Pissutsit allanngorsimapput
1 Biibilimi oqaatigineqarpoq silap matuma pissusia allanngorartoq. (1 Kor. 7:31, NV) Ilumuussusia! Nalitsinniinnaq inunni assigiinngitsunik atugalinni tamani eqqarsartaatsikkut, ileqqulersuutitigut allanngornernik annertuunik takusaqartarsimavugut. Inuit tamaasa Naalagaaffiup tusarliussaanik tusarlerniassagutsigik, saqqummiussarput pissutsit allanngorarnerat najoqqutaralugu naleqqussartuartariaqarparput. Kissaatigaarput nutaarsiassamik nuannersumik saqqummiussinerput soqutiginnilersitsisuussasoq inuillu uummataannut anngutissasoq.
2 Ukiualuit matuma siorna nunani arlalinni oqaluussisarnerput allaavoq, amerlanersaat eqqissisimasumik inuummata, inuunerminni toqqissisimassutigisaminnik. Upperisarsiornertaaq inuuneranni pingaaruteqarpoq. Biibilimut ataqqinninnerujussuupput. Taamanikkut oqaluussisartut ajoqersuutinut tunngasunik amerlasuutigut tunngavilersuinerusarput. Ullumikkut inuppassuarnit upperisarsiorneq ammut isigineqarpoq. Ikittuinnaat Biibili upperaat, amerlasuullu pinngoriartuaarsimasorinninneq isumaqatigaat Guutimut uppernermut taarsiullugu.
3 Nakkutilliisoq angalasartoq ima oqarsimavoq: „Maannali inuit inuunerminni ajornartorsiuteqangaarmata soorluluunniit qanoq inuunissaannik ajoqersuinnartariaqarivut.“ Inuit ernumassutigisartagaat soorumami imminnut ilaqutaannulluunniit tunngagajunnerusarput. Ataatsimooqatigiikkaangamik tamakku eqqartorajunnerusarpaat, tamakkulu oqaluussiartortarnitsinni eqqarsaatigisariaqarpavut.
4 Guutip naalagaaffia siunissamut neriuutissatuaavoq qularnaatsoq: Inuit amerlanersaat naalakkersuisunik tatigisaqartorsuunngillat. Inuunerminni ajunnginnerusumik silarsuaqalernissaa upperinngilaat. Eqqunngitsumik upperisarsiornerit neriunnissamut tunngavissaannik tunisinnaasimanngilaat. Taamaattumik inuiaat atorfissaqartinnerpaasaraat nutaarsiassamik nuannersumik tusarlerneqarnissartik. Taakkununnga takutittariaqarparput naggataatigut qanoq inuiaat ajornartorsiutaat tamarmik Guutip naalagaaffianit aaqqinneqassasut.
5 Biibili kisimi unnersuunneqarfissaavoq tutsuiginartoq: Ullumikkut inuit amerlanersaat siuttunit inuinnaat ilisimasaannut silamiullu ilisimaqqissaarniutaannut tatiginnittunit tammartitaasimapput. Inuit paasisariaqarpaat ’inuup ingerlavissani nammineq aalajangigassarinngikkaa’. (Jer. 10:23) Ilinniarsinnaasaat naleqarnerpaaq tassaavoq ’Jehovamik tatiginninneq uummatikkut iluunngarluni tarnikkullu iluunngarluni namminerlu silaqassuseq tatiginagu’. (Uss. 3:5) Pissutsit allanngorsimapput, Biibilili allanngorsimanngilaq. Taamaattumik oqaluussinitsinni Guutip oqaasia tamatigut saqqummiunniartariaqarparput, allallu ilinniartillugit unnersuussineq isumassarsiarititaasoq tassaniittoq pingaarteqqullugu. (2 Tim. 3:16, 17) Biibilip pingaaruteqassusia erseqqissartariaqarparput innersuussutigisarneratigut, apeqqutit akissagaangatsigik atortarneratigut, inuit kajumissaartarneratigut atuaqqissaartaqqullugu ilisimassutaalu atoriaannaasut atortaqqullugit.
6 Pissutsit allanngorartuaraluartut, oqaluussinermi siunertarput taannaajuarpoq. Naalagaaffimmik nutaarsiassaq nuannersoq oqaluussissutigissavarput, allat Guutip oqaasiinut tatiginninnerat ineriartortillugu paasitillugillu Biibilimik atuaqqissaaqatigineqarnissartik pisariaqartikkaat. Oqaatsivut pulaakkatta pisariaqartitaanut naapertuuttariaqarput. Taamaaliornikkut nutaarsiassamik nuannersumik allat avitseqatigisinnaavavut amerlanerusullu ilataarisinnaallugit. — 1 Kor. 9:19, 23. (kmD 96/4 Tiderne har ændret sig)