Jehovap qinnutigut qanoq akisarai

1-2. Qinnutitsinnut tunngatillugu qanoq isummersin­naavugut?

JEHOVAP qinnutivit akisarnerai eqqarsaatiginikuuiuk? Taamaas­simappat kisimiin­ngilatit. Qatannguterpas­suattami, ingammik ajornar­torsioraangamik, tamanna aamma eqqarsaatigisarpaat. Uaguttaaq ajornar­torsiuteqarutta Jehovap ilumut qinnutigut akisarnerai qularutigilersin­naavarput.

² Maanna sammissavarput sooq qularin­ngissin­naagipput Jehovap kiffami qinnutaat akisarai. (Joh 1. 5:15) Aamma apeqqutit uku akissutis­sarsissavagut: Sooq ilaannikkut isummer­toorsin­naavugut Jehovap qinnutigut akineq ajorai? Aamma Jehovap qinnutigut qanoq akisarpai?

JEHOVAP QINNUTIGUT ILIMAGIN­NGISATSITUT AKISINNAAVAI

3. Sooq Jehovap qinusar­nissarput kissaatigaa?

³ Biibilimit qularun­naarsin­neqarpugut Jehovap asangaaraatigut pingaar­tingaarlutalu. (Hagg 2:7; Joh 1. 4:10) Taamaat­tuminguna kajumis­saaraatigut ikioqqulluta qinnuigisas­sagitsinni. (Pet 1. 5:6, 7) Ikiorusup­paatigut kissaatigigamiuk qanittuas­sagitsinni ajornar­torsior­nitsinnilu pinertusaas­sasugut.

4. Qanoq nalunngilarput Jehovap kiffami qinnutaat akisarai? (Aamma assiliaq takuuk).

⁴ Biibilimi Jehovap kiffami qinnutaat akisarai atuartarparput. Oqaluttuat ilaannik eqqaasaqarsinnaavit? Kunngi Daavi assersuutigisin­naavarput. Akerarpas­suarminit navianar­torsior­tinneqartarami Jehovamut qinunikkut ikioqqusarpoq. Taamaalluni ima kimigiiserpoq: “Naalagaq, tusaruk qinnutiga, tusaaniannga kimigiiserfigisaraangakkit, akinnga unneqqaris­sutsinni iluarsutsinnilu!” (Tuss 143:1) Daavi aniguisin­neqarnis­saminik qinummat Jehovap ikiorpaa. (Sam 1. 19:10, 18-20; Sam 2. 5:17-25) Daavi isumalluarluni ima taalliorpoq: “Naalagaq qanippoq torlorfigisiminut tamanut.” Uaguttaaq tamanna upperisin­naavarput. – Tuss 145:18.

5. Itsaq Jehovap kiffaasa qinnutaat ilimagisamittut akineqar­tuaannarpat? Assersuuteqarit. (Aamma assiliaq takuuk).

⁵ Jehovap ilaannikkut qinnutigut ilimagin­ngisatsitut akisarpai. Apustilip Paulusip tamanna misigaa. Paulusip Guuti aperaa ‘anniaatini’ peersis­sinnaaneraa. Allaat pingasoriarlugu kimigiiserfigaa. Jehovap qinnutai akivai? Aap, Paulusilli ilimagin­ngisaanik. Anniaataa peernagu aalajaalluni kiffartor­niassammat Jehovap Paulusi pissaanermik tunivaa. – Kor 2. 12:7-10.

6. Sooq isumaqarsin­naavugut Jehovap qinnutigut akinngikkai?

⁶ Aamma uagut qinugaangatta ilaannikkut ilimagin­ngisatsitut akineqarsin­naavugut. Qularutigin­ngissin­naavarput Jehovap qanorpiaq ikiussanerluta ilisimagaa. Allaat “qinnutigisatsinnit takorloorsin­naasatsinnillu annerungaartumik iliuuseqarsinnaavoq”. (Ef 3:20) Taamaattumik piffissami ilimagin­ngisatsinni qinnutigut akineqarsin­naapput.

