Oqaluussiuaritsi
1 Guutip kissaatigaa ’inuit tamaasa annassasut sallusuissummillu ilisarsissasut’. (1 Tim. 2:4) Taamaattumik nutaarsiassap nuannersup oqaluussissutiginissaanut suliakkerneqarpugut. (Mat. 24:14) Sooq oqaluussiuartariaqartugut ilisimalluarutsigu pakatissutaasinnaasut, inuit soqutigisaqannginnerat allanulluunniit saasaarisinnaasut pissutigalugit nikallussanngilagut.
2 Sooq oqaluussiuassaagut? Silarsuarmi sorpassuaqarpoq inunnut puussaarisunik oqaaserisimasatsinnullu puigorsaataasunik imaluunnit soqutiginnilersitsinngitsunik. Taamaattumik Guutip annannissamik tusarliussaanik eqqaasittuartariaqarpavut. (Mat. 24:38, 39) Aammattaaq inuit inuunerminni atugaat allanngorartuarput. Silarsuarmi pissutsit aamma ullormiit ullormut allanngortarput. (1 Kor. 7:31) Imaassinnaavoq inuit oqaluussiffigisartakkavut aqagu, sapaatip-akunnerata tulliani imaluunniit qaammatip tulliani nutaanik ajornartorsiuteqalersut ernumassuteqalersulluunniit nutaarsiassamik nuannersumik tusarliussatsinnik eqqarsaatiginnilersitsisunik. Uaguttaaq sallusuissut ilikkaratsigu qasusuittoqarsimammat qularnanngitsumik qujamasuutigaarput.
3 Guutip naakkinninnera ilaarsiuk: Jehova kamajuilluni guutiitsunik eqqartuussinnginnermini piffissaliingaatsiarpoq. Aqqutigaluta inunnut ilumoortunut isumataaqqullugit annaqqullugillu saaffiginnittuarpoq. (2 Pît. 3:9) Guutip naakkinnilluni tusarliussaa oqaluussissutigiunnaarutsigu inunnullu ajortuliaminnik taamaatitsiumanngitsunut tamanut eqqartuussiumaarnissaanik mianersoqqusiunnaarluta uagut nammineq aammik kuiseqataasutut pisuutitaassaagut. (Hes. 33:1-11) Naak tusarliussarput tamatigut tusarumaneqanngikkaluartoq Guutip naakkinningaassusianik ilumoortut paasitinnissaannut pingaartitsilernissaannullu ikiorlugit ilungersornivut qasukkartinnaveersaartariaqarpavut. — ap. sul. 20:26, 27; Rûm. 12:11.
4 Asanninnerit nittaruk: Jehova Jesus Kristusikkut oqarpoq nutaarsiassaq nuannersoq nunarsuaq tamakkerlugu oqaluussissutigineqassasoq. (Mat. 28:19, 20) Guutimut asanninnitta takutinnissaanut periarfissaqarpugut ilungersorluta eqqortuliortuaannarluta, inuit soqutiginninngikkaluarpataluunniit. — 1 Juá. 5:3.
5 Uummammik tamakkiisumik oqaluussiuaannarnissarput aalajangiutsigu suli ’ullup annaassiviunerani’. — 2 Kor. 6:2.