Toqqoruk

Siunnersuutit oqaluussinermi atugassat

Qanoq quppernerit uku atorneqarsinnaasut

Saqqummeeriaatsit uku amerlanersaat Naalagaaffimmik Kiffartorneq-mit pereersimasatsinneersuupput. Atorusutatit atortakkit kingunerilu maluginiarlugit. Quppernerit toqqukkit oqaluussinissamullu piareersaraangavit atortarlugit.

Oqaatiginiakkat oqaatigipallakkukku pulaakkat Guutip oqaasianik soqutiginnilersissinnaavat. Matukkut sianeruit quppigassat nalunaaqutsersimallugu Biibili tigummiuk. Aalajangersimasumik apeqquteqarit, allassimaffimmilu akissutaa atuaruk. Siunnersuutit tulliuttut ilaat misilissinnaavatit:

„Siunissaq eqqarsaatigigukku, isumaqarpit siooranissamut imaluunniit isumalluarnissamut pissutissaqartoq? [Pulaakkat akili.] Pissutsit naalliunnartut sumi tamaani atuuttut Biibilimi siulittuutigineqarsimapput, siulittuutigineqarportaaq tamakku qanoq naggaserneqarumaartut.“ — 2 Tim 3:1, 2, 5; Uss 2:21, 22.

„Nunatsinni peqqinnissaqarfik napparsimasunillu paaqqinninnissaq oqaluuserineqartaqaat. Nalunngiliuk Guuti neriorsuisoq peqqinnissamut akornutaasut tamaasa nassaanngitsussamut nungutivikkumaarlugit?“ — Es 33:24; Saqq 21:4.

„Nalunngiliuk Biibilimi siulittuutigineqarsimasoq, nunarsuaq tamakkerlugu ataasiinnarmik naalakkersuisoqalerumaartoq?“ — Dan 2:44; Matt 6:9, 10; Saqq 21:4.

„Jiisusi Kristusi nunarsuaq tamakkerlugu kunngitut naalakkersuisuugaluarpat pissutsit qanoq ittuussasoraagit?“ — Tuss 72:7, 8.

„Inuppassuit angutaanertik arnaanertilluunniit, upperisartik ammilluunniit qalipaataa pissutigalugullugit immikkoortitaasarput. Taamatut immikkoortiterineq Guutimit akuersaarneqarsoraajuk?“ — ApS 10:34, 35.

„Nalunngiliuk inuit siunissami qaamasumik pilluarnartumillu atugaqalernissaat Biibilimi neriorsuutigineqartoq?“ — Saqq 21:4; Matt 6:10; Dan 2:44.

„Jiisusi nunamiikkallarami amerlasuunik tupinnartuliortarsimavoq. Ataatsimik tupinnartulioqqeqqullugu qinnuigisinnaasuugukku sunaassagaluarpa?“ — Tussiaat 72:12-14, 16

„Amerlasuut ajornartorsiutit tusassallugit qatsutivippaat. Ajornartorsiutinut aaqqiissutissanik tusarumanerupput. Qularnanngitsumik aamma illit taama isumaqarputit. Kisianni ajornartorsiutitsinnut aaqqiissutissanik siunnersuutinik atorsinnaasunik sumit nassaarsinnaavugut?“ — 2 Tim 3:16, 17

„Naalagaaffik ataatarpuumi qinnutigisartagarput sunaanersoq nalunngiliuk?“ — Matt 6:9; Dan 2:44; Saqq 21:4.

Oqaloqatigiissutissatut siunnersuutit

Apeqqutit tulleriiaat ’Ræsonnerebogimi’ oqaloqatigiissutissanit assigiinngitsunit tigusaapput, akissutissallu quppernerni sumiinneri ilanngunneqarlutik:

Sooq utoqqalillutalu toqusarpugut? (78)

Toqusimasut qanoq pissuseqarpat? (80)

Guuti kinaassusiliua? (98)

Guuti upperissallugu pissutissaqarpa? (120)

Uagut inuit qanoq ingerlanersugut Guutip soqutiginerpaa? (121)

Guutip naalagaaffia sunik naammassisaqassava? (128)

Inuit ajunngitsut tamarmik qilaliassappat? (164)

Qilaliaraanni aatsaat pillualertoqarsinnaava? (165)

