Qatanngutit ilisarilersimakkit
1 Biibilimi allaatigineqarpoq ikinngut ilumoortoq qatanngummit ilumoornerusinnaasoq, qanoq ilinikkulluunniit asanninnermik ilumoorfiginninnermillu ersersitsisartoq, annikilliornermilu ikinngummik ikiuisartoq. (Uss. 17:17; 18:24) Ilagiinni asaqatigiikkutta immitsinnullu ilisariniarsarisarutta ikinngutinik taamaattunik amigaateqanngisaannassaagut. — Juá. 13:35.
2 Ataatsimiinnerit siorna kingornalu qatanngutit ilinniarnissaannut periarfissaqarluartarpugut. Soormi ataatsimiinneq sioqqullugu aggiaartarutta, kingorna aniaartarnata peqatigiinnerlu nuannersoq kajumissinartorlu nuannaarutigisarutsigu! Ilagiinni assigiinngitsut utoqqaat, misilittagallit, inuusuttut, ittoortut ilaallu ilanngullugit oqaloqatiginissaat aalajangiuguk.
3 Oqaloqatigiinneq aallarnertaruk: Qatanngutit ilassitsiaannaqinagit. Oqaloqatigiinneq aallarnertaruk immaqa oqaluussinermi misigisamik atuagassianiluunniit nutaani eqqarsaammik soqutiginartumik oqaluttuarnikkut ataatsimiinnerulluunniit aatsaat najuuffigisassi oqaaseqarfigineratigut. Tusarnaarluartuunikkut qanittukkullu misigisimasaannik ilikkarsimasaannilluunniit oqaluttuaqqunerisigut qatanngutit ilikkarluarsinnaavatit. Qanoq ililluni sallusuissut ilikkarsimaneraa aperinerinnaa pissarsiffiulluarsinnaavoq. Immaqa ilaat uppernermut nakussassaataasumik misilinneqarsimapput allalli maannakkorpiaq allanut paasiuminaassinnaasumik atugaqarsinnaapput. Tamanna paasigutsigu ikinngutitut ilumoortutut allat pisariaqartitaat eqqumaffigissavavut kajumillutalu matuniarsaralugit.
4 Ikinngutigiinnerit ineriartortittakkit: Qatanngutip arnap panimminik toqukkut annaasaqarsimasup ataatsimiinnerni Guutip naalagaaffiata erinarsuutaannik, ingammik erinarsuutinik makititaanissamut tunngasunik, erinarsoqataanissani aallaqqaammut ajornakusoortissimavaa. Oqaluttuarpoq: „Ilaanni qatanngutip arnap qiasunga takoriaraminga ornippaanga, eqeriarlungalu erinarsoqatigilerlunga. Qatanngutinnut angutinut arnanullu asanniummeqaanga, nuannaarpungalu ataatsimiigiarsimagatta, takusinnaavarami ikiuutissaq tamaaniittoq, naalagaaffilersaarfimmi.“ Pisariaqaraangat tuppallersaasarnikkut qiimmassaajuarnikkullu qatanngutinut ikinngutaasariaqarpugut. — Epr. 10:24, 25.
5 Silarsuup pisoqqap matuma suli tatinerulersikkiartuinnarpaatigut, taamaattumillu pingaartuuvoq qatanngutit ilikkarneruniarlugit aalajangernissarput. Qiimmassaqatigiinneq piviusoq tamanna qularnanngilluinnartumik tamatsinnut pilluaqqussutaassaaq. — Rûm. 1:11, 12.