Allakkat naggatissamut aalajaat­tuarnis­satsinnut iluaqutigisin­naasagut

1-2. (a) Paulusip hebræerit allaffigimmagit Judiiami pissutsit qanoq ippat? (b) Sooq oqarsin­naavugut piffissaq eqqoqqis­saarlugu allakkanik tigusaqartut?

KRISTUMIUT hebræeriusut Jerusalemmimi Judiiamilu najugallit Jiisusip toqunerata kingorna artornartunik atugaqalerput. Ilagiit kristumiut pilersin­neqarnerisa kinguninngua sakkortuumik malersugaalerput. (ApS 8:1) Taava ukiut 20-t missaat qaangiummata kristumiut aningaasaqar­niarnikkut ilungersunar­torsiulerput, nunami siusinnerusukkut kaannersuaqarsimanera pissutaagunarluni. (ApS 11:27-30) Ukiup 61-p missaani kristumiut, siunissami malersugaalerumaar­nissaannut naleqqiullugu, piffissaq eqqissisimaffiusoq misigaat. Piffissami tamatumani apustilip Paulusip isumassarsisitaalluni allagaanik, sunaaffami piffissaq eqqoqqis­saarlugu, tigusaqarput.

² Sooq oqarsin­naavugut piffissaq eqqoqqis­saarlugu allagarsisut? Eqqissineqarun­naartus­saammat. Paulusip kristumiut annikil­liortitaangaangajalersut pinertusaarsin­naaqqullugit atoriaan­naasunik siunnersorpai. Jerusalemmip aserugaangajalernera, Jiisusip siulittuutigisimasaa, qanillivoq. (Luk 21:20) Soorunami qaqugorpiaq aserugaanissaa Paulusip kristumiul­luunniit Judiiamiittut naluaat. Taamaattumik kristumiut taakku piffissaq atorluarlugu uppernermik pinertusaar­nermillu ineriar­tortitsillutik piareersarsin­naapput. – Hebr 10:25; 12:1, 2.

3. Sooq Hebræerinut allakkat uagutsinnut soqutiginarpat?

³ Uagut annikil­liornar­tussarsuaq kristumiut hebræeriusut misigisaannit sakkortunerungaartoq misigisus­saavarput. (Mat 24:21; Saqq 16:14, 16) Taamaattumik Jehovap taakkununnga siunnersuutai atoriaannaasut uagut qanoq iluaqutigisin­naanerigut eqqartoriartigu.

‘INERSIMAL­LUARTUN­NGORNISSARPUT TAMAVIAARUTIGISIGU’

4. Juutit kristumiun­ngortut qanoq unamminiagaqarpat? (Aamma asseq takuuk).

⁴ Juutit kristumiun­ngortut allannguerujus­suartariaqarput, tamannalu oqitsuin­naanngilaq. Qangarsuaq juutit Jehovap innuttamisut toqqarnikuuai. Ukiorpassuarni Jerusalemmi pingaaruteqarsimavoq. Kunngi, Jehovap sinniisua, tassanngaanniit naalakkersuisarpoq guutisiorfillu Jehovamut pigititaq aamma tassaniilluni. Juutit aalajaatsut tamarmik Moorsisip inatsisai maleruagassallu juutit siuttuisa ilinniar­titsissutigisaat malittarpaat. Nerisanut, kipineqarnermut juutiun­ngitsunullu pissusilersornermut tunngatillugu maleruagas­saqarput. Jiisusilli toqunerata kingorna Moorsisip inatsisai atuukkun­naarmata guutisiorfimmi uumasunik pilliisarneq pisariaaruppoq. Juutinut kristumiun­ngortunut guutisioriaatsimik allannguinissaq imaannaan­ngitsuuvoq. (Hebr 10:1, 4, 10) Allaat kristumiut inersimal­luartut, soorlu Petrusip, allannguutit ilaat sapernar­tittupilussuuaat. (ApS 10:9-14; Gal 2:11-14) Upperisar­taartik pissutigalugu juutit upperisarsiornikkut siuttuinit malersor­neqalerput.