Sooq Guutip namminerisamik atia ilisimassallugu atussallugulu pingaaruteqarpa? (176)

Jiisusi Kristusi ilumut Guutiua? (191)

Sooq naalliunnartut Guutip atuutitippai? (227)

Inuunerup suna siunertaraa? (234)

Sooq taama ajortoqartigaa? (265)

Upperisarsiornerit tamaasa Guutip iluarai? (307)

Upperisaq sorleq eqqortuusoq qanoq paasineqarsinnaava? (313)

Ullutsinni silarsuarmi Satani qanoq sunniuteqartigaa? (328)

Kina silarsuup matuma naalagaraa — Guuti Sataniluunniit? (417)

Aappariinneq qanoq pitsaanerulersinneqarsinnaava? (428)

Atuagassiaaraq Guutip sumik piumaffigaatigut? qanoq saqqummiunneqarsinnaasoq

„Sunngiffimma ilaa atortarpara apeqqut amerlanersatsinnit apeqqutigineqartartoq pillugu inuit oqaloqatigalugit: Inuunerup suna siunertaraa? [Pulaakkat akili.] Amerlasuut siunissap qanoq nassataqarumaarnera toqqissisimanngissutigaat. Taamaattumik tamanna pillugu allat isumaat tusassallugu soqutiginartippara, ingammik Tussiaatit 104:5-imi allassimasoq eqqarsaatigissagaanni. [Atuaruk oqaaseqarfigilaarlugulu.] Nunarsuup naassaanngitsumik atasussaanera eqqarsaatigalugu, Guutip inuit siunertaqarfigisimannginnerpai? [Tusarnaaqqissaarit.] Eqqarsaat tamanna tusarnikuuara, apeqqutilli allatut akineqarnera takorusukkukku, atuagassiaaraq una pitsaassaaq. [ ’Guutip sumik..’ takutiguk.] Biibili naapertorlugu suna siunertaanersoq naatsumik allaaseraa. [Qupp. 10 takutiguk, apeqqutaalu eqqaallugit.] Atuagassiaaraq ilinnut tunniukkusuppara. Immaqa apeqqutit allat atuagassiaaqqap imaata allattorsimaffianiittut akissutissarserusussavatit? Sapaatip-akunnerata tulliani maani angalaaleruma alakkaqqissinnaavunga?“

„Inuppassuit oqaloqatigisartakkama naapertuilluannginneq ajussuserlu avatagiisitsinniittut isigalugit asannittumik Guuteqarnera upperiuminaatsippaat. Immaqa aamma illit taamatut eqqarsartarputit? [Pulaakkat oqaaseqarli.] Nalunngiliuk pissutsit atukkavut Biibilimi siulittuutigineqarmata? [2 Tim 3:1 takutiguk.] Biibililli aamma allaatigaa Guuti ullormik suut tamarmik allanngorfissaannik aalajangersaasimasoq. Takutilaarlara. [ApS 17:31 atuaruk oqaaseqarfigilaarlugulu.] Naapertuilluartumik eqqartuussisoqarnissaa Malugaajuk? -Eqqartuussinerli uagutsinnut ajunngitsumik inerneqassappat qanoq iliortariaqarnissarput apeqqutaalerpoq. Atuagassiaaqqap tamanna allaatigaa. [ ’Guutip sumik.. ’ takutiguk.] Apeqqutigaa: Guutip sumik piumaffigaatigut? Ilinniagassaq 1-mi oqaluttuarineqarpoq Guutip piumasaqaatai sumi nanisinnaagivut. Immikkoortuni pingasuni apeqqutit suut sammineqarnersut takoriakkit.“ Taava ’matumi atuaqatigiinneq’ aallartissinnaanngorpat imaluunniit qaqugu aggeqqinnissannik isumaqateqarfigalugu.

