Guutip aqqa illernartitaali
1. Kiffartorfiusumi 2012-mi ataatsimeersuaararnissap qulequtaa sunaava, tamatumunngalu suna pissutaava?
1 Qilammi nunamilu kisimi oqartussaasup, Jehovap, aqqanik taaguuteqarnerput pisinnaatitaaffiungaarpoq! Guutip nammineerluni aterminik taaguuteqarnissarput kissaatigisimavaa, pingaartumik 1931-miilli Jehovap aqqa immikkut ittoq, Jehovamut Nalunaajaasutut ilisarnaatigilersimavarput. (Es 43:10) Guutip ernituata, Jiisusip, Guutip aqqa ataqqinartingaarsimavaa Ataatarpuumi siullerpaajutillugu taasimallugu. (Matt 6:9) Kiffartorfiusumi 2012-imi ataatsimeersuaararnissamut qulequttatut Jiisusip oqaasii tunngaviupput. Tassa “Guutip aqqa illernartitaali”.
2. Paasissutissat suut qilanaartuutigisinnaavavut?
2 Tusarnaagassavut: Sooq piffissaq tamaat kiffartorneq inooriaasiusoq nalerisimaarnartoq, arfininngornermi oqalugiaammi qulequtalimmi “Piffissaq tamaat kiffartortutut Guutip aqqa ilisimaneqalersiguk” sammineqassaaq. Aamma nakkarfissianut sisamanut qanoq ililluta pisaritinnaveersaarsinnaasugut oqalugiaatini ataqatigiinni tusarnaassavavut qulequtalimmi “Guutip aqqata kanngunarsarneqarnissaa mianersuuguk”. ‘Inuit soqutiginnippallaanngippata ilungersuussilluta oqaluussinissamut suup ikiorsinnaavaatigut?’ aamma ‘Sunniuteqarluartumik kiffartornissatsinnik suup ikiussavaatigut?’ oqalugiaammi qulequtaqartumi “Sooq Guutip aqqa illernartinneqassasoq”, akineqassapput. Sapaammi oqalugiaatini ataqatigiinni sisamanik tulleriinnilinni qilanaartuutigisinnaavavut eqqarsaatitsigut, oqalunnitsigut, aalajangernitsigut pissusilersornitsigullu qanoq Guutip aqqa illernartissinnaagipput. Pingaartumik nutaat oqalugiaat tamanut ammasoq pingaartingaassavaat qulequtalik “Jehovap atini angingaartoq Harmagedonimi illernartissavaa”.
3. Qanoq pisinnaatitaaffeqarpugut, sammisassallu qanoq ikiussavaatigut?
3 Ungasinngitsorsuakkut Jehovap atini illernarsarniarlugu iliuuseqassaaq. (Ez 36:23) Tamanna pitinnagu, Jehovap aqqata illernartup suliai tamaasa tapersersorlugit pisinnaatitaaffigisinnaavarput. Qularutiginngilarput ataatsimeersuaararnermi sammisassat, Guutip aqqanik atuisuusugut, tamatta immikkut akisussaaffimmik eqqortitsinissatsinnik ikiorumaaraatigut.