5. Taamani kristumiut suna mianersorfigisariaqarpaat?

⁵ Kristumiut hebræeriusut marlutsigut unamminiagaqarput. Tassa juutit upperisarsiornikkut siuttuisa tunussisutut isigaat. Aamma Kristusimik malinnin­nerartut ilaat oqarput kristumiut Moorsisip inatsisaasa ilaannik suli maleruaasussaasut, immaqa malersugaanissaq pinngitsoor­tinniarlugu. (Gal 6:12) Kristumiut Jehovamut aalajaan­nissaminnut suna iluaqutigisin­naavaat?

6. Paulusip uppeqatini qanoq ilioqqullugit kajumis­saarpai? (Hebræerit 5:14–6:1)

⁶ Paulusip allakkamini uppeqatini kajumis­saarpai Guutip oqaasia itisilerlugu misissor­taqqullugu. (Hebræerit 5:14–6:1 atuakkit). Hebræerisut Allakkat Illernartut atorlugit Paulusi uppeqatiminut tunngavilersuivoq sooq kristumiut guutisiornerat juutit guutisior­nerannit pitsaanerungaartoq.a Paulusip nalunngilaa Allakkani Illernartuni ilumoortut pillugit ilisimasaqar­nerulerunik paasisimasaqar­nerulerunillu ilinniar­titsissutit eqqunngitsut itigartis­sinnaalissagaat.

7. Unamminiarnartut suut nalaattarpagut?

⁷ Kristumiut hebræeriusut assigalugit Jehovap eqqortuuneragaanut akerliullutik paasissutis­siisartut tunngavilersuuteqar­tartullu nalaattarpagut. Akerlilersuisut Biibilimi najoqqutassianik qutsissunik maleruaanerput assuarisarpaat akaarin­ninngitsuunerarluta naakkit­taatsuunerarlutalu. Inuit isumaat Jehovap isiginnit­taasianut naammal­luinnartumut ungasil­liartuin­navipput. (Uss 17:15) Taamaattumik isummat kukkusut itigartil­luinnar­nissaat pingaaruteqangaarpoq. Akerlilersuisut nikallor­tinniarluta iliuuseqar­taraluartut Jehovamut kiffartor­tuarusuppugut. – Hebr 13:9.

8. Qanoq anersaakkut inersimal­lualeriar­torsinnaavugut?

⁸ Paulusip anersaakkut inersimal­luartun­ngornissaq anguniar­tuaqqullugu hebræerinut siunnersuutaa uaguttaaq maleruarutsigu silatusaassaagut. Tassa Jehovap eqqarsartaasia ilisimanerujar­tuinnarumallugu Biibili itisilerlugu misissor­tassavarput. Imermut morsutsitaareernerup kingorna taamaalior­tuartariaqarpugut. Qanorluunniit sivisutigisumik Jehovamut kiffartor­tuusimagaluarutta tamatta Guutip oqaasia atuaqqis­saartuar­tariaqarparput. (Tuss 1:2) Aalajangersimasumik nammineq Biibilimik misissueq­qissaartarneq ileqqulius­simagutsigu pissuseq Paulusip hebræerinut allakkamini eqqaasaa pingaarutilik, tassa upperneq, ineriar­tortilluas­savarput. – Hebr 11:1, 6.

‘UPPERTUT INUUINNARTULLU ILAGAATIGUT’

9. Sooq kristumiut hebræeriusut uppersuseqarluar­tariaqarpat?

⁹ Kristumiut hebræeriusut Judiiami annikil­liornar­tussamit annassagunik uppersuseqarluar­tariaqarput. (Hebr 10:37-39) Jiisusip malinnitsini mianersoq­qoreersimavai Jerusalemmi sakkutuunit unguneqartoq takugunikku qaqqanut qimaassasut. Kajumis­saarutaa kristumiunut tamanut, illoqarfimmi illoqarfiullu avataani najugalinnut, atuuppoq. (Luk 21:20-24) Taamani inuit sakkutuunit saassun­niarneqaraangamik nalingin­naasumik illoqarfimmut qarmarsualimmut, soorlu Jerusalemmimut, qimaasaraluarput. Taamaattumik sianiitsorpal­lassorinaraluartoq Jiisusi naalallugu qaqqanut qimaassagunik uppersuseqarluar­tariaqarput.