„Maaniuna inuit oqaloqatigigivut nunarsuarmi eqqissineqassappat qanoq iliortoqartariaqarnera pillugu. Illit qanoq isumaqarpit? [Pulaakkat tusarnaarluaqqissaaruk, paasinninnerillu ersersillugu immaqalu isumaqataallutit] Amerlasuut isumaqarput nunarsuarmut tamarmut naalakkersuisoqartariaqartoq. [Pulaakkat oqaaseqartiguk.] Biibilimi aamma taama allassimavoq. Danieli 2:44-mi takusinnaavarput Guuti nunarsuarmut tamarmut naalagaaffimmik pilersitsiniartoq. [Allassimaffik atuaruk pulaakkavillu malugisassaa erseqqissaruk.] Tassaavoq taanna naalagaaffik ataatarpuumi tikiuteqqullugu qinnutigisartagarput. [Matthæusi 6:9, 10-lu atuakkit atuagassiaaqqamilu ’Guutip sumik..’ ilinniagassaq 6 qulequtaaluunniit innersuutigalugit.] Atuagassiaaraq eqqullugu Guutip naalagaaffiata inunnut qanoq iliuuseqarniarnera atuariassagit.“

„Haluu, uanga . . . ateqarpunga. Akunnusilaarsinaavakkit? [Qungujullutit oqarit, akinissaanullu periarfissiguk.] Matukkut sianerpunga allassimaffimmik, immaqa siornatigut tusarsimasannik, atuffatilaarusukkakkit. [Pulaakkat oqaaseqartiguk. Akissutaa inussiarnersumik qisuariarfigiuk, allassimaffillu Johannesi 17:3 atuaruk.] Inuunermik naassaanngitsumik eqqarsaat qanoq isumaqarfigaajuk. [Pulaakkat akili.] Aap, inuuneq naassaanngitsoq nuannerunaqaaq, ingammik utoqqalisarneq nappaatillu nalunngilluakkavut atuutinngikkaluarpata. Isumaqarpit Guutip piumaguni uagutsinnut tunniutiinnarsinnaagaluarai imaluunniit piumagutsigit arlaannik piumaffigissagaatigut? [Akissutaanut tusarnaarit.] Guutip piumaffigaatigut. Atuagassiaaqqami ilinniagassaq 1-mi tamanna akineqarpoq. [Atuagassiaaraq takutiguk. Apeqqut 1 apeqqutigiuk, immikkoortorlu atuarlugu. Immikkoortoq apeqqullu eqqartorsigit. Ingerlaqqigitsi.] Biibilimit ilisimasaqalerneq. Tulliani immaqa immikkoortup tullia atuarsinnaavarput?“

Aqqusinermi ima oqartoqarsinnaavoq: „Aperilaarsinnaavakkit? Isumaqarpit uagut inuit Guuti piumasaqarfigisinnaagipput? [Akinissaa utaqqiuk, tusarnaarit oqaloqatigeqqillugulu.] ajornartorsiuteqaraangatta Guuti ikiuisartutut eqqarsaatigissallugu, pisariaqartitsigaangattalu qinnunikkut saaffiginissaa sungiutiinnarsimavarput. Eqqarsaatiginikuuiulli Guutip uagut piumaffigineraatigut? [Akissutaa tusarnaaruk.] Atuagassiaaraq angerlaanniaruk, akissutissarsiffigissavat. Immaqa arlaanni pulaarsinnaavakkit qanoq isumaqarnerit tusarniarlugu?“ [Aqqa najugaalu oqarasuaataataluunniit normua piumakkit.]

„ . . .-mik ateqarpunga. Eqqarsaatiginikuuiuk sooq taama amerlatigisunik upperisarsiortoqarnersoq? [Pulaakkat akili.] Tamarmik eqqortuusoripput, ilumulli taamaattoqarsinnaava? [Pulaakkat akitiguk. Atuagassiaaqqami Guutip sumik piumaffigaatigut?-mi ilinniagassaq 13 qupperuk, apeqqutillu aallaqqaasiutaasut atuakkit.] Apeqqutit akissutissarsisinnaavatit una atuarukku.“

Pulaakkat atuagassianik tigusisimappat, aperisinnaavat atugassiaaqqamiit naatsunnguamik atuffatilaarsinnaanerlugu. Akuersippat, Guutip sumik piumaffigaatigut?-miit ilinniagassaq 5 qupperuk. Apeqqutitai atuaqqaakkit aperalugulu atuarninni akissutai tusaasinnaanerai. Immikkoortoq atuareerukku, apeqqutitai apeqqutigeqqillugit akitiguk. Atuagassiaaraq neqeroorutigiuk, pisarsilu ullormi allami naammassiartorumallugu aggeqqinnissannik isumaqateqarfigiuk.