7. Sooq qinnutigut allanngor­tittariaqarsin­naavagut? Assersuuteqarit.

⁷ Jehovap suna piumasarineraa paasinerugaangatsigu immaqa qinnutigisagut allanngor­tittariaqarsin­naavagut. Assersuutigalugu qatanngut Martin Pötzinger kateqqam­merluni nazistit tigusanut inissiarsuaataanni parnaarussaavoq. Aallaqqaammut Jehovamut qinugaluarpoq inissiarsuarmit aniguisis­sinnaaneraani nuliani isumaginias­sagamiuk oqaluus­sininilu nanginnias­sagamiuk. Sapaatilli-akunneri marluk qaangiummata paasivaa Jehovap aniguisin­navianngikkaani. Taamaattumik ima qinusalerpoq: “Jehova, qanoq iliussasunga kissaatigigit ersersiguk.” Eqqarsaatigilerpaa qatanngutit allat inissiarsuarmiittut qanoq atugaqarnersut. Taakkua ilarpassuisa nuliatik meeqqatillu isumakuluutigisarpaat. Taava qatanngut Pötzinger ima qinuvoq: “Jehova, qujanaq nutaamik suliassikkamma. Qatanngutikka nakussatsin­niassagakkit qiimmas­sarnias­sagakkillu ikiunnga.” Ukiut qulingiluat tulliuttut inissiarsuarmiitilluni qatanngutini nakussatsittarpai.

8. Qinugaangatta pingaarutilik suna eqqaamasariaqarparput?

⁸ Eqqaamasariaqarparput Jehovap piumasani nammineq piffissarititani naapertorlugu naammas­siumaaraa. Piumasani naapertorlugu ajornar­torsiutit maanna naalliuutinut pissutaasut – soorlu pinngortitami ajunaar­nersuit, nappaatit toqulu – tamarluinnaasa atuukkun­naarsissavai. Jehovap kunngeqarfini aqqutigalugu taamaaliorumaarpoq. (Dan 2:44; Saqq 21:3, 4) Tamannali tikiutserlugu Saatanip naalakkersuisuunera Jehovap akueraa.b (Joh 12:31; Saqq 12:9) Jehovap nunarsuarmi ajornar­torsiutit maanna aaqqittuuppagit Saatanip naalakkersuinera iluatsip­pasissagaluarpoq. Jehovap neriorsuutigisaata naammas­sinissaanut utaqqisariaqaraluarluta imaanngilaq ikiunngik­kaatigut. Ilaatigut qanoq ikiortar­neraatigut sammeriartigu.

JEHOVAP QINNUTIGUT QANOQ AKISARAI

9. Aalajangigas­saqaraangatta Jehovamit qanoq ikiorneqarsin­naavugut? Assersuuteqarit.

⁹ Jehovap ilisimas­susermik tunisarpaatigut. Aalajangiil­luarnias­sagatta Jehovap ilisimas­susermik tuniniarluta neriorsorpaatigut. Ilisimassuseq Jehovameersoq pisariaqar­tittarparput ingammik inuunitta sinneranik sunniuteqar­tussamik aalajangiinialeraangatta, soorlu katissanerluta katissan­nginnerlutaluunniit. (Jaak 1:5) Assersuutigalugu qatanngutip arnap aappaqan­ngitsup Mariamik atillip nuannaarutigisaminik pioneritut kiffartor­tilluni qatanngut angut naapippaa.c Ima oqaluttuarpoq: “Ikinngutigiin­neruleriar­tortilluta immitsinnut misigis­sutsigut sakkortunerulerput. Nalunnginnakku aalajanger­tussaallunga tamanna pillugu qinoqat­taarpunga. Jehovamit siulersor­neqarnissara pisariaqar­tippara, aammali nalunngilara nammineerlunga aalajanger­tussaallunga.” Misigivoq ilisimassuseq pillugu qinugami Jehovamit akineqarluni. Qanoq? Biibililersaarutitsinni misissuigami apeqqutini akissutis­sarsivai. Aamma anaanami aalajaatsup siunnersuutai tusarnaarpai. Siunnersuutit taakku iluaqutigalugit Mariap misigis­sutsini paasiniaq­qissaarpai. Taamaat­tumillu silatusaartumik aalajangerpoq.

10. Filippimiut 4:13 naapertorlugu Jehovap kiffani qanoq ikiortarpai? Assersuuteqarit. (Aamma asseq takuuk).

¹⁰ Jehovap pinertusaar­nissatsinnut nakussatsit­tarpaatigut. Soorlu apustili Paulusi misilin­neqarnerani nakussatsis­simagaa taamatuttaaq uagut misilin­neqarnitsinni nakussatsis­savaatigut. (Filippimiut 4:13 atuaruk). Jehovap qatanngut angut Benjaminimik atilik imaannaan­ngitsumik nalaataqarmat qanoq ikioraa sammilaariartigu. Meeraanini tamangajaat Benjamin ilaquttanilu Afrikami qimaasut najugaqarfianni najugaqarsimapput. Ima oqaluttuarpoq: “Jehovamut qinujuarpunga taassuma kissaataanik iliuuseqar­nissannut nukissaqar­teqqullunga. Jehovap qinnutikka akillugit qamuuna eqqissinermik, oqaluus­siuarnissamut sapiinnissamik Biibililersaarutinillu taassumunnga qanittuar­nissannut iluaqutigisannik tunivaanga.” Aamma ima oqarpoq: “Qatanngutit misigisaat aamma pinertusaar­nissaminnut Jehovamit qanoq ikiorneqartut pillugit atuarnera anersaakkut nukittujuar­nissannut iluaqutigaara.”

11-12. Jehovap uppeqatigut aqqutigalugit qinnutigut qanoq akisarpai? (Aamma asseq takuuk).

¹¹ Jehovap uppeqatigut atortarpai. Toqussi aqaguttoq Jiisusi qamannga pisumik Jehovamut qinuvoq Guutimik mitaatigin­nittutut isigineqaqqunani kimigiiserluni. Jehovalli Jiisusi akillugu ikiorpaa qatanngutaasa inngilit ilaat aqqutigalugu nakussatsillugu. (Luk 22:42, 43) Jehovap aamma uagut ikiorsin­naavaatigut qatanngutigut aqqutigalugit. Assersuutigalugu qatanngutit qiimmas­sarniarluta sianerfigalutalu ornissin­naavaatigut. Tamatta uppeqatitsinnut ‘qiimmas­saalluta oqaaseqar­nissatsinnut’ periarfis­sarsior­tarsinnaavugut. – Uss 12:25.

¹² Qatanngut arnaq Miriamimik atilik uimi toquneranit sapaatit-akunnialuit qaangiuttut kisimiilluni angerlarsimaannarpoq. Aliasungaarlunilu isumatsaqqavoq. Qiajuarpoq oqaloqateqar­nissaminillu pisariaqar­titsilluni. Ima oqaluttuarpoq: “Allanut sianernissara nukissaqarfigin­nginnakku Jehovamut qinuvunga. Suli qiaatigalungalu qinutillunga sianerfigitippunga. Ikinngutigil­luagara utoqqaanertaq sianerpoq.” Utoqqaanertamit taassumalu nulianit Miriam tuppallersar­neqarpoq. Qularutigin­ngilluinnarpaa qatanngut angut taanna sianernissaanut Jehovap killissimagaa.

13. Qinugaangatta Jehovap kikkut aqqutigalugit akisinnaavaatigut? Assersuuteqarit.

¹³ Jehovap imminut kiffartor­tuunngitsut atorsinnaavai. (Uss 21:1) Jehovap ilaannikkut innuttami qinnutaat akisarpai imminut kiffartor­tuunngitsut iliuuseqar­nissaannut killittarlugit. Assersuutigalugu kunngi Artaxerxesi Jehovap killippaa Nehemiap Jerusalemmimut uterluni illoqarfiup qarmaqqin­nissaanik qinnutaa akueritillugu. (Neh 2:3-6) Aamma nalitsinni Jehovap imminut kiffartor­tuunngitsut aqqutigalugit pisariaqar­titsigaangatta ikiorsin­naavaatigut.

14. Soo Hingip misigisaa qanoq qiimmas­saatigaajuk? (Aamma asseq takuuk).

¹⁴ Qatanngut arnaq Soo Hingimik atilik misigivoq Jehovap nakorsaq aqqutigalugu ikioraani. Ernerat eqqarsar­taatsikkut nappaateqartoq ajutoorluni nakkarmat uinilu suliffimminnit soraarlutik ernertik isumassulerpaat. Tamatuma kingunerisaanik aningaasatigut ajornar­torsiulerput. Soo Hing oqarpoq artornar­torsiornini sapililerlugu. Uummammiugisani tamaasa Jehovamut ikioqqulluni annippai. Taava nakorsaq aalajangerpoq taanna ilaqutaalu ikiorniarsariniarlugit. Ikiuinera pissutigalugu pisortanit ikiorneqarput initaarlutillu akilersin­naasaminnik. Kingusin­nerusukkut Soo Hing ima oqarpoq: “Jehovap ikiuinera misigaarput. Taanna ‘qinnutinik tusartartuuvoq’.” – Tuss 65:3.

JEHOVAP AKISSUTAI PAASINIARAANGATSIGIT UPPERSUSEQAR­TARIAQARPUGUT

15. Qatanngutip arnap qinnutini akineqartartut qanoq paasivaa?

¹⁵ Qinnutigut amerlanertigut tupinnar­tuliornikkut akineqarneq ajorput. Qinnutittali akineqarneri Ataatatsinnut qilammiusumut aalajaat­tuarnis­satsinnut iluaqutigisarpagut. Taamaattumik qinnutinnut Jehovap akissutai eqqumaf­figisakkit. Qatanngut arnaq Yokomik atilik misigivoq Jehovap qinnutini akineq ajorai. Taavali qinnutini allattor­talerpai. Piffissap ingerlanerani allattukkani atuaqqik­kamigit paasivaa qinnutini amerlanerit Jehovamit akineqarsimasut allaallu puiorsimasani akisarsimagai. Ilaannik­kooriarluta Jehovap qinnutigut qanoq akisarnerai eqqarsaatigeq­qissaar­tassavarput. – Tuss 66:19, 20.

16. Qinunermut tunngatillugu uppernermik qanoq ersersitsisin­naavugut? (Hebræerit 11:6)

¹⁶ Jehovamut qinusarnikkut qinnutitsinnullu akissutaanik qanorluunniit ikkaluartunik akuersisarnikkut uppernitsinnik ersersitsisarpugut. (Hebræerit 11:6 atuaruk). Assersuutigalugu Mikep nuliatalu Chrissyp Betelimi kiffartor­tunngor­nissartik anguniagaraat. Mike ima oqarpoq: “Ukiorpassuarni qinnuteqar­tarpugut anguniagarpullu pillugu Jehovamut qinusarluta. Qinnuteqaatigulli akineqarneq ajorput.” Mikep aamma Chrissyp upperil­luinnarpaat Jehovap kiffartoriaatsimi sorlermi atorluarsin­naaneraatik nalunngikkaa. Sapinngisartik naapertorlugu iliuuseqar­tuarput pisariaqar­titsiffiusumi pioneritut kiffartorlutik sanaartoqataasarlutillu. Maanna ilagiinnik nakkutil­liisutut angalasartutut kiffartorput. Mike ima oqarpoq: “Jehovap qinnutigut ilimagisatsitut akineq ajorpai. Takorloorsin­naasatsinnillu pitsaanerungaartumik akisarsimavai.”

17-18. Tussiaat 86:6, 7-ilu naapertorlugit suna qularin­ngissin­naavarput?

¹⁷ Tussiaat 86:6, 7 atuakkit. Tussiaasiortup Daavip qularinngilaa qinnutini Jehovamit tusarneqarlutillu akineqartartut. Aamma illit tamanna qularin­ngissinnaavat. Allaaserisami matumani oqaluttuarineqartut ersersippaat Jehovap ilisimas­susermik tunisin­naallutalu pinertusaar­nissatsinnut nakussatsis­sinnaagaatigut. Aamma uppeqatigut allaallu imminut kiffartor­tuunngitsut aqqutigalugit ikiorsin­naavaatigut.

¹⁸ Jehovap qinnutigut ilimagisatsitut tamatigut akineq ajoraluarai nalunngilarput akiumaarai. Pisariaqar­titatsinnik piffissaq eqqorlugu tunissavaatigut. Taamaattumik qinujuarit upperalugu Jehovap maanna isumassoraatit aamma siunissami paratiisissami ‘pinngortitat tamaasa kissaatigisaannik qaarsil­lartikkumaarai’. – Tuss 145:16.