Ulapippallaarpit?
1 Paulusip kajumissaarpaatigut ’Naalakkap suliaanik naammassisaqangaartuinnaqqulluta’. (1 Kor. 15:58) Kajumissaarneqarpugut ullut tamaasa atuaqqissaartarnissatsinnik, nalunaajaanermut peqataasarnissatsinnik, ataatsimiinnerit najuuffigiuarnissaannik ilagiinnilu suliassanut eqiasuilluta naammassinninnissatsinnik. Tamakkua saniatigut allat ikiuinissatsinnik pisariaqartitsisut ikiortariaqarpavut. Tamakkua saniatigut Biibilip inassutigisaanik allanik aamma naammassiniagassarpassuaqarpugut Jehovap ataqqinaatissaanut. Immitsinnut ilaquttavullu timip piisigut isumagisariaqarpavut allanut nanertuutaanata. (1 Tim. 5:8) Misigissutsikkut pisariaqartitsinerit aamma matusariaqarput. Angerlarsimaffipput avatangiisivullu isumagalugit allanut maligassaalluartariaqarpugut. Tamakkorpassuarnik suliassaqartilluta immaqa ilaannikkut misigisarsinnaavugut suliassaqarpallaarluta, immaqalu eqqarsarsinnaalluta suliavut annikillisittariaqarlutigit.
2 Pissutsit atukkat assigiinngitsut eqqarsaatigalugit ilaannikkut silatusaarnerusarpoq suliassat ilaasa unitsikkallarnissaat imaluunnit killilernissaat. Ilaat isumaqartarput allat piumasaat tamaasa naammassisariaqarlugit. Tamatuminnga oqimaaqatigiissaarinermik amigaateqarneq qasusoornermik pilersitsisinnaavoq inummullu ima nanertuutaalertigisinnaavoq naggataatigut artorsinneqarluni.
3 Oqimaaqatigiissaarineq atatittuaruk: Oqimaaqatigiissarinermut matuersaat Paulusip ima oqaatigisimavaa: ’Sorliit pingaarnerusut misilittarsigik’. (Fil. 1:10, NV) Tassa pingaarnerusut isumageqqaartariaqarput, piffissaq pissutsillu apeqqutaatillugit tamakkua kingorna pingaannginnerusut isumagineqarsinnaapput. Ilaqutariinni pisussaaffiit pingaarnerusunut ilaapput. Ilagiit avataanni suliassat ilaat aamma naammassisariaqarput. Jesusip ajoqersorsimavaatigut Naalagaaffimmik piniaqqaartarnissamik kissaateqarluni tulleriissaarinissamik. Siullermik Jehovamut tunniulluinnarsimanitta naammassinissaanut piumasarineqartut iliuusereqqaartariaqarpavut. — Mat. 5:3; 6:33.
4 Tamakku eqqarsaatigisarutsigik nammineq sammisassat pisariaqanngitsut tamaasa aamma ingasaassilluni sunngiffimmi sammisassat pilersaarusiorfitsinni piissavavut aammattaaq pisariaqanngitsunik allanut pisussaatinnaveersaarluta. Sapaatip-akunneranut pilersaarusiornitsinni nammineq atuaqqissaartarnissatsinnut, naammaginartumik oqaluusseqataanermut, ataatsimiinnernut najuuttarnermut allanullu pallorfiginninnitsinnut tunngasunik piffisalertassaagut. Piffissaq sinneruttoq sammisassanut allanut agguataarneqarsinnaavoq apeqqutaatillugu anguniakkap pingaarnerup, tassa oqimaaqatigiissaarilluni Naalagaaffimmik salliutitsilluni kristumiuunerup anguniarneranut qanoq iluaqutaatiginersoq.
5 Naak taamaalioraluarluta immaqa nammaatatsinnik oqimaaginnilluta misigisinnaavugut. Taamaappat Jesusip neqeroorutaa ilassisariaqarparput: ’Ornissinga tamassi erloqisusi nanertugaasusilu, qasuersissavassi.’ (Mat. 11:28) Jehova qimarravigisariaqarparput, „ullut tamaasa, Guuti kissumiarterput“ qasusumillu nakussatsitsisartoq. Neriorsuivoq iluartoq patajatinngisaannassallugu. (Tuss. 55:23; 68:20; Jes. 40:29) Qularutiginngissinnaavarput qinnutitta akineqarnissaat, tamatumalu suleqataajuarluta teokratiimut tunngasunik sammisassarpassuaqartumik inuunissarput ajornarunnaarsissavaa.
6 Nangaassuteqarata Naalagaaffiup soqutigisaanik ulapputeqartuaannarutta nuannaarutigisinnaavarput nalunnginnatsigu suliniarnerput soqutaasoq Naalakkamilu asuliinnaassanngitsoq. — 1 Kor. 15:58. (kmD 5/96 Har du for travlt?)