Aalajangerit kina kiffartorfigerusun­nerlugu

1. Pillualivis­sagutta sussaagut, aamma sooq? (Esaja 48:17, 18)

ATAATATTA qilammiusup asangaarpaatigut, kissaatigaalu inuunerput maanna qaqugorsuarmullu nuannaarutigis­sagipput. (Oqal 3:12, 13) Pinngor­tippaatigut asseqan­ngitsumik piginnaaneqar­tilluta. Kisianni imminut aquttuaan­narsinnaanis­satsinnut aamma suup eqqortuuneranik suullu eqqunngitsuuneranik naalagaanissamut piginnaaneqar­tinngilaatigut. (Oqal 8:9; Jer 10:23) Nalunngilaami pillualivis­sagutta najoqqutassiai naapertorlugit inuusariaqarlutalu kiffartorfigisariaqaripput. – Esaja 48:17, 18 atuakkit.

2. Saatanip qanoq isumaqar­tinniar­tarpaatigut, Jehovali qanoq iliorpa?

² Saatanip isumaqar­tinniar­tarpaatigut Jehova kiffartorfiginagu pilluarsin­naasugut iluatsit­tumillu imminut aqussin­naasugut. (Mos 1. 3:4, 5) Saatani sallusoq uppernarsar­niarlugu Jehovap inuit nammineerlutik naalakkersuinerat piffissami killilimmi akuerigallarpaa. Inuit naalakkersuinerisa kingunipiloqar­tarnerat ersaril­luinnarpoq. Paarlat­tuanilli angutit arnallu arlallit Jehovamut kiffartor­tuugamik pilluartut Biibilimi oqaluttuarineqarpoq. Pingaarnertut taakkua ilagaat Jiisusi Kristusi. Sammeriartigu sooq Jehova kiffartorfiginiarlugu Jiisusi aalajangertoq. Kingorna sammissavarput Ataatarput qilammiusoq sooq guutisiorfigineqar­tariaqartoq, kiisalu sooq uagut Jehova kiffartorfiginiarlugu aalajangertugut.

JEHOVA KIFFARTORFIGINIARLUGU SOOQ JIISUSI AALAJANGERTOQ

3. Jiisusi sumik neqeroorfigineqarpa, aamma suniarluni aalajangerpa?

³ Jiisusi nunarsuarmiik­kallarami kina kiffartorfiginiarlugu aalajanger­tariaqarpoq. Imermut morsutsin­neqarnerata kinguninngua Saatanip Jiisusi nunarsuarmi naalagaaffinnik tamanik neqeroorfigaa ataasiaan­narluni pallorfigippani. Jiisusilli ima akivaa: “Peerit, Saatani! Allassimavormi: ‘Jehova Guutit guutisiorfigissavat taannalu kisiat kiffartorfigalugu.’” (Mat 4:8-10) Sooq Jiisusi taamatut aalajangerpa? Pissutaasut ilaat sammeriartigit.

4-5. Sooq Jehova kiffartorfiginiarlugu Jiisusi aalajangerpa?

⁴ Jiisusip Jehova kiffartorfiginiarlugu aalajanger­neranut pissutaasoq pingaar­nerpaaq tassaavoq asanninneq – Jiisusip Ataatani asalluinnarpaa. (Joh 14:31) Jiisusi aamma Jehovamut kiffartorpoq taamaaliorneq eqqortulior­nerummat. (Joh 8:28, 29; Saqq 4:11) Nalunngilaa Jehova inuunermut pilerfiusoq, tatiginartuusoq tukkortuullunilu. (Tuss 33:4; 36:10; Jaak 1:17) Jehova Jiisusimut salluneq ajorpoq, aamma pigisai tamarmik Jehovameersuupput. (Joh 1:14) Kisianni Saatani allaalluinnarpoq. Toqumut pisuuvoq. Sallutuujuvoq piumatooq namminis­sarsiortorlu. (Joh 8:44) Jiisusip Jehova Saatanilu ilisarisimal­luarpai, taamaat­tumillu Saatani ilaarlugu Jehovamut pikitsitserusun­ngilluinnarpoq. – Flp 2:5-8.

⁵ Jiisusip Jehova kiffartorfiginiarlugu aalajanger­neranut pissutaasoq alla tassaavoq aalajaalluni kiffartornerup kinguneqarluar­neranik nuannaarutigin­ninnera. (Hebr 12:2) Nalunngilaa aalajaat­tuarnermigut Ataatami atia illernarsisis­sallugu aamma toqumit ajortimillu utertitsis­sutitut akiliut pilersis­sallugu.

SOOQ JEHOVA GUUTISIORFIGINEQAR­TARIAQARTOQ

6-7. Sooq nalitsinni inuppassuit Jehova kiffartorfigiuman­ngilaat, aammali sooq guutisiorfigineqar­tariaqarpa?

⁶ Nalitsinni inuppassuit Jehova kiffartorfigin­ngilaat pissusii nuannersut inuillu pillugit iliuuserisimasai nalugamikkit. Taakkua assigaat Athenimiut Paulusip oqaluus­siffigisai. Taakkua aamma Guuti ilumoortoq naluaat. – ApS 17:19, 20, 30, 34.

