Biibilimik atuaqqissaaqatigiinnerit ajoqersukkanik nutaanik kingunillit
1 ’Kuisissallunga sumik akornuteqarnerpunga?’ kunngip kiffarsua Etiopiamiu taama aperivoq Filipip ’iivangkiiliu Jesusimik taassumunnga oqaluutigimmagu’. (ap. sul. 8:27-39) Kunngip kiffarsuata Guutip oqaasia isumassarsiarititaasoq nuannarereersimavaa, Filipimillu anersaakkut ikiorneqarami ajoqersuganngornissaminut piareerpoq. Inuilli tamakkeratik isumaqarput Biibili misissortariaqarlugu.
2 Qujamasuppugut Jehovap peqatigiissortaasa atuagassiaaraq nutaaq Inunnut tamanut atuagaq saqqummersimmagu. Tamatuma kajumissaarpaatigut Biibilip ullutsinni uatsinnut oqaaserisai misissoqqullugit. Inuit peqqusersuitsut ilinniarluarsimasut Biibilimilli ilisimasaqarpallaanngitsut atuagassiaaqqami paasissutissat kajungerissavaat. Atuagassiaaraq pitsaasoq tamanna suliarineqarsimavoq inuit kissaateqalersinniarlugit Biibilimik misissuinissaannut.
3 Biibilimik atuaqqissaaqateqaleraangatta iluaqutaassaqaaq Naalagaaffimmut Kiffartorneq-mi juuni 1996-imoortumi tapiliussami siunnersuutit pitsaasut uteqqikkutsigik paasiniarlugu qanoq ililluta atuagaq ’Ilisarsineq’ atorlugu siuariartortumik atuaqqissaaqateqarsinnaalluta. Atuaqqissaaqatigiitsilluta malugisariaqarparput ilinniartoq sutigut siumukarnersoq, taamaalilluta aalajangersinnaagatsigu suut samminerusariaqarlugit. Ilinniartoq piareersartarnissaanik allassimaffinnillu qupperaasarnissaanik kajumissaaruk. Nammineq oqaatsini atorlugit akisarnera qularnanngitsumik qamuuna pisumik sallusuissummik pingaartitsineranut ersiutaassaaq. Peqatigiiffiup naqitigaasa allat ilaat atuarunigit ataatsimiigiartarunilu amerlanertigut siumukarnerussaaq. Ilinniartoq kajumissaaruk ilinniarsimasaminik allanut oqaluttuartarnissaanik. Inussiarnersumik paasitiguk qanoq iliortariaqartoq anersaakkut ineriartoqqulluni. Nangaassuteqartuartut atuaqqissaaqatigiuassanngilavut. Ilinniartoq ilikkagaqarnissaminik kissaateqartariaqarpoq, sallusuissummik aalajangiussisariaqarluni tunniulluinnarnissamullu kuisinnissamullu siumukartariaqarluni.
4 Ilaannikkut ilaqutariinniittut immikkut atuaqqissaaqatigineqartarput. Amerlanertigulli pitsaanerussaaq ilaqutariit tamarmik ataatsikkut atuaqqissaaqatigissallugit, tamatuma ilaqutariit anersaakkut ataasiussuseqartissammagit.
5 Jesusip ajoqersuganngortitseqquaatigut. (Mat. 28:19) Taamaaliussagutta Biibilimik atuaqqissaaqatigisavut ikiorneqartariaqarput ima aperisinnaanissaannut: ’Kuisissallunga sumik akornuteqarnerpunga?’