Apeqquteqartarfik

◼ Sooq qaammatit tamaasa piffissaq eqqorlugu kiffartuussinerput nalunaarusiortariaqarparput?

Naalagaaffimmik tusarliussamik oqaluussisimanermit tusakkavut nuannersut tamaasa nuannaarutigisarpavut. (Takuuk Ussatit 25:25.) apustilit suliait 2:41-mi paasivarput ’tarnit pingasunik tuusintillit missigisaat ilanngutitaasut’ Peterip Piinsip ulluani qiimmaallannartumik oqaluugiareernerata kingorna. Kinguninngua amerleqqipput ’tallimanik tuusintinik missiliulerlugit’. (ap. sul. 4:4) Nalunaarusiat taakkua kristumiunut ukiuni hundredelinni siullerni inuusunut qiimmassaataasimassaqaat. Taamatuttaaq uagut qiimmassarneqartarpugut nalunaarusiat tusaraangatsigik. Nunani allani qatanngutit nutaarsiassamik nuannersumik oqaluussissutiginninnerat siuariartortoq tusarlugu nuannaarutigisaqaarput.

Nalunaarusiat tamakkua katersornissaat piffissamik nukinnillu atuiffiusorujussuuvoq taamaattumik oqaluussisartut ataasiakkaat tamarmik ikiuunnissaat pingaaruteqarpoq. Qaammatit tamaasa piffissaq eqqorlugu nalunaarusiat tunniuttarpiuk?

Amerliartorneq pillugu nalunaarusiat uatsinnut nuannaarutaasorujussuupput. Aammattaaq nalunaarusiat Peqatigiiffiup silarsuarmi tamarmi siuariartornerup nalilernerani iluaqutigisarpai. Aalajangiisoqartariaqarpoq sumi ikiorneqarnissamik pisariaqartitsiffiusoqarnersoq, imaluunniit atuagassiat atuakkallu sorliit qassillu naqiterneqassanersut. Ilagiinni tamani utoqqaanertat nalunaarusiat atortarpaat paasiniarniarlugu sumi siumukariartoqarsinnaanersoq. Nalunaarusiat pitsaasut ineriartornartuupput; tamatta inuttut ataasiakkaatut kiffartuussinitta qanoq pitsaanerulersissinnaaneranik misissuinissatsinnut kajumilersittarpaatigut.

Oqaluussisartut tamarmik paasisariaqarpaat immikkut akisussaaffigalugu nalunaarusiamik qaammatit tamaasa piffissaq eqqorlugu tunniussisarnissartik. Atuakkamik atuaqqissaarnermi aqutsisuusut oqaluussisartut akisussaaffimmik tamatuminnga eqqaasinnissaannik periarfissaqarluarput, aammattaaq qaammatit tamaasa oqaluussiartornermut peqataarpiarsinnaanngitsunut ikiuinissaminnut eqqumaffiginnittaramik. Qaammatip naangajalernerani atuakkamik atuaqqissaarnermi eqqaasissutigineqartarsinnaavoq imaluunniit piffissami allami naleqquttumi. Naalagaaffilersaartarfimmi nalunaarusiat tunniunneqarsinnaanngikkaangata atuakkamik atuaqqissaarnermi aqutsisuusup ataatsimut katersorsinnaavai piffissaalluartukkullu allatsimut tunniullugit taamaalilluni ilagiit qaammammut nalunaarusiaannut Peqatigiiffimmut ilaaniassammata.

Aalajaalluta qaammatit tamaasa nalunaarusiornissarput eqqumaffigigutsigu, anersaakkut ilorrisimaarnissatsinnut akisussaasunut oqinnerulersitsissaaq.