⁷ Paulusip nassuiaappai Guutip ‘inuit tamaasa inuunermik, anersaar­tornermik tamanillu tunigai’. Nangipporlu: ‘Taanna pissutigalugu inuullutalu aalallutalu maaniippugut.’ Guuti Pinngor­titsisuummat ‘inummit ataatsimit inuiaqatigiinnik tamanik pilersitsisoq’ taanna kisiat guutisiorfigisariaqarparput. – ApS 17:25, 26, 28.

8. Jehova qanoq iliunngisaan­nassava, aamma uagutsinnik asanningaarnini qanoq ersersippaa?

⁸ Qilammi nunarsuarmilu Kisimi Oqartus­saasuugami Jehovap kiffartorfigeq­qulluni pinngitsaalisin­naagaluarpaatigut. Taamaalior­navianngilarli. Immikkut tamatta asangaarpaatigut. Piviusuuneranut asannin­neranullu uppernarsaaterpas­suarnik tunivaatigut. Kissaatigaa inuit naassaan­ngitsussamut ikinngutigis­sagaanni. (Tim 1. 2:3, 4) Taamaattumik piumasani inuillu pillugit iliuuseriumaakkani allanut oqaluttuarisin­naaqqullugit ilinniar­tittarpaatigut. (Mat 10:11-13; 28:19, 20) Aamma ilagiit uagutsinnik isumassuisunik utoqqaanertallit pilersippai. – ApS 20:28.

9. Jehovap qanoq ersersippaa inuit tamaasa asallugit?

⁹ Jehovap asanninnera asseqan­ngitsoq aamma uppertuun­ngitsunik pinnittar­neranit erserpoq. Eqqarsaatigeriaruk: Ukiuni tuusintini inupparpassuit Guuti soqutiginagu namminneq eqqortuusorisamissut iliorsimapput. Taamaattorli Jehovap taakku inuuinnarsin­naaqqullugit nuannaarsin­naaqqul­lugillu pisariaqar­titaannik tunisarpai. (Mat 5:44, 45; ApS 14:16, 17) Jehovap tunniussai pissutigalugit asannittunik ikinnguteqarlutillu ilaqutaqarsin­naapput, meeraqarsin­naapput, aamma sulinertik inuunertillu nuannaarutigisin­naavaat. (Tuss 127:3; Oqal 2:24) Ersarippoq Jehovap inuit tamaasa asagai. (Mos 2. 34:6) Maanna eqqarsaatigeriartigu sooq uagut Jehova kiffartorfiginiarlugu aalajangersimasugut qanorlu iluaqutigigipput.

JEHOVA KIFFARTORFIGINIARLUGU SOOQ AALAJANGERTUGUT

10. (a) Pingaarnertut sooq Jehova kiffartorfigaarput? (Matiusi 22:37) (b) Illit Jehovap naammagit­tartuunera qanoq misiginikuuiuk? (Tussiaat 103:13, 14)

¹⁰ Jiisusi ilaarlugu Jehova qamannga pisumik asagatsigu kiffartorfigaarput. (Matiusi 22:37 atuaruk). Pissusii pillugit paasisagut Jehovamut qanillis­sutigaagut. Naammagit­tartuunera assersuutigeriartigu. Nehemia 9:30-mi allaatigineqarpoq Jehovap Israalikkut naalanngitsut qanoq pisarai: “Asattuus­simavatit ukiorpassuarni.” Jehovap ajortiliunerput nalunngilaa; eqqaamavaa pujualaasugut. (Tussiaat 103:13, 14 atuakkit). Jehovap naammagit­tartuunera pissusiilu allat eqqarsaatigigaangakkit kiffartorfigiuar­nissaanut kajumit­tarputit, ilaa?

11. Jehovamut kiffartor­nissatsinnut pissutaasut ilaat suuppat?

¹¹ Jehova aamma kiffartorfigiumavarput nalunngin­natsigu tamanna eqqortulior­nerusoq. (Mat 4:10) Aamma nalunngilarput aalajaalluta kiffartornerput qanoq kinguneqassasoq: Jehovap atia illernar­tissavarput, Diaavulup salluliornera uppernarsas­savarput Ataatattalu qilammiusup uummataa nuannaar­tissallugu. Kiisalu Jehova kiffartorfiginiarlugu aalajangerutta naassaan­ngitsussamut kiffartor­tuarnissamik neriuuteqassaagut! – Joh 17:3.

12-13. Janep Pamillu misigisaat qanoq ilinniarfigaarput?

