Qasusuippit?
1 ’Matumannga annerusumik tipaatsuutigisaqanngilanga: Qitornakka . . . sallusuissut eqqorlugu saqimmata.’ (3 Juá. 4) Anersaakkut meeqqami qasusuinnerat Johannesip nuannaarutigeqaa. Aammattaaq Ataatatta qilammiusup ullumikkut millionilippassuit ’sallusuissut eqqorlugu saqisut’ takullugit nuannaarutigissaqaa. — Uss. 23:15, 16; 27:11.
2 Naak Guutip innuttai ataatsimut isigalugit kristumiutut suliassanik ulapputiginnikkaluartut ajoraluartumik ilaat unikaallassimapput. Immaqa sallusuissummik ilisarseqqammerlutik piumassuseqartorujussuusimapput, ukiulli ingerlaneranni annikitsuinnarmik oqaluusseqataaneq ileqquliutiinnarsimallugu.
3 Ilaalli paasinartumik unikaallattariaqarsimapput timikkut ajoquteqalernertik utoqqalinertilluunniit pissutigalugit. Taakkua qasusuinnerat pillugu nersungaartariaqarput. Ilumut sapinngisatik tamaat iliorput. Guutimulli inuunerminnik tunniulluinnarsimasut tamarmik imminnut aperisariaqarput: ’Inuttut soqutigisakka pingaartippallaalersimavakka, allaat Guutip naalagaaffiata soqutigisai inuuninni soqutaannginnerulersillugit? ’Nillernangaluunniit kissanngilanga’, imaluunniit suli ’assoruuppunga’? (sar. 3:15, 16; Lúk. 13:24) Tamatta qinunikkut suliniutivut piviusorsiortumik nalileriartigit, pisariaqartumillu siuarsarluta ilisimallugu ’naalannaammik ataqqinaamillu eqqissinermillu ajunngitsuliortunut tamanut [Jehova] nalliutitsiumalluni’ neriorsuisimasoq. — Rûm. 2:10.
4 Qanoq qasusuissinnaasugut: Qasusuinnermini Jesus suna iluaqutigaa? Paulus nassuiaavoq: ’Tipaatsuutissaq imminut saqqangiussaq pillugu ilalaarluni nappagaq naalliutsitaaffik atorpaa, mitaatigineqarnini soqutiginagu, ingissimavorlu Guutip issiavissaarsuata talerpiata tungaanut.’ (Epr. 12:1-3, NV) Tipaatsuutissap Jesusimut saqqangiunneqartup misilinneqarallartarneri oqilisartarpai. Uaguttaaq tipaatsuutissaq saqqangiunneqartoq eqqarsaatigigutsigu iluaqutigisinnaavarput. (sar. 21:4, 7; 22:12) Biibilimik atuaqqissaarnitsigut, akuttoqatigiimmik ataatsimiigiartarnitsigut qinujuarnitsigullu Jehova nukissamik aallerfigisarutsigu uagutsinnut suliareqquneqartoq suliaritillugu qasusuinnerulersinnaavugut.
5 Jehovap kiffami aalajaatsut qasusuinnerat nuannaarutigaa. Taamaattumik ’sallusuissut eqqorlugu saqiuarnitsigut’ nuannaarnerulersitsigu.