Inuunerit Jehovamik pallorfiginninnermik tunngaveqartiguk
1 Jesusip tusarnaartini illuliortunut assigiinngitsunut marlunnut assersuussimavai. Ataatsip Kristus naalallugu qaarsumi illuliorpoq taamaalilluni akerliusunut atugarliuutinullu attassinnaalluni. Aappaa, namminissarsiorluni tusarumananilu sioqqani illuliortoq, perlussiulerami napasinnaanngilaq. (Mat. 7:24-27) Pissutsit aaqqissuussaanerata matuma naangajalernerata nalaani inuuvugut akerlilersorneqaqaagullu. Killingusaami annikilliornartup nuiai taartuinnaat katersuutipallapput. Naggatissap tunngaanut nikallujuilluta uppernerput attatiinnarsinnaavarput? (Mat. 24:3, 13, 21) Maannakkut qanoq inuunerluta apeqqutaavoq. Taamaattumik immitsinnut ima aperissalluta pingaaruteqarpoq: ’Kristumiutut inooriaasera Guutimut kiffartornermi tunngaveqarluarpa?’
2 Jehovamut pallorfiginninnermi inuunerup tunngaveqartinnera qanoq nassataqarpa? Tamanna isumaqarpoq inuunitsinni Jehova qitiutissagipput aammalu Guutip naalagaaffia pingaarnerpaatut eqqarsaatitsinniitittassagipput. Taamaaliorneq tassaavoq ulluinnarni sutigut tamatigut Guutimut naalanneq. Taamaaliussagutta uummatikkut iluunngarluta nammineq atuaqqissaartarneq, ilaqutariittut atuaqqisaartarneq, ilagiit Biibilimik atuaqqissaartarnerat oqaluussinerlu aalluttariaqarpavut inuunitsinnilu salliutillugit. (Nal. oq. 12:13; Mat. 6:33) Naalanneq taamaattoq uppernermik aalajaalluinnartumik kinguneqassaaq, akerlilersorneqarnermut sumuluunniit nalaassinnaasatsinnut aniguisitsisinnaasoq.
3 Nuannaarnaqaaq takullugu millionilikkuutaat inuunertik siunissamullu neriuutertik Guutimik pallorfiginninnermi tatiginnillutik tunngaveqartikkaat, soorlu Jesus aamma taamaaliorsimasoq. (Juá. 4:34) Teokratiimut tunngasunut aalajangersimasumik pilersaaruteqartarput, pilluaqqusaangaarnerillu kingunerisarpai. Anaanaq marlunnik ernilik oqaluttuarpoq uinilu qanoq ilillutik meeqqatik Jehovamut kiffartornissaannut perorsarsimallugit: „Inuunerput sallusuissummik imaqarluartissimavarput — ataatsimeersuarnerit tamaasa najuuffigisarpavut, ataatsimiigiarnissatsinnut piareersartarpugut peqataaffigisarlugillu akuttoqatigiissumillu oqaluussisarluta.“ Oqaasii uiata nangippai: „Sallusuissut inuunitsinnut ilaaginnanngilaq, inuuneraarput. Sinneri tamarmik pingaannginnerupput.“ Ilissi ilaqutariittut Jehovamut kiffartorneq salliutippisiuk?
4 Sapaatip-akunneranut malilluarneqarsinnaasumik pilersaarusiorit: Jehovap peqatigiissortaasa anersaakkut ajunngitsumik ileqquliutassatsinnik ikiortarpaatigut, sapaatip-akunneranut ataatsimiinnerit tallimat aqqissorneratigut. Kristumiut inuunertik Jehovamut pallorfiginninnermut tungaveqartippaat sammisassat ilagiinnut tunngasuunngitsut ilaqutariinnullu tunngasut aaqqissortarpaat ataatsimiinnerit tamakku tamaasa pingaartut peqataaffigisinnaanngorlugit. Allat pingaannginnerusut ataatsimiigiartuarnissaminnut ajoqutigineq ajorpaat. — Fil. 1:10; Epr. 10:25.
5 Kristumiut inersimalluartut paasisimalluarpaat ullup ingerlanerani akuttoqatigiissumik nerisarnerup pingaaruteqarneratulli, nammineq atuaqqissaartarnerup ilaqutariittullu atuaqqissaaqatigiittarnerup, ataatsimiinnernut piareersartarneq ilanngullugu, pingaaruteqarnerat. (Mat. 4:4) Ullormut minutsit 15-20-t nammineq atuaqqissaartarnissannut immikkoortissinnaavigit? Tamanna iluatsissappat piffissaq immikkortissimasaq allanut atorneqassanngilaq. Ileqqorillualeruk. Immaqa ullaakkut makiaarnerusalersinnaavutit. Nunarsuaq tamakkerlugu Betelini ilaqutariinnut ilaasortat 17.000-iusut ullaakkut makiaartarput ullormut allassimaffik oqaluuseriniarlugu. Ullaakkut makiaarniaraanni soorunami innajaartariaqarpoq aqaguani qasuersimaniarluni.
6 Ilaqutariinnut qullersaaguit ilaqutariit teokratiimut tunngasunik sammisassaasa pilersaarusiornissaat aaqqissornissaallu siulliullutit iliuuseqarfigisariaqarpatit. Ilaqutariit ilaat Biibilimik, atuakkamik ukiumoortumik atuagassialluunniit arlaannik unnukkut nerereernermi kingorna qasuersaajutigalutik atuaqatigiittarput. Angajoqqaat amerlasuut meeraat perorsimasut anersaakkullu ilisimasaqarluarlutik kristumiunngorsimasut, oqarput iluaqutaasimasut ilagigaat sapaatip-akunneranut unnuk ataaseq ilaqutariittut anersaamut tunngasunik sammisaqaqatigiittarsimanertik. Ataataq oqarpoq: „Meeqqatta anersaakkut ingerlalluarnerannut pissutaavoq ukiuni 30-ni pingasunngornerit unnui tamaasa ilaqutariittut aalajangersimasumik atuaqqissaaqatigiittarsimanerput.“ Meerai pingasut tamarmik inuusuttuullutik kuisissimapput, kingusinnerusukkullu tamarmik piffissaq tamaat kiffartortunngorlutik. Ilaqutariittut atuaqqissaaqatigiinnermut ilanngullugu ataatsimiinnerni saqqummiussassat saqqummiusseriaatsilluunniit oqaluussinermi atugassat sungiusarneqarsinnaapput ineriartornartumilluunniit sammisaqartarluni.
7 Sapaatit-akunneri tamaasa oqaluussinissamut peqataasinnaaniarlutit ’pisinnaaffiusut asiutinnaveersaarpigit’? (Kul. 4:5) Amerlanersavut ilaqutariinni ilagiinnilu suliassanik assigiinngitsunik ulapputeqarlutik inuupput. Sapaatit-akunneri tamaasa oqaluussinermut ilinniartitsinermullu peqataanissatsinnut piffissamik aalajangersimasumik immikkoortitsinngikkutta, pisassat allat suliassaq tamanna pingaaruteqartoq inangersinnaavaat. Nersutaateqarfimmik angisuumik piginnittoq oqarsimavoq: „1944-p missaani paasilerpara ulloq aalajangersimasoq oqaluussinermut immikkoortikkukku aatsaat oqaluusseqataasinnaallunga. Suli sapaatip-akunneranut ulloq ataaseq oqaluussinermut peqataaniarlunga sulinngiffigisarpara.“ Kristumiup utoqqaanertap paasisimavaa oqaluussinermut aalajangersimasumik pilersaaruteqarami qaammammut agguaqatigiisillugu nalunaaquttap-akunneri 15-it oqaluussinermut atorsinnaallugit. Arfininngornikkut sulisussaagaangami pilersaarutigisarpaa ullaap-tungaani oqaluussereernermi kingorna suliartornissani. Illit ilaquttatillu sapaatip-akunneranut minnerpaamik ulloq ataaseq tamanut oqaluussinermut immikkoortissinnaavisiuk anersaakkullu inuunissinnut ilaliutivillugu? — Fil. 3:16.
8 Piffissaq sumut atornerlugu misissoqqissaaruk: Inuunitta Jehovamik pallorfiginninnermik tunngaveqartinniarnerani akornusersorteqarpugut. Atuaqqissaartarnermut, ataatsimiigiartarnermut oqaluussisarnermullu pilersaarusioqqissaarnerigaluavut naatsorsuutiginngisanit ajoquserneqarsinnaapput. Akerlilersortittalu, Satanip, suna tamaat atorlugu ’akornusersortuassavaatigut’ pilersaarusiavullu ajortisaarlugit. (1 Tás. 2:18; Evf. 6:12, 13) Akornusertinnerit taamaattut nikallussutigeqinagit, nakkaannassutigalugit. Teokratiimut tunngasunik sammisassat pilersaarutigisimasat naammassiniarlugit pisariaqartunik allannguigit. Aalajangersinnaassuseqarneq uniinnajanngissuserlu pisariaqarput pingaarutillit naammassissagaanni.
9 Silamiut sunniisinnaaneri naammalluinnanngissutsittalu anersaamut tunnganngitsunut piffissatsinnik soqutigisannillu tigusisinnaasut akueriinnassanngilavut. Imminut misissornissaq pisariaqarpoq. Assersuutigalugu imminut ima aperisinnaavugut: ’Inooriaatsima takutippaa oqimaaqatigiissariunnaalersunga allanulluunniit sangusuulersunga? Silarsuarmiittut nunguttussat ulapputigiartuinnarpakka? (1 Juá. 2:15-17) Piffissaq qanoq annertutigisoq namminermut tunngasunut, angalanernut, timersornermut imaluunniit sukisaarsaarutinut allanut atortarpara — TV-mik isiginnaarneq Internetimillu sammisaqarnerit ilanngullugit — piffissamut anersaamut tunngasunut atortakkannut sanilliullugu?’
10 Qanoq iliortoqarsinnaava inooriaaseq pisariaqanngitsunik imaqarpallaalersimappat? Paulusip qinnutigisimavaa qatanngutini ’naammattunngoqqullugit’, soormi Jehova qinnuigigukku ikioqqullutit tassunga kiffartornerit inuuninni pingaarneruteqqikkusullugu? (2 Kor. 13:9, 11) Tamatuma kingorna aalajangiusimaguk tamanna naammassiniarlugu, pisariaqartumillu allannguillutit. (1 Kor. 9:26, 27) Jehovap ikiussavaatit naalallugu kiffartuunnerani saamimmut talerpimmulluunniit sangunnginnissannut. — Naleqqiuguk Jesaja 30:20, 21.
11 Jehovamut kiffartornermi nuannaarnartumi ulapputeqartuarit: Inuit millionilikkuutaat pilluarneq nassaarerusoqaat, utoqqaliartortillutilli paasisarpaat nunap piisigut anguniagarisimasamik ataavartumik pillualersinngikkaatik. „Anorip tiguniarsarineratut pissarsiviunngitsigipput.“ (Nal. oq. 2:11) Jehovali qitiutikkutsigu, ’takkunnitsinniitittuaannarlugu’, nalerisimaarnermik misigisaqassaagut. (Tus. 16:8, 11) Taamaassaaq pissutigalugu Jehova piunitsinnut aallaaviummat. (sar. 4:11) Taannaqanngippat inuuneq siunertaqassanngikkaluarpoq. Jehovamut kiffartornitsinni inuunerput siunertaqarlualertarpoq uagutsinnut allanullu naassaanngitsumik iluaqutaasumik.
12 Imminut naammagisimaannginnissarput Satanillu silarsuaata naggatissaata qanillinerata ilungersunartuunerata misigiunnaannginnissaa pingaaruteqarput. Inooriaasitta siunissamut isiginnittaaserput ersersippaa. Noap nalaani inuit, nunarsuaq tamakkerlugu ulersuaqarumaarneranik uppinngitsut, ’paasisimanngillat’ inuttulli sammissat — nerineq, imerneq aappartaarnerlu ulapputigisimavaat — ulersuarmit ’nungutinneqarnerat’ tikillugu. (Mat. 24:37-39) Ullumikkut silarsuarmi matumani ulapputeqartut, piuneerussaanermi inuit takusimasaannit annerungaartumi, tassa ’Jehovap ulluani’, siunissamut isumalluutitik sequtserneqartut takujumaarpaat. — 2 Pît. 3:10-12.
13 Taamaattumik inuunerit Jehova Guutimik uumasumik pallorfiginninnermik tunngaveqartittuaruk. Inuunermi upalungaarsaatit Jehovap qulakkeerineratut tatiginartigisoqanngilaq. Sallusinnaanngilaq — neriorsuutini eqqortissavai. (Tít. 1:2) Toqusinnaanngilaq — taassumunnga tunniussat maangaannassanngillat. (Hab. 1:12; 2 Tim. 1:12) Maannakkut inuunerput naalannermi uppernermilu tunngaveqartitarput Guutitsinnut pilluartumut nuannaarluta naassaanngitsumik kiffartornissatsinnut aallarniutaaginnarpoq. — 1 Tim. 1:11; 6:19.
[Qupp. 3-mi issuagaq]
„Sallusuissut inuunitsinnut ilaaginnanngilaq, inuuneraarput. Sinneri tamarmik pingaannginnerupput.“