Apeqquteqartarfik

◼ Oqaluussiartornermi arnaagaanni angummik angutaagaanniluunniit arnamik naapitaqaraangatta qanoq piareersimasariaqarpugut?

Qularutissaanngilaq qatanngutit angutit arnallu ileqqussanik qutsissunik malinnikkumasut. Aammattaaq silarsuarmi mingussimasumi ileqqussatigut ikitsuinnarnik killeqartumi inuuvugut. Naak pitsaanerpaamik siunertarisaqaraluarluta ilagiit kanngunarsaatigisinnaasaanik pissutsikkut assuarnartuliornissaq pinngitsoortinniarlugu eqqumaniartuartariaqarpugut. Tassa imaappoq oqaluussiartornermi mianersortariaqarpugut.

Oqaluussiartornermi arnaagutta angummik angutaaguttalu arnamik ilumoorlutik sallusuissummut soqutiginnippasissunik naapitaqakulasarpugut. Kisimiilluta pulaassagutta allanillu angerlasimasoqanngippat pitsaanerukkajunnerusarpoq isernani matumi nalunaajaaffigisarnissaat. Soqutiginninnermik ersersitsisoqarpat oqaluussisartumik allamik ilaqarluni aggeqqinnissaq isumaqatigiissutigineqarsinnaavoq imaluunniit illumi allanik angerlarsimasoqalerpat. Tamanna pisinnaanngippat pulaagaq oqaluussisartumut anguteqataanut arnaqataanulluunniit pulaarneqarnissaanut isumagitinnissaa silatusaarnerussaaq. Tamanna aamma atuuppoq arnaagaanni angummik angutaagaannilu arnamik Biibilimik atuaqqissaaqateqarneq. — Mat. 10:16.

Oqaluussiartornermi aamma angalaaqatigisassarsioraangatta eqqarsarluartariaqarpugut. Oqaluussisartut immaqa ilaannikkooriarlutik arnaq angummik angullu arnamik angalaaqatigiittarsinnaapput, tamannali ataatsimoorluni gruppini nalunaajaaqatigiinnermi pitsaanerusarpoq. Silatusaarnerussaaq arnaaguni angullu angutaagunilu arnarlu, aappariinngikkaanni, kisimeeqatigiilluni piffissaq atorneqanngippat, tamannattaaq oqaluussiartornermi atuuppoq. Taamaattumik qatanngut angut oqaluussiartornermut akisussaaffeqartup oqaluussisartut suleqatigiinnissaannik, aammalu inuusuttuaqqanik, qinnuiginnikkaangami siuneqassuseqarluarnermik takutitsisariaqarpoq.

Siuneqassuseqarluarneq tamatigut atortarutsigu ’kimulluunniit naakkiussutiginaveersaarluta’ pissaagut. — 2 Kor. 6:3.