’Iluartumik sorsunniarit upperluarlutit’
1 Apustili Paulusip Timoteus ’upperluarluni iluartumik sorsoqqullugu’ kajumissaarpaa, namminerlu oqaatsit taakku maleqqissaarpai. (1 Tim. 6:12) Toqunnginnermini qularani oqarpoq iluartumik sorsussimalluni. (2 Tim. 4:6-8) Pissutsit qanoq ikkaluaraangata tamatigut sapiilluni, qunusuilluni qasususilllunilu kiffartortarpoq. Maligassiuinerata malinneratigut qularutigissanngilarput kristumiutut upperisarput pillugu sorsulluta sapinngisatsinnik iliortugut.
2 Pisariaqartumik iliuuseqarit: Paulus eqiasuilluni oqaluussisimavoq. (1 Kor. 15:10) Uaguttaaq oqaluussiffigisartakkatsinni tamatuminnga pisassaqartut tamaasa nassaariumallugit ilungersortariaqarpugut. (Mat. 10:11) Taakkua ilaat angusinnaavavut ullaakkut makiaarluta aqqusinermi naapitavut oqaluussiffigisarutsigit. Allat ualikkut imaluunniit unnulernerani inuit angerlareerpata oqaluussinitsinni naapissinnaavavut.
3 Imminut naalakkersinnaaneq pilersaarusiorluarsinnaanerlu pisariaqarput katersuuttoqartillugu piffissaq eqqorlugu aggernissamut. Assersuutigalugu Betelimiut ilaat sapaatip-akunnerata naanerani ilageeqarfitik oqaluusseqatigiumallugit ungasissumut siumut utimullu biilertariaqartarput. Ilagiinni assigiinngitsuni oqaluussisartut ilaqutariillu sivisuumik biilertariaqaraluarlutik piffissaq eqqorlugu takkuttaartut aamma nersortariaqarpavut. Taakku eqiasuinnermik pilersaarusiorluarnermillu soqutiginnittut maligassaalluarput.
4 Soqutiginnittut naapittakkavut tamaasa soqutigalugit malinnaaffigisariaqarpavut. Torrutiinnarlugu oqaluussinermi aqqusinermiluunniit angalaarnermi atuagassianik tigusisup Biibilimik atuaqqissaaqatiginissaa siunertaralugu attavigeqqissinnaajumallugu najugaqarfia telefonnormualuunniit piumasartigit.
5 Akuttoqatigiimmik oqaluusseqataasarit: Paulus sapinngisani tamaat atorlugit oqaluussisarpoq. (Rûm. 15:19) Illimmi? Akuttoqatigiimmik oqaluusseqataasarpit? Qaammammi uani oqaluusseqataasimavit? Atuakkamik atuaqqissaaqatigiinnermi aqutsisup atuaqqissaaqataasartut tamarmik qaammatit tamaasa oqaluusseqataanissaannik nuannaarutigalugu ikiorumavai.
6 Paulusip nutaarsiassamik nuannersumik siuarsaanera qanorluunniit malikkutsigu uaguttaaq ’upperluta iluartumik sorsuuteqartutut’ oqaatigineqarsinnaalissaagut.