¹² Inuusut­tuaraatilluta Jehovamik qamannga pisumik asanninneq ineriar­tortissin­naavarput – asanninneq ‘ikualaar­tuartussaq’ inersimasun­ngoraluarut­taluunniit ataavartussaq. Qatanngutigiit Jane Pamilua eqqarsaatigikkit. Aqqanilinnik aappaalu qulinik ukioqarlutik Biibilimik ilinnialerput. Angajoq­qaavisa Biibilimik ilinniar­tinneqar­nissartik soqutigin­ngikkaluarlugu Jane Pamilu sapaatip-akunnerata naanerani ilaqutariittut naalagiaqatigiinnermut aatsaat ilaasarpata Nalunaajaasunit Biibilimik ilinniar­tinneqar­tarnissaat akueraat. Jane ima oqarpoq: “Nalunaajaasut Biibilimik ilinniar­timmannga peqatima ikiaroor­nissamut kinguaas­siuutitigullu inuunerlun­nissamut tatisinerannut illersuutigaara.”

¹³ Ukiut arlaqan­ngitsut qaangiummata marluullutik oqaluus­sisartun­ngorput. Kingusin­nerusukkut piffissaq tamaat kiffartor­tunngorput angajoqqaatik utoqqalisut isumagiitigalugit. Misigisatik eqqarsaatigalugit Jane ima oqarpoq: “Ilinniarpara Jehovap ikinngutini aalajaalluni isumagisarai taavalu Timuutiusimut allakkat aappaat 2:19-imi allaqqasoq ‘Jehovap pigisani ilisimagai’.” Qularutis­saanngilaq Jehovap asannitsini taassumunngalu kiffartor­niarlutik aalajangertut isumagisarai!

14. Oqaatsikkut iliuutsikkullu Jehova qanoq illersorsin­naavarput? (Aamma assit takukkit).

¹⁴ Jehova tusaamaneqarneralu illersorusuppagut. Takorlooruk inussiar­nersumik, tukkortumik nallittuisumillu qanimut ikinnguteqarlutit. Taavali tusarpat taanna allamit unneqqaserlun­nerarneqartoq. Illit sussavit? Ikinngutit illersussavat. Tamatumunnga assingusumik Jehova pillugu salluliuutit tusaraangatsigit Jehova pillugu ilumoortut oqaluttuarinerisigut sapinngisatsinnik illersor­tarparput. (Tuss 34:2; Es 43:10) Jehova uummaterput tamakkerlugu kiffartorfigalugu oqaatsikkut iliuutsikkullu ersersik­kusupparput.

15. Apustilip Paulusip allamik anguniagaqarnini qanoq iluaqutigaa? (Filippimiut 3:7, 8)

¹⁵ Jehovap iluarisaatut iliorsin­naanias­sagatta imaluunniit kiffartornermi iliuuseqar­neruler­niassagatta inuunermi kajumilluta allannguisarpugut. Assersuutigalugu apustilip Paulusip Kristusi Jehovalu kiffartorfiginiarlugit juutit ataqqingaagaannik inissisimaf­feqarnini qimappaa. (Gal 1:14) Tamatuma kingunerisaanik kiffartornermi nuannersunik misigisaqarpoq qilammilu Kristusimik naalakkersueqateqar­nissamik neriuuteqarluni. Jehovamut kiffartor­niarluni aalajangernini peqqissimis­sutigin­ngisaannarpaa. Uaguttaaq assingusumik aalajangerutta peqqissimis­sutiginavian­ngilarput. – Filippimiut 3:7, 8 atuakkit.

16. Juliap misigisaa qanoq ilinniarfigaarput? (Aamma assit takukkit).

¹⁶ Jehovamut kiffartornerput inuunermi pingaar­nerpaatik­kutsigu maanna siunissamilu pilluaq­qussavaatigut. Qatanngut arnaq Juliamik atilik qanoq misigisimasoq sammilaartigu. Biibilimi ilumoortoq ilinnialin­ngikkal­laramiuk Julia niviarsiaraallunili oqaluffimmi erinarsoqatigiinnut peqataasarpoq. Inuuniutigalugu operamik erinarsortartup Juliap erinaginnera maluginiarpaa, kingornalu operamik erinarsortarneq inuuniutigiler­niassammagu ilinniar­titarilerlugu. Sivitsun­ngitsoq Julia tusaamasan­ngorpoq tusarnaar­titsisarfinnilu tusarnaar­titsisalerluni. Nipilersornermik ilinniarfimmi tusaamasaal­luartumi ilinniar­tilluni ilinniar­toqataata Guuti pillugu oqaluus­siffigaa nassuiaallugulu Guutip aqqa tassaasoq Jehova. Kinguninngua Julia sapaatip-akunneranut marloriarluni Biibilimik ilinniar­talerpoq. Aalajangerporlu inuunermini operamik erinarsortarneq anguniagariun­naarlugu Jehovamut kiffartor­nissani pingaar­nerpaatin­niarlugu. Aalajangernera imaannaan­ngitsuuvoq. Ima oqarpoq: “Inuit amerlasuut oqarfigaannga pikkoriffiga maangaan­nartikkiga, uangali inuunera piffissaq tamaat Jehovamut kiffartornermut atorusuppara.” Ukiut 30-it sinnerlugit matuma siorna aalajangersimanini pillugu maanna qanoq misigiva? “