Ajoqersuganngortitsiniarluni suliaq nukinginnarpoq
1 Jesusip nunarsuarmit qimagutsinnani malitsini peqquai ’inunnik inuiannit tamaneersunik ajoqersuganngortitsiortussasut’. Tamatumani pisariaqarpoq ilinniartitsilluni oqaluussillunilu suliamik sukumiisumik aallarniinissaat, nunarsuarmilu inuit najugarisaanni tamarmi suliniarnissaat. — Mat. 28:19, 20, NV; ap. sul. 1:8.
2 Kristumiut siulliit sulinerannik Biibilimi oqaluttuami erserpoq Jesus Kristusip ajoqersuganngortitsiortoqqusinera eqiasuillutik naalassimagaat. (2 Tim. 4:1, 2) Pisussaaffiinnartut isigalugu taamaaliunngillat. Guutip unnersiutiginissaa annannissamillu neriugisap inunnut allanut tusarliunnissaa qamannga pisumik kissaatigaat. — ap. sul. 13:47-49.
3 Ukiuni 1900-kkunni makkunani ajoqersuganngortitsiniarluni aatsaat taama annertutigisumik suliniartoqarpoq. Manna tikillugu inuit millionilikkuutaat nutaarsiassamik nuannersumik ilassinnissimapput. (Lúk. 8:15) Pissutsit aaqqissuussaanerannut matumunnga piffissaq qaangiutilermat ’kiffap ilumoorlunilu silatuup’ atortussanik, inuit peqqusersuitsut piffissap sivikitsuinnaap ingerlanerani sallusuissummik ilinniutigisinnaasaannik, pilersorsimavaatigut. — Matt. 24:45.
4 1995-imi ’Ilisarsineq’ pivarput, 1996-imilu brochuri Guutip sumik piumaffigaatigut? pivarput. Naalagaaffimmut Kiffartorneq-mi juuni 1996-imoortumi anguniagaq manna saqqummiunneqarpoq: „Pissutsit ilinniartullu paasinnittaasia apeqqutaallutik qularnanngitsumik kapitalit amerlanersaat akunnerup ataatsip ingerlanerani naaneqarsinnaapput, atuaqqissaarneq tuaviuutinngikkaluarlugu. Ilinniartoq siumukarluarnerusinnaavoq ilinniartitsisup ilinniartullu sapaatip-akunneranut atuaqqissaartarnissamik isumaqatigiissutertik eqqortittarpassuk.“ Nangilluni allassimavoq: „Ilinniartup atuagaq ’Ilisarsineq’ naallugu atuaqqissaareeraangagu ilumoornera Guutimullu kiffartuussinissamut soqutiginninnera nalilerneqarsinnaassaaq.“ Naalagaaffimmut Kiffartorneq-mi oktobari 1996-imoortumi Apeqquteqartarfik-mi ima nassuiaasoqarpoq: „Naatsorsuutigineqarsinnaavoq oqaluussisartup pikkorissup atuaqqissaaqatini Jehovamut kiffartulerniarluni isumaliutigeqqissaakkamik aalajangersinnaanissaanut naammattumik piffissap sivisuallaanngitsup ingerlanerani ilisimasaqalersissinnaassagaa.“
5 Piffissap imaalinera eqqarsaatigalugu inuit allat sallusuissummik ilinniartinnissaat aatsaat taama nukinginnartigilersimavoq. Suli amerlanerusunik Biibilimik atuaqqissaaqateqalernissatsinnik ikiorneqarnissarput qinnutigiuartariaqarparput. — Mat. 9:37, 38.