Piffissaq atorluaruk — pioneerinngorit!
1 ’Ulapereertigalunga! Pioneeritut aallartinnissara silatusaarnerussava?’ Qatanngut arnaq ataatsimeersuaaraarnermut najuutsilluni utoqqaanertaq pioneeriusoq oqalugiartillugu taama eqqarsarsimavoq. Oqalugiaataa ima qulequtaqarpoq: „Pioneerit unitsitaaneq ajorput.“ Qatanngut angut inuusuttoq aamma tamatumani najuuttoq eqqarsarsimavoq: ’Taanna qanoq ililluni pioneeriunissaminut piffissaqarsinnaava? Uanga utoqqaanertaanngilanga ulapputeqartuaannarpungali.’
2 Qatanngutip utoqqaanertap pioneeritut kiffartornerup pilluaqqussutissartai eqqartorpai. Sumiiffimmi tamaani pioneererpaaluit apersorpai. Oqaluttuarput pioneerinngorusunnerminni qanoq allannguisariaqarsimanerlutik, qanorlu Jehovap naammangaartumik pilluaqqusimaneraatik. Ataaseq innarluuteqartuuvoq, ataaseq uppinngitsumik aappaqarluni, allallu suliffigissaarnini taamaatissimavaa, kisianni aningaasaqarniarnerup tungaatigut artorsinneqarani. Qatanngutip arnap angutillu pioneerit taakkua qanoq ilillutik Jehovap ikiuineratigut iluatsissimanersut tusarnaartillugik, namminneq isumartik periarfissatillu eqqarsaatigaat. Illit taamaaliornissannut aamma kajumissaarumavatsigit, ingammik maannakkut oqaluussisartunut amerlanerusunut pioneeritut kiffartorneq ajornarunnaarmat nalunaaquttap-akunnerisa piumasaqaataasut annikillisinneqarnerat pissutigalugu.
3 Nalunngilarput Jehova pinngortitsisuusoq ajugaqanngitsuullunilu, inuunitsinnillu akiitsoqarfigigipput. (Dan. 4:17; ap. sul. 17:28) Paasisimavarput Jehovap peqatigiissortat ataasiinnaat atorai. Immikkullu pisinnaatitaaffigaarput ilumoorluta peqatigiissortat taakkua ilagalugit kiffartornissarput ’inussiarlu aalajaallunilu silatooq’ Guutip naalagaaffia pillugu nutaarsiassamik nuannersumik oqaluussinermi naggatissap takkutinnginnerani suleqatiginissaa. (Mat. 24:45; 25:40; 1 Pît. 2:9) ’Ulluni kingullerni’ taaneqartuni kingusissumi inuuvugut, paasisimavarpullu oqaluussinermi piffissakitsuararsuulluta. (2 Tim. 3:1) Ilaquttagut pigisatigut isumagisussaavavut, aningaasatigullu isertitat siornatigornit annikinnerusuusaarput. (1 Tim. 5:8) Peqqissuunerput immaqa aamma siornatigutut inngilaq. Soorunami aamma immitsinnut piffissaqarfigerusuppugut pissaqarusullutalu. (Nal. oq. 3:12, 13) Taamaattumik immaqa eqqarsaatigaarput silatusaarnerussanersoq pioneerinngornissamik qaaqqusissut ilassigutsigu.
4 Qanoq atugaqarnerput inuttut ataasiaakkaatut eqqarsaatigeqqissaartariaqarparput aalajangerlugulu pioneerinngorsinnaanerluta. (Rûm. 14:12; Gal. 6:5) Qiimmannaqaaq amerliartortut pioneerinngorusullutik qinnuteqartarmata. Naak ajornartorsiutit naqisimaneqarnerillu ulluni kingullerni inuunitsinni ilisarnaataagaluartut, Atuakkami ukiumoortumi 1999-imoortumi nalunaarusiami ersersinneqarpoq nunarsuaq tamakkerlugu eqiasuillutik pioneeritut kiffartortut 700.000-ingajaasut. Qatanngutit angutit arnallu taakku immaqa aningaasat tungaatigut ajornartorsioraluarlutik imaluunniit sumiiffinni angallannermut aqqutitigut pitsaanngiffiusumi kiffartoraluarlutik, peqqiillioraluarlutik allatigullu ajornartorsiuteqartaraluarlutik, eqqortuliortuaannarput taamaattumillu nersorneqartariaqarlutik. (Gal. 6:9) Jehovap misileqqulluni kajumissaarinera ilassisimavaat. (Mal. 3:10) Misigipput silatusaarnerusoq piffissartik pigisatillu pioneeritut kiffartornermi atorunikkik, aammalu pioneerinngorniarlutik allannguisariaqarnerminnik pioneeriuinnarnissaminnillu Jehovap pilluaqqusimagaatik.