’Ilisarsineq’ qanoq neqeroorutigineqarsinnaasoq

Biibili tigummillugu aallarniisinnaavutit oqarlutit: „Inuit maani najugallit Biibilimi allassimaffik pillugu oqaloqatigaavut. Tassa Johannesi 17:3, ima allassimasoq: . . .“ Atuaruk aperalutillu: „Malugaajuk Guutimik ilisarsineq qanoq kinguneqarsinnaasoq? [Akissutaa utaqqiuk] Qanoq ililluni ilisariniarneqarsinnaagami?“ Taava atuagaq ’Ilisarsineq’ takutiguk oqarlutillu: „Atuakkap uuma ilisarsineq inuunermik naassaanngitsumik kinguneqartitsisinnaasutuaq innersuutigaa. Taamaaliorpoq, Biibili pillugu apeqqutit nalinginnaanerusut inuit apeqqutigisartagaat akigamigit.“ Imarisai takutikkit aperalugulu qulequttat ilaat ilaatigooriarluni eqqarsaatigisarsimannginnerai.“

Biibili tigummiuk: „Amerlasuut tupigusuutigaat naalliuutit isigisatta atuunnerat Guutip akuerimmagit. Pissaaneqaqiguni, sooq naalliuutivut unitsinnianngilai? Illit qanoq isumaqarpit? [Pulaakkat akili.] Biibilip neriorsorpaatigut Guutip puigorsimanngikkaatigut.“ Tussiaat 72:12-17 atuaruk. ’Ilisarsinermi’ kapitali 8 qupperuk, apeqqutillu millionilippassuarnit apeqqutigineqartartut akissutaa takutillugu, tassa: „Sooq naalliunnartut atuunnerat Guutip akueraa?“ Ajornanngippat eqqarsaatit Biibilimeersut immikkoortoq 3-miit 5-mut oqaloqatigiissutigisinnaavasi. Pulaaqqiinissamik isumaqatigiissuteqarit.

Aallartikkuit Biibili tigummiuk, oqarlutillu: „Amerlanersatta ikinngummik ilaquttanilluunniit toqukkut annaasaqarneq misigereersimavaat. Taamaattoqaraangat inuunerup siunertaanik inuunerulluunniit neriuuteqannginneranik eqqarsalersittannginnerpaatigut? [Pulaakkat akili.] Illit isumaqarpit toqusoqartarnera akueriinnartariaqaripput, toqusimasunulluunniit neriuutissaqarsoraajuk? [Tusarnaarit.] Maluginiariassagit Johannesi 11:11, 25, 44-milu qanoq allassimasoqartoq.“ Versit naatsunnguamik oqaaseqarfigikkit ’Ilisarsinermilu’ assiliaq qupperneq 85-miittoq takutiguk oqaasertaalu atuarlugit. Assiliaq qupperneq 86-miittoq oqaluttuariuk. Pulaakkat oqaloqataali. Pulaaqqiinissat piareersaruk oqarlutit: „Guutip tamanna piumasarippagu, soormiuna utoqqalillutalu toqusartugut? Tulliani aggeqqikkuma apeqqut tamanna uterfigeqqikkusuppara.“ Aggeqqinnissannik isumaqatigiuk kapitali 6-lu atuaqatigiissutigalugu.

Matukkut sianeruit Biibilimi atuagassat piareerlugu quppersimajuk. „Haluu, . . . mik ateqarpunga. Maaniuna inuit apeqqummik immikkut ittumik oqaloqatigigivut: ’Suna pingaarnerua: Aningaasat tullermulluunniit asanninneq?’ [Pulaakkat eqqarsartiguk oqaaseqartillugulu. Taava isumaqataatinniaruk tullermut asanninneq pingaarnerusariaqaraluartoq kisiannili killormooqqajaanerusut.] Nalunngiliuk piumatussuseq ullumikkut isigisarput Biibilimi piffissami aalajangersimasumi pisussatut siulittuutigineqarsimasoq? 2 Timotheusi 3:1, 2a-milu ima allassimavoq. [Qupperuk takutillugulu suminngaanniit atuarnerlutit. Oqaaseq ’aningaaserituut’ tikillugu atuaruk.] Malugaajuk versi 1-mi allassimasoq ’ullussani kingullerni’ taamaattoqarumaartoq? Qularutiginngilarput uani allassimasut ullutsinni atugaammata, ullulli kingulliuppata ullut ilaanni naggatissaqassapput. Kingorna qanoq pisoqarumaarsoraajuk? [Pulaakkat tusarnaaruk.] Biibilip aamma qanoq pisoqarumaarnissaa allaatigaa, tassa silarsuaq aningaasanik aqunneqassanngitsoq, asanninnermilli. Saqqummersitat 21:4, 5-milu takoriaruk.“ Taama oqareeruit ’Ilisarsinermut’ ikaarsaarsinnaavutit.

