Sooq aggertuartarpugut?
1 Imminut taama aperinikuuit, immaqa oqaluussiartornissannut piareersaleruttorninni? Angalaartarfinni angalaarfigikulaffigisatsinni, inuit nalunngilaatigut ilaatigullu ilaasa soqutiginninnginnerminnik ersersitsivigipallassinnaasarluta. Immaqa ikitsuinnaat tusarnaarumasarpaatigut. Taamaakkaluartorli aggertuartarnissatsinnut pissutissarpassuaqarpugut.
2 Siullermik pingaarnerusumillu peqquneqarsimavugut Naalagaaffimmik oqaluussissutiginnittuaqqulluta naggatissap tikiunnissaata tungaanut. (Mat. 24:14; 28:19, 20) Pruffiitip Jesajasip apeqqutigisimavaa qanoq sivisutigisumik oqaluussissutiginnittuassanerluni. Jesaja 6:11-imi akissutaa ersarissoq atuarsinnaavarput — tusarliussaq Guutimeersoq inunnut saqqummiuttuartartussaasimavaa. Ullumikkut aamma Jehovap ilimasuffigaatigut angalaartarfitsinni najugallit pulaartuartassagivut, allaat immaqa soqutiginninnatik ersersitsivisassagaluaraatigut. (Hes. 3:10, 11) Illernartumik akisussaaffimmik paarisaqartitaavugut. — 1 Kor. 9:17.
3 Aggertuartarnissatsinnut alla pissutissarput tassa Jehovamut tunniusimalluinnarnerput takutikkumallugu periarfissaq. (1 Juá. 5:3) Qanormita inoqatitta siunissami qanittumi atugassaat eqqarsaatigigutsigu asannittumik mianersoqqussannginnerpavut? (2 Tim. 4:2; Jâk. 2:8) Nalunaajaasarnermut aalajaattuarutta periarfissittuartassavavut Guutip annassummik tusarliussaanut qisuariarnissaat taamaalillutik oqaqqunagit mianersoqquneqarsimanatik. — Hes. 5:13.
4 Naluarput qaqugu inuit uummataasa inissisimanerat allanngussasoq. Tamanna inuttut namminneq atugarisaasa allanngornerannut, ilaquttamilluunniit alianartumik pisoqarneranut tunngassuteqarsinnaavoq, imaluunniit silarsuarmi pissutsinik allanngortoqarneratigut siunissamik eqqarsaatiginnilersissinnaavaat. Matumiluunniit aallarniilluta oqaatigisatta ajunngitsumik qisuariarnerannik kinguneqarsinnaavoq. (Nal. oq. 9:11; 1 Kor. 7:31) Ilaat nuuttarput, nutaallu immaqa nutaarsiassamut nuannersumut tusarnaarumallutik, angalaartarfigisatsinnut pisoqarsinnaavoq — immaqa inuusuttut namminerisamik ineqalersut inuunerullu sumik siunertaqarneranik eqqarsaatiginnilersimallutik.
5 Aggeqqittuartassaagut? Aap! Inuit pulaaqqittuartarnissaannik Biibilip pissutissarpassuarnik tunisimavaatigut. Oqaluussinermi suliaq qaquguluunniit naammassineqarpat Jehovap aalajaalluta ilungersorlutalu oqaluussiniarsimanitsinnik pilluaqqujumaarpaatigut, qujamasullutillu Naalagaaffimmik tusarliussamik tusarnaarsimasut pilluaqqujumaarpai. — 1 Tim. 4:16.