Soraarata nutaarsiassaq nuannersoq oqaluussissutigaarput
1 Kristumiut siulliit kiffartuussinertik ilumoorulluarsimavaat. Lukas ima oqaluttuarpoq: ’Soraanngillallu ullut tamaasa naalaffimmi illunilu ajoqersuillutik iivanngiiliulu Jesus Kristusimik oqaluutigalugu.’ (ap. sul. 5:42) Suulluunniit, malersugaanerulluunniit, uteriartissinnaasimanngilaat. (ap. sul. 8:4) Ullut tamaasa allanut sallusuissut oqaluttuariuarpaat.
2 Uagummi? Imminut apereriarit: ’Suliassap nukinginnassusianik paasisaqarluarpunga? Soraarnanga nutaarsiassap nuannersup oqaluussissutiginissaanut piumassuseqarpunga?’
3 Nalitsinni soraaratik oqaluussissutiginninnermi maligassat: Qatanngut arnaq nukillaarnermik eqqorneqarsimasoq inuunermi sinnerani anersaartuussuarmiittariaqarpoq. Naalagaaffilersaartarfimmukarsinnaanngilaq ataatsimeersuariarsinnaananiluunniit. Nutaarsiassamilli nuannersumik oqaluussissutiginninnissaminut piumassuseqarluarpoq. Ukiuni 37-ini anersaartuussuarmi inooreerluni, inuit soqutiginnittut 17-it sallusuissummik ajoqersorsimavai. Qanormi iliortarsimava? Matumiit matumut angalaarsinnaanngilaq, ullulli tamaasa periarfissamik nassaartarpoq attaveqarfigisani sukkulluunniit nalunaajaaffigiumallugit.
4 Qatanngutivut Bosnienimiittut sorsunneq naalliunnerillu qasusuillutik atortariaqartarsimavaat. Taamaakkaluartoq akuttunngitsumik allanut oqaluussissutiginnittuarput. Sarajevomi oqaluussisartut agguaqatigiisillugu qaammammut nalunaaquttap akunneri 20-it oqaluussiartornermut atortarpaat allat nutaarsiassamik nuannersumik oqaluttuullugit, agguaqatigiisillugulu tamarmik marlunnik atuaqqissaaqateqartarlutik. Naak pissutsit atugaat ajornakusoornaraluartut soraaratik oqaluussiuartarput ajoqersuillutillu.
5 Meeqqattaaq kiffartuussinermi aallussilluartuupput. Rwandami ilaqutariit Jehovamut nalunaajaasut inimi sakkutuut ilaannit toqukkumallugit piareersimasunit unguneqarsimapput. Ilaqutariit qinoqqaarsinnaanerlutik aperipput. Akuerineqarput, meerarlu paniat, Deborah, nipituumik qinuvoq: „Jehova, sapaatip-akunnera una ataatagalu atuagassianik tallimanik agguaassisimavugut. Qanoq ililluta inunnut taakkununnga pulaaqqissinnaavugut sallusuissummillu ajoqersorlugit inuunermillu naassaanngitsumik pisinnaaqqullugit?“ Upperluarnera kiffartuussinermullu asanninnera pissutigalugit tamarmik annapput.
6 Ullumikkut allanut oqaluussiumalluta periarfissarsiortuartariaqarpugut, taamaalilluta ’inuunermut naassaanngitsumut eqqortumik isumallit’ naassaariniassagatsigik. (ap. sul. 13:48) Sumiiffimmi pissutsit apeqqutaatillugit ilagiinni utoqqaanertat piffissani tulluartuni oqaluussiartoqatigiinnissanik aaqqissuisinnaapput, ullaap tungaaniusinnaavoq, ualikkut unnukkulluunniit. Naalagaaffimmik Kiffartuussineq-mi kiffartuussinermillu ataatsimiinnermi ataatsimeersuarnernillu kiffartuusseriaatsinut assigiinngitsunut kajumissaarneqartarpugut. Aammattaaq nakkutilliisut angalasartut oqaluussisartut aqqusinermi angalaartarnissaannik ajoqersortarpaat; takutittarpaat qanoq niuerniartarfinni oqaluussisinnaaneq, ajoqersorlutalu inunnut sumiluunniit naapitatsinnut nalunaajaasarnissatsinnik. Tamakkorpassuit takutittarpaat nutaarsiassamik nuannersumik soraarata oqaluussissutiginninnitsinnik.
7 Jesusip apustilii toqqaannartumik ima oqarput: ’Takusavut tusakkavullu oqaatiginnginneq saperpavut’. Qanoq qasusuissinnaappat naak malersorneqaraluarlutik? Ikioqqullutik Jehova qinnuigaat, taamaaliorporlu tamarmillu ’anersaamik illernartumik ilumioqangaalerput, Guutillu oqaasia siooranatik oqaluutigaat’. (ap. sul. 4:20, 29, 31) Ilimananngikkaluarpoq tamatta oqaluussinermi tupinnartumik misigisaqassasugut, kisianni soraarata nutaarsiassap nuannersup oqaluussissutiginissaanut kissaateqarutta, ullullu tamaasa taamaaliornissatsinnik ilungersorutta Jehovap ikiorumaarpaatigut. (kmD 8/96 Vi forkynder den gode nyhed uden ophør)