Aallarniileruit Biibili ’Ilisarsinerlu’ tigummiakkit. „Eqqarsaatiginikuuiuk sooq tamatta sivisunerusumik inoorusukkaluartugut?“ Pulaakkat oqaloreerpat, ’Ilisarsinermi’ kapitali 6 qupperiarlugu immikkoortoq 3 atuaruk. Oqaloqatigiinnissinni atuakkami allassimaffiit innersuusutigineqartut atukkit. Immikkoortup naanerani apeqqutigineqartut akissutai paaserusunnerai aperiuk, piumappallu immikkoortup tullianut ingerlaqqigitsi.

„Qularnanngitsumik nutaarsiassani meeqqat kaattut, napparsimasut paarineqanngitsullu takusimassavatit. Sooq ikiuiniaqatigiit assigiinngitsut pissutsit pitsanngoriartissinnaasimanngilaat? [Pulaakkat akili.] Guutip ajunnginnerpaamik kissaappaatigut. Maluginiariassagit meeqqat inersimasullu qanoq neriorsorsimagai. [Saqqummersitat 21:4 atuariaannanngorlugu Biibili tigummiuk, versilu oqaaseqarfigiuk.] Atuagaq una [qulequtaa taajuk] silarsuaq nutaaq pillugu paasissutissanik amerlanerusunik paasissutissiivoq.“ Paratiisimut assigusumik assersuuteqarit takutitaqarilluunniit. Atuagaq neqeroorutigiuk, aggeqqinnissannullu isumaqatigalugu.

Napasuliaq Alapernaarsuiffik-mi Iteritsi!-millu tigusisimasunut pulaaqqiiguit ima oqarsinnaavutit:

„Kingullermik kasuttorfigigakkit atuagassiat Napasuliaq Alapernaarsuiffik Iteritsi!-lu pivatit. Immaqa malugisimassavat Napasuliaq Alapernaarsuiffiup tamakkiisumik taaguutaa tassaasoq Napasuliaq Alapernaarsuiffik, Jehovap naalagaaffianik tusarliussisoq. Naalagaaffik pineqartoq sunaanersoq, qanorlu ilinnut ilaquttannullu pingaaruteqarnera pillugu ullumikkut oqaluttuutilaarusuppakkit.“ Taava atuagassiaaqqami Guutip sumik piumaffigaatigut?-mi ilinniagassaq 6 qupperuk immikkoortorlu siulleq oqaloqatigiissutigalugu. Pulaakkavit piffissaqarnera naapertorlugu ilinniagassaq sammisiuk.

„Ungasinngitsukkut pulaarakkit Napasuliaq Alapernaarsuiffik Iteritsi!-lu tunniuppakka. Qanoq isumaqarfigaagit? [Pulaakkat oqaaseqarli.] Uanga isumaqarpunga Guutip oqaasia paasissallugu tamanut pingaarutilerujussuusoq, taamaattumik takutikkusuppakkit tamatumunnga suup iluaqutaasinnaaneranik.“ Atuagassiaaraq Guutip sumik piumaffigaatigut? imaluunniit „Ilisarsineq“ takutiguk Biibilimillu atuaqqissaaqatigiinnissamik neqeroorfigalugu.

Atuakkat 192-nik quppernillit arlaat neqeroorutigineqarsinnaavoq ima oqarluni:

„Ullumikkut ilinniagaqarnissaq pingaartinneqartorujussuuvoq. Pilluarumagaanni iluatsitsiumagaannilu suna ilinniarsimasariaqarpa? [Pulaakkat akili. Taava Ussatit 9:10,11-lu atuakkit.] Una atuagaq Biibili tunngavigalugu allanneqarnikuuvoq. Atuagaq naassaanngitsumik inuuneqalersitsisinnaasutuaq tikkuarpaa.“ Atuakkamiit asersuuteqarit, atuarneqarnissaalu pulaakkannut kajumissaarutigiuk.