5 Pioneerit pilluaqquneqartarput: Qatanngut arnaq Camerounimeersoq paneeraqartoq oqaluttuarpoq qanoq ililluni pioneeriuinnarsinnaasimalluni: „Panigali inunngormat kiffartorninni ilagiuarsimavara. Pisussinnaanngikkallarmat amaartarpara. Taamaalluta ullaap’tungaa nalunaajaatilluta, nioqquteqarfeerannguami unillatsiarpunga. Paniga atuagassianik pooqattanniit tigusivoq pisuppiarsinnaananilu nioqquteqarfeeqqap tullianukarluni. Oqaluppiarsinnaanngilaq, kisianni arnamik atassuteqalerpoq atuagassianillu takutitsivigalugu. Arnaq tupigusutsappoq niviarsiaraaraq suliamut tamatumunga peqataasinnaammat. Atuagassiat piumavai Biibilimillu atuaqqissaaqatigiinnissamut akuersilluni.“
6 Utoqqaanertaq ataataasorlu Zambiameersoq ikiorti-pioneeriunissamut kajumissaarut malikkusussimavaa. Ulloq tamaat sulisarpoq, kisianni naak ullut tamaasa ulapittaraluaqaluni aallartippoq. Maligassaalluarusuppoq ilagiinnut ilaquttaminullu. Ilaannikkut biilini aqquserngup sinaanut unitseriarlugu båndit Ilaqutariittut pilluarneq isertugaateqarpoq-mit immiussat tusarnaartarsimavai. Sanioqquttut qaaqqusarsimavai tusarnaariaqqullugit. Taamaalilluni Ilaqutariittut pilluarneq isertugaateqarpoq-mik atuakkat 16-it aamma ’Ilisarsineq’-mik atuakkat 13-it agguaassimavai marlunnillu atuaqqissaaqatitaarluni.
7 Nunami sanianiittumi Zimbabwemi aamma pioneeriorusunneq malugineqarsimavoq. 1998-imi apriilimi ilagiit 117-inik oqaluussisartoqartuni 70-it ikiorti-pioneeriusimapput qulingiluallu pioneeriullutik. Ilagiinni allani 94-inik oqaluussisartoqartuni 58-it ikiorti-pioneeriusimapput. Aammalu ilagiinni 126-nik oqaluussisartulinni 58-it ikiorti-pioneeriusimapput pioneerit sisamat tassaniittut tapersersorumallugit. Ukioq kiffartuussiffiusoq kingulleq Zimbabwemiunut qiimmassaataasimaqaaq. Qatanngutit ilaquttaminnut, ilagiinnut immikkoortortaqarfimmillu sanaartornermut atatillugu sammisassaqarsimagaluaqaat, kisianni silatusaarlutik oqaluussinermi peqataanissamut piffissaqarneq eqqumaffigisimavaat.
8 Pioneerit nalunngilaat namminneq nukiminnit pioneerinngorsinnaanatik ingerlatiinnarnissaallu saperlugu. Paasilluinnarpaat naammasisaqarluarunik ’Guutip nakussatsitsinera missiliorlugu pisartoq’. (1 Pît. 4:11) Uppernerisa ullut tamaasa kiffartuussinermi ingerlatittuarpaat. Namminneq iluarisassartik kisiat ujartornagu pioneeriulluartut paasisimavaat nikallujuissagunik ’assoroortariaqarlutik’, aammali pilluaqqussaangaarnermik kinguneqarsinnaasoq. — 1 Tás. 2:2.
