Pingaaruteqarnerusut inuuninni salliutikkit
1 Qanoq ililluta anersaakkut peqqissuserput atatissinnaavarput? Nammineq atuaqqissaartarneq, ataatsimiigiartarneq, qinujuartarneq, ineriartornartumik katerisimaaqataaneq oqaluusseqataasarnerlu tamarmik pisariaqavipput. Pingaaruteqarnerusut tamakku inuunitsinni salliutinngikkutsigik anersaakkut peqqittuarsinnaanngilagut.
2 Tamattali uinngup pilerigisaanut akiuuttariaqarpugut, tamattalu perorsaatissinneqartariaqarluta. (Gal. 5:17) Isumaqartariaqanngilagut namminissarsiorluta nammineq soqutigisavut ulapputigalugit pitsaanerusumik inuuneqalersinnaalluta. (Jer. 17:9) Uummaterput illersussagutsigu tammartitaassanngikkuttalu akulikitsumik imminut misissortariaqarpugut. — Uss. 4:23; 2 Kor. 13:5.
3 Uummatit misissortaruk: Taamaaliorsinnaavutit imminut ima aperalutit: Guutip oqaasia atuarusuppara? (1 Pît. 2:2) Ataatsimiinnerit tamaasa najuuffigisarnissaasa pingaaruteqassusia akueraara? (Epr. 10:24, 25) Kipisuitsumik qinusarpunga? (Rûm. 12:12) Inuit anersaakkut ittunik pingaartitsisut ilagisarpakka? (Rûm. 1:11, 12) Nutaarsiassamik nuannersumik oqaluussinermik akisussaaffeqartutut misiginerpunga? (1 Kor. 9:16) Apeqqutit tamakku angersinnaagukkit ersarippoq pingaaruteqarnerusut inuunermi salliutikkusukkitit.
4 Ulluinnarni ileqqutit misissukkit: Uummativit kissaatigisai misissoreerlugit aalajangertariaqarputit piffissat sunut atorusullugu. Aalajangersimasumik Biibilimik aammalu atuagassianik Napasuliaq Alapernaarsuiffik-mik Iteritsi!-millu atuartarneq ataatsimiinnernullu piareersartarneq piffissaqarfigisaqariaqarpavut. Ilaqutariittut atuaqqissaaqatigiinneq qinoqatigiinnerlu aamma piffissaqarfigisariaqarpavut. Siumut aalajangerniarit tv-mut computerimullu piffissaq qanoq annertutigisoq atorumanerlugu. Ilagiit ataatsimiinneri tamaasa najuuffigiuassallugit aalajangerit, tamannalu najoqqutaralugu allat tamaasa pilersaarutiginiakkit. Ilaqutariit tamarmik sapaatit-akunneri tamaasa oqaluusseqataasarnissaannik pilersaarusiorit.
5 Pingaaruteqarnerusut inuunermi salliutinneqaraangata pinngitsoornani nuannaarnermik kinguneqartarpoq.