Atuagassiat allat

Atuakkanut atuagassianullu saqqummiinissamut siunnersuutit allat Register til Vagttårnets publikationer-imi ima qulequttalimmi nassaarineqarsinnaapput:

Præsentationer

Liste over publikationer

Saqqummeeriaatsit toqqaannartut

Saqqummeeriaaseq toqqaannartoq atorlugu Biibilimik atuaqqissaaqateqalernissamik neqeroorutit arlaqanngitsut aajukua:

„Nalunngiliuk minutsialunnguit atorlugit Biibilimiit apeqqutit pingaarutillit akineqarsinnaasut? . . .“ Atuagassiaaqqamiit Guutip sumik piumaffigaatigut?-mit pulaakkannut tulluartumik imarisaani ilinniagassat arlaat atorlugu apeqquteqarit. „Kasuttorfigaatsigit taarsisaleruttornerani neqerooruteqarfiginiarlutit — tassa akeqanngitsumik Biibilimik atuaqqissaaqatigiinnissamik. Qanoq isumaqarpit? [Pulaakkat tusarnaaruk.] Atugassatsinnik nassarpunga. Tassa atuagaq itinerusunik allaatigisaqartoq [’Ilisarsineq’ takutiguk], atuagassiaararlu, [Guutip sumik. . . takutiguk] atuakkap imarisaanik qarsupittumik allaatigisaqartoq. Ilinniagassaq 5-imi apeqqutit suut apeqqutigineqartut takoriassagitit. [Apeqqutit atuakkit.] Apeqqutit ilaat immaqa aamma illit eqqarsaatigisarsimassavatit. [Pulaakkat oqaaseqartiguk.] Quppernerit uku marluk atuarukkit akissutissarsisinnaavatit! Eqqullugit misissuataariassagitit.“ Pulaakkavit tiguppagit oqarsinnaavutit: „Qaqugu aggeqqikkuma pitsaanerussava?“

„Amerlasuut Biibileqarput, ilisimanaguli inuunermi apeqqutit pingaarutillit tassani akineqartut. [’Ilisarsinermi’ ’atuagassiaaqqamiluunniit ’Guutip sumik. . . imai takutikkit.] Sapaatip akunneranut ataasiarluta nalunaaqquttap ataatsip missaani misissueqatigiittarnermi qaammatialunnguit qaangiunnerani Biibilimi paasisassat tunngaviusut paasisinnaavatit. Sammisassamik toqqaariaruit, takutissavakkit ilinniartitsineq qanoq ingerlasarnersoq.“

„Biibilimik atuaqqissaaqatigiinnissamik neqeroorfiginiarlutit kasuttorfigaakkit. Soqutiginartippiuk? [Pulaakkat akili.] Nunani 200-t sinneqartuni inuit angerlarsimaffianni qanoq Biibilimik atuaqqissaaqatigineqartarnerat naatsunnguamik takutilaarlara. Atuakkami uani kapitalit ilaat eqqartuinissatsinnut aallaavigisinnaavarput. [’Ilisarsineq’ qaqiguk imaalu pulaakkannut takutillugit.] Sammisassat arlaat soqutiginartippiuk?“ [Pulaakkat kapitalimik toqqaatiguk.] Quppersiuk immikkoortorlu siulleq aallartissiuk.

„Inuit Biibilimik atuaqatigisarpakka, illittaaq neqeroorfigerusuppakkit. Akeqanngilaq unalu ’Biibilimik ilitsersuutinnguaq’ tunngavigisarpara. [’Ilisarsineq’ takutiguk.] Ilinniartitsineq qaamatialunni pisarpoq, apeqqutillu soorlu, sooq naalliunnartut atuunnerat Guutip akuerai, sooq utoqqalillutalu toqusarpugut, toqugutta susoqassava, qanorlu ililluni Guutimut qanimut attaveqartoqalersinaasoq. Qanoq iliortartugut naatsunnguamik takutilaarsinnaavakkit?“

Saqqummeeriaatsimik soqutiginnilersitsillunilu kinguneqarluartumik peqaruit, atuakkamut tulluarsaannarlugu atuinnarsinnavat!