Biibilimik atuaqqissaaqateqarnermut oqimaaqatigiissumik isiginninneq
1 Biibilimik atuaqqissaaqatitaarnissaq Biibilimillu atuaqqissaaqateqarnissaq ullumikkut aatsaat taama pingaartigilersimavoq. Nalunanngilaq silarsuatoqaq manna piffissaarutilersoq. Taamaattumik nutaat anersaakkut siumukapallannissaminnik kristumiutullu inersimasunngornissaminnik ikiorneqartariaqarput. (Epr. 5:13, 14) Tamannali ilutigalugu Biibilimik atuaqqissaaqateqarnermut oqimaaqatigiissumik isiginninnissaq pisariaqarpoq.
2 Nassuerutigisariaqarput ilinniartut ilinniartitsisullu piginnaasaat assut assigiinngissinnaasut. Anersaakkut ineriartorneq arriitsumik sukkasuumilluunniit pisinnaavoq. Ilinniartut ilaat qaammatialunnguit ingerlaneranni siumukarsinnaapput, ilaalli sivisunerusumik. Ilinniagaqarnikkut tunuliaqutarisaq, anersaamut tunngasunik pingaartitsinerup annertussusia Jehovamillu asanninnerup sakkortussusia apeqqutaasinnaapput. Atuaqqissaaqatigisartakkavut tamakkeratik itsaq Beroamiutut ipput. — ap. sul. 17:11, 12.
3 Taamaattumik Naalagaaffimmut Kiffartorneq-mi apriili 1998-imoortumi oqimaaqatigiissumik ima ilitsersuussuteqarpoq: „Ilinniartut siumukarneri tamarmik sukkaqatigiittanngillat. Ilaasa anersaamut tunngasunik sammisaqarneq sungiusimanngilaat, ilaat ilinniakkaminnik paasinnikkumaataartarput. Allallu ulapittuullutik inuupput sapaatit-akunneri tamaasa kapitali naallugu atuarnissaminnut piffissaqaratik. Taamaattumik kapitali naaniarlugu arlaleriartariaqarpoq atuakkallu naanissaanut sapaatit-akunneri 19-init amerlanerusut atortariaqarlutik.“
4 Taamaammat pissutsit ilinniartup atugai poqissusialu naapertorlugit sukkassusissaq aalajangertariaqarpoq. Kajumissaarneqaratta Guutip sumik piumaffigaatigut? atorlugu atuaqqissaaqatitaarniaqqulluta, immaqa aatsaat qaammatit marluk pingasulluunniit qaangiunneranni ’Ilisarsineq’ aallartissinnaassavarput. Naalagaaffimmut Kiffartorneq-mi juuni 1996-imoortumi siunnersuutigineqartut tamaasa atorutsigik qaammatini suli arfinilinni qulingiluaniluunniit ’Ilisarsineq’ atuarsinnaassavarput. ’Ilisarsineq’ atorlugu atuaqqissaaqatitaarsimasut ilaat aalajangersimapput Guutip sumik piumaffigaatigut? atuaqqissaaqatigiissutigeqqaarniarlugu, ilinniartoq Biibilimi sallusuissutinik tunngaviusunik sukkanerusumik ilikkagaqarniassammat, tamatumalu kingorna ’Ilisarsineq’ atuaqqilerlugu. ’Ilisarsineq’ atorlugu atuaqqissaaqateqalersimagaanni, atuaqqissaaqallu siumukarluarpat, pitsaassaaq atuagaq naallugu atuaqqissaaqatigiissutigineqareerpat Guutip sumik piumaffigaatigut? atuaqqissaaqatigiissutigissallugu, taamaalilluni Guutip oqaasiani sallusuissutsinik tunngaviusunik sukkasuumik uteqqiilluni. Sukkasuumik atuaqqissaarneq ilinniartup sallusuissummik ersarissumik paasinninneranut ajoqutaatinneqassanngilaq. Ilinniartoq Guutip oqaasianut uppilernerminut nukittuumik tunngavissaqartariaqarpoq.
5 Atuaqqissaaqatitsinnut oqimaaqatigiissumik ilimasuuteqarutta amerlanerusunik Jesusimut ajoqersuganngortitsiortornikkut ’taassumalu peqqusaanik tamanik maleruaanissaannik ajoqersuinikkut’ nuannaarneq misigissavarput. — Mat. 28:20.