9 Paulusip maligassiaa ilaaruk: Biibilip allaatigai apustili Paulusip oqaluussinermini naammassisimasai aammalu allanut annertuumik ikiuisimanera. Paulusitut allamik ulapinnerusoqanngilaq. Ilagiit nakussatsinniarlugit nutaarsiassarlu nuannersoq oqaluussissutiginiarlugu malersugaaneq timikkullu ninniorneq atortariaqarsimavai. Aammattaaq peqqissutsikkut annertuumik akiugassaqartariaqarsimavoq. (2 Kor. 11:21-29; 12:7-10) Aalajangiusimavaa piffissaq silatusaartumik atorusullugu, nalusimanngilaalu naammassisani tamaasa Jehovap ikiuineratigut pisimasut. (Fil. 4:13) Kinaluunniit Paulusip ikiorsimasaa pissutissaqanngilaq eqqarsassalluni Paulusip piffissani assoruunninilu Jehovamut kiffartornermini asuliinnaq atorsimagai imaluunniit ajunnginnerusumik atorsinnaasimagai. Allaat ullumikkut uagut inuusugut piffissaq Paulusip atorluarsimasaa iluaqutigaarput. Qujamasuutigaavut ulluni makkunani ajornartuni isumassarsisitaalluni ilitsersuutai eqqortumik aaqqissuussinissatsinnut sallusuissummillu aalajangiussinissatsinnut.
10 ’Ullussat sivikipput’. Oqaluussinermut tunngatillugu oqaatsit taakku aatsaat taama naleqqutsigipput. (1 Kor. 7:29; Mat. 24:14) Taamaattumik naleqquppoq imminut ima aperissalluni: ’Sumilluunniit pissuteqartumik aqagu toqussagaluaruma ullumi Jehovamut oqarsinnaanerpunga piffissaq silatusaartumik atorsimallugu?’ (Jâk. 4:14) Soormi maannakkut Jehova qinunikkut saaffigigukku neriorsoqqissaarlugulu taassumunnga nalunaajaasuuninni piffissat silatusaarlutit atorusullugu? (Tus. 90:12) Jehovamut ikioqqullutit qinugit inuunerpit pisariinnerulernissaanut. Immaqa siornatigut paasisimagaluarlugu pioneeriunissannut periarfissaqarnak, maannakkut periarfissaqalersimavit?
11 Periarfissatit atorluakkit: Soorunami pissutsit atukkat pissutigalugit pioneeriunissamut kissaatillit tamarmik qaammammut nalunaaquttap-akunneri 70-it immikkoortissinnaanngilaat. Oqaluussisartulli amerlasuut pilersaaruteqarput qaammammut nalunaaquttap-akunneri 50-it qaammatit tamaasa ikiorti-pioneeritut periarfissaqarnerilluunniiit tamaasa atorusullugit. Maannakkut ikiorti-pioneeriunissannut imaluunniit pioneeriunissannut periarfissaqanngikkuit nikallussutigeqinagu. Qinnutigiuaruk pissutsit atukkavit allanngornissaat. Periarfissamillu takkuttoqanngippat tuppallersaatigisinnaavat uummammit pisumik kiffartornerit Jehovap iluarimmagu. (Mat. 13:23) Maluginiartarpaa aalajaallutit illersortuarit oqaluussisartutullu aalajaatsutut ilungersuussillutit qaammatit tamaasa nalunaajaanissamut periarfissat atorluartaritit. Immaqa oqaluussisartutut piginnaanitit pitsanngorsarsinnaavatit allanillu nutaarsiassamik nuannersumik ilinniartitsinerit pitsanngortinniarsaralugu. — 1 Tim. 4:16.
12 Maannakkut ’Jehovap ullussaa pingaaqisoq sioranangaaqisorlu’ qanillimmat piffissaq sinneruttoq silatusaarluta atorniartariaqarparput suliassaq uatsinnut tunniunneqarsimasoq naammassiniarlugu. (Joel 3:4) Satanip piffissakilluni nalunngilaa, inuunerpullu pisarissersorniarlugu aammalu pingaarnerusut tunulliutsinniarlugit pissaanini tamaat atorlugu misilittuarpaatigut. (Fil. 1:10; sar. 12:12) Tatigiuaannaruk Guutimit soqutigineqarlutit. Inuunerpit pisariinnerulersinniarnerani Jehovap ikiorsinnaavaatit pitsaanerpaamik kiffartorsinnaalersillutit. (Tus. 145:16) Nuannaarnaqaaq amerlasuut periarfissamik misissoqqinnerisigut, paasisarmassuk ikiorti-pioneeriunissaminnut pioneeriusinnaallutilluunniit. Aap, pioneerit piffissartik silatusaarlutik atortaramikku illorrisimaanermik misigisarput. Illittaaq taamaattunngussavit?