

13. Pisussaaffivut naammassigaangatsigit katersuuttarnivut qanoq iluaqutigisarpavut?

¹³ Oqaluussereernerup kingorna, Jiisusip aallartitai 70-it “nuannaarlutik uterput”. (Luk 10:17) Qularnanngitsumik oqaluussiartunnginnerminni Jiisusimik naapeqateqaqqaarsimanertik oqaluussinermi iluatsitsilluarnerannut pissutaavoq. Ullumikkut katersuuttarneq aamma taamatut iluaqutaasinnaavoq. Tamatta pisussaaffipput naammassigutsigu katersuunnermi qiimmassaqatigiillutalu sapiissuseqalerlutalu aaqqissugaasarpugut taamaalillutalu ‘inuiannut tamanut nalujunnaarsitsiniaanerput’ naammassisinnaanngortarlugu. — Matt 24:14.