10. Kristumiut uppersuseqarluarnertik sumut kajumis­sissutigissavaat? (Hebræerit 13:17)

¹⁰ Aamma Jiisusip ilagiinnut siulersuisussatut toqqarsimasai kristumiut hebræeriusut tatigisariaqarpaat. Angutit Jiisusip toqqagaasa ilagiin­niittut tamaasa siulersorlugit, qularnan­ngitsumik piffissaq eqqorlugu torersumillu, Jiisusip peqqussutaanik maleruaanis­saannik ikiorpaat. (Hebræerit 13:17 atuaruk). Paulusip uppeqatini kajumis­saarpai ‘siulersortitik naalassagaat’. Tamatumani peqqusinissamut piginnaatitaanerat pissutigiin­narlugu naalanneq pinngilaa. Utoqqaanertalli tatigigamikkit kajumillutik naalassavaat. Tassa kristumiut hebræeriusut annikil­liornartunik atugaqarnertik sioqqullugu siulersuisunik tatigin­ninnertik ineriar­tortissimasariaqarpaat. Piffissami eqqissineqarfiusumi peqqussummut naalakkunik piffissami ajornar­torsiorfiusumi naalannissartik ajornangin­nerutissavaat.

11. Sooq uppersuseqarluar­nissarput taama pingaaruteqartigaa?

¹¹ Uaguttaaq uppersuseqar­tariaqarpugut. Ulluni kingullerni inuulluta upperigatsigu inuppassuit illaruaatigalutalu mitaatigisarpaatigut. (Pet 2. 3:3, 4) Naak annikil­liornar­tussarsuarmut tunngatillugu annikitsualuit Biibilimi eqqaaneqaraluartut paasisagut suli killeqarput. Jehovap piffissaq eqqorlugu akuliuk­kumaarnissaa uagutsinnillu isumassuinissaa upperil­luinnar­tariaqarparput. – Hab 2:3.

12. Annikil­liornar­tussarsuarmi annannis­satsinnut suna iluaqutigis­savarput?

¹² Aamma “inussiaq aalajaallunilu silatooq” aqqutigalugu Jehovap siulersor­taraatigut upperil­luinnar­tariaqarparput. (Mat 24:45) Soorlu Jerusalemmi unguneqarmat kristumiut hebræeriusut qanoq iliornis­saminnik paasitin­neqarsimasinnaasut, uagut annikil­liornar­tussarsuaq aallartippat annassutigisin­naasatsinnik malittarisassanik aalajangersimasunik paasitin­neqarnissarput ilimanarpoq. Maanna Jehovap peqatigiis­sortaani siulersuisunik tatigin­ninneruler­nissarput pingaaruteqarpoq. Taakkua malittarisas­siaannut maanna naalakkuman­ngikkutta annikil­liornar­tussarsuarmi tatiginissaat naalannissaallu sapernar­tinnerus­savarput.

13. Sooq siunnersuut Hebræerit 13:5-imiittoq pingaaruteqarpa?

¹³ Kristumiut hebræeriusut qimaanis­saminnut piareersimajumallutik ‘aningaaserituujunatik’ pilimanian­ngitsumik inooriaaseqar­tariaqarput. (Hebræerit 13:5 atuaruk). Taakkua ilaasa kaanneq piitsuus­suserlu misigisimavaat. (Hebr 10:32-34) Siornatigut nutaarsiassat nuannersut pillugit atugarliorumasarsimagaluarlutik maanna ilaasa pigissaarneq illersuutissatut isigilersimavaat. Jerusalemmili piuneerus­saalerpat aningaasat annassutigisin­naanngilaat. (Jaak 5:3) Pigisalerituujugunik angerlarsimaffitik pigisatillu tamaasa qimallugit qimaanissartik sapernar­tissavaat.

14. Uppersuseqarluarnerput pigisanut tunngatillugu aalajangiinitsinnut qanoq sunniuteqassava?

¹⁴ Jehovap ungasin­ngitsukkut pissutsit ajortut atuukkun­naarsissagai upperil­luinnarutsigu eqqarsas­sanngilagut aningaasaateqarluarneq pigissaarnerlu sunit tamanit pingaar­nerpaajusut. Annikil­liornar­tussarsuarmi aningaasat naleerutissapput. Biibilimi allassimaneratut inuit “sølviutitik aqqusinermut eqqassavaat” paasilis­sagamikku ‘sølviutitik kuultiutitillu annassutigisin­naanagit ullormi Jehovap kamaffissaani’. (Ez 7:19) Aningaasaqarluar­nissarput anguniagarinagu pilimanian­ngitsumik inooriaaseqar­niarutta Jehovamut kiffartor­nitsinni iluaqutigis­savarput. Pisariaqan­ngitsumik akiitsoqarneq nanertuutaavoq pigisaqarpas­suaqaraannilu pigisat isumagisar­nissaat piffissar­tornartarluni. Aamma pigisagut inuunitsinni pingaar­nerpaateq­qunagit mianersuutigis­savarput. (Mat 6:19, 24) Naggatissaq qanilliar­tortillugu Jehovamik tatigin­ninnissarput aningaaserituutullu inuujumanata aalajangiusiman­ninnerput misilin­neqartassapput.

“PINERTUSAAR­TARIAQARPUSI”

15. Sooq kristumiut hebræeriusut pinertusaar­tariaqarpat?

¹⁵ Judiiami pissutsit ajorsiar­tuinnar­tillugit kristumiut hebræeriusut Jehovamut kiffartor­nerminni pinertusaar­tariaqarput. (Hebr 10:36) Taakkua ilaasa malersugaaneq sakkortuumik misigigaluaraat ilarpassuisa misigin­ngilaat. Paulusip eqqaavaa uppernikkut assigiin­ngitsunik misilin­neqaraluarlutik suli ajornerusumik misilin­neqarnissartik piareersimaf­figissagaat, tassa Jiisusitut allaat toqumut aalajaan­nissartik piareersimaf­figissavaat. (Hebr 12:4) Kristumiussuseq siaruariar­tortillugu juutit akerlilersuisut kamangaarlutillu peqqarniis­sigalut­tuinnarput. Ukiualuinnaat qaangiupput Paulusi Jerusalemmimi oqaluus­silluni peqatigiin­niapilunnit saassun­neqarmat. Juutit 40-nit amerlanerusut “isumaqatigiipilupput uppernarsaal­lutillu Paulusi aatsaat toqoreerunikku nerillutillu imerniarlutik”. (ApS 22:22; 23:12-14) Kristumiut uumissor­neqarlutillu malersor­neqassagaluarunik suli ataatsimiit­tassapput, nutaarsiassat nuannersut pillugit oqaluus­sisassapput uppernikkullu nakussatsit­tassallutik.

16. Malersugaanerup eqqortumik isiginnit­taaseqarfiginissaanut Hebræerinut allakkat qanoq iluaqutigisin­naavagut? (Hebræerit 12:7)

¹⁶ Kristumiut hebræeriusut akerlilersor­neqarnerit naammagalugit atornis­saannut suna iluaqutigisin­naavaat? Paulusip nalunngilaa misilin­neqaatinut eqqortumik isiginnit­taaseqar­nissaat pingaaruteqartoq. Nassuiaavoq uppernikkut misilin­neqaatit kristumiup perorsaatigisinnaagai. (Hebræerit 12:7 atuaruk). Perorsaatis­sinneqarnerlu kristumiutut pissuserineqar­tussanik ineriar­tortitsinissamut iluaqutigineqarsinnaavoq. Misilin­neqaatit ajunngitsumik kinguneqarsin­naaneri eqqarsaatigisarunikkit kristumiut tamakkua naammagalugit atornissaat ajornan­nginnerutissavaat. – Hebr 12:11.

17. Pinertusaarneq pillugu Paulusi qanoq ilikkagaqarsimava?

¹⁷ Paulusip kristumiut hebræeriusut kajumis­saarpai misilin­neqarnerminni pinertusaar­nissaminnut sapiissuseqangaaq­qullugit tunniutiin­naqqunagillu. Tamanna pillugu ilisimasaqarluarpoq. Nammineq kristumiun­ngunngik­kallarami kristumiut malersor­tarsimagamigit nalunngilaa qanoq peqqarniitsigisumik pineqartartut. Aamma kristumiun­ngoreerluni akerlilersor­neqarnerit assigiin­ngitsut misigisareeramigit nalunngilaa malersugaanermi qanoq pinertusaar­toqarsinnaasoq. (Kor 2. 11:23-25) Taamaattumik Paulusip pinertusaar­nissamut suna pisariaqarnersoq qularuteqan­ngivilluni eqqartorsinnaavaa. Kristumiut eqqaasippai misilin­neqartillutik imminut pinnatik Jehova tatigissagaat. Paulusi isumalluarluni ima oqarsinnaavoq: “Jehova ikiortigigakku annilaangas­sanngilanga. Inuup qanoq iliorfigisin­naagaminga?” – Hebr 13:6.

18. Tamatta qanoq pineqassaagut, qanorlu piareersarsin­naavugut?

¹⁸ Maannak­korpiaq qatanngutitta ilaat malersugaanerminni pinertusaar­niarsaripput. Uagullu taakkununnga asanninnerput ersersis­sinnaavarput qinnuttar­nerisigut immaqalu pisariaqar­titaannik ikiortarlugit. (Hebr 10:33) Biibilimi ersarissumik allassimavoq ‘Guutimut tunniusimallutik Kristusimillu Jiisusimik ataasioqateqarlutik inuujumasut tamarmik aamma malersor­neqassasut’. (Tim 2. 3:12) Tassa tamatta qanoq pisoqar­nissaanut piareersimasariaqarpugut. Taamaattumik pisarnitsitut Jehova tatigiuartigu misilin­neqarnitsinni tamani pinertusaar­nissatsinnik ikiorumaaraatigut upperalugu. Piffissan­ngorpat kiffami aalajaatsut naalliuutaat peerluin­nassavai. – Tes 2. 1:7, 8.

19. Qanoq annikil­liornar­tussarsuarmut piareersarsin­naavugut? (Aamma asseq takuuk).

¹⁹ Qularnan­ngitsumik kristumiut siulliit Paulusip hebræerinut allagai misilin­neqaatinut nalaakkumaak­kaminnut piareersimanissamut iluaqutigisimassavaat. Paulusip uppeqatini kajumis­saarpai Allakkat Illernartut ilisimal­lualeqqullugit paasiniarluaq­qullugillu. Taamaalior­nermikkut ilinniar­titsissutit eqqunngitsut uppernikkut sanngiil­lissutigisin­naasatik itigartik­kuminar­nerutissavaat. Kajumis­saarpai uppernertik nukittorsar­tuaqqullugu, taamaalior­nermikkut Jiisusip ilagiinnilu siulersuisut maleruaaq­qussutaat nangaanatik maleruarsin­naaqqullugit. Aamma misilin­neqaatit Ataataminnit asannittumit perorsaatis­sinneqar­nissamut periarfissatut isiginerisigut pinertusaarsin­naaqqullugit ikiorpai. Uaguttaaq siunnersuutit taakku maleruartigit! Taamaaliorutta naggatissamut aalajaas­sinnaassaagut. – Hebr 3:14.