Piffissaalluartumik pisisa
1 Ulapputeqaqaagut Jehovamut kiffartornitsinni suliassarpassuaqaratta. (1 Kor. 15:58) Nammineq ilaqutariittullu atuaqqissaarnerup, Biibilimik ullut tamaasa atuartarnerup, ataatsimiinnernut piareersartarnerup ataatsimiigiartarnerullu, aalajangersimasumillu oqaluussiartortarnerup pisariaqassusiat nalunngilarput. Nakkutilliisut paarsisutut akisussaaffeqarput ilagiinnilu suliassanik allanik isumaginnittarlutik. Ilaat ilaquttaminnut pisussaaffeqarput imaluunniit allanut assigiinngitsunik pisussaaffeqarlutik. Tamakku tamaasa ajunngitsumik naammassisinnaassagaanni oqimaaqatigiissumik aaqqissuulluakkamillu iliuuseqarnissaq pisariaqarpoq.
2 Tulleriiaarigit: ’Piffissaalluartumik pisisinnaassagaanni’ naliliisinnaassuseqarluartariaqarpoq. (Evf. 5:15, 16, NV) Suut ’pingaarnerusunut’ ilaanersut paasiniartariaqarparput tulleriiaarinitsinnilu siullinngortillugit. (Fil. 1:10) Aappariit angerlarsimaffitsik teokratiimik pingaartitsiffiusoq ima oqaatigisimavaat: „Inuunerput sallusuissummik immertarparput . . . Sallusuissut tassaanngilaq inuunitta ilaa, tassaavorli inuunerput. Allat tamaasa tamanna naapertorlugu aaqqissuuttarpavut.“ Jehovamik pallorfiginninnerup taassumunngalu kiffartornerup inuunermi salliutinnissaa pisariaqartorujussuuvoq.
3 Piffissaajaataasut piiakkit: Sapaatip-akunneranut nalunaaquttap-akunneri 168-iupput, piffissarpullu silatuumik atortariaqarparput. Teokratiimut tunngasunut naammattumik piffissaqarumalluta piffissaajaataasut killilersortariaqarpavut. Misissuinermi takutinneqarpoq Amerikamiup inersimasup sapaatip-akunneranut agguaqatigiissillugu nalunaaquttap-akunneri 30-t tv-mik isiginnaarnermut atortarai. Allat piffissaq annertooq atuagassianik silamiorpaluttunik atuarnermut atortarpaat. Ilaasa immaqa piffissaq sivisuallaartoq qarasaasialerinermut imaluunniit ikinngusersornermut, soqutigisanut aliikkutassanullu atortarpaat. Ulluinnarni sammisartakkavut isumaliutigeqqissaartariaqarpavut paasiniarlugu qanoq piffissaq pitsaanerusumik atorsinnaanerlugu. Piffissamik pingaaruteqanngitsunut atuivallaarneq killilersimaassagutsigu silatusaassaagut.
4 Ileqqut pitsaasut ineriartortikkit: Pissutsit atukkavut qanorluunniit ikkaluarpata qularnanngitsumik tamatta anersaakkut sammisassanut piffissarsisinnaavugut. Ilaat ullut tamaasa makiaartarput taamaalillutillu naammassasisaqarnerusarlutik. Suliffipput ungasippat imaluunniit sivisuumik utaqqisarutta, piffissaq Biibilimi atuarnermut, ataatsimiinnissamut piareersarnermut imaluunniit Peqatigiiffiup immiussaataanik tusarnaarnermut atorsinnaavarput. Ilaqutariit aalajangersimasumik atuaqqissaartarfeqarnertik assut iluaqutigissavaat. Ilaqutariit tamarmik atuaqqissaarnissamut piffissaq eqqorlugu takkuttarpata pisariaqanngitsumik utaqqinissaagaluaq pinngitsoorneqartassaaq.
5 Ullut tamaasa piffissap sinneruttup sivikissusia eqqumaffiginerujartortariaqarparput. (1 Kor. 7:29) Piffissamik sinneruttumik erlinnaqisumik qanoq atuinerput inuunitsinnut aalajangiisuuvoq. Guutip naalagaaffiata soqutigisaanik salliutitsisinnaajumalluta ’piffissaalluartumik pisigutta’ pilluaqqusaassaagut! — Mat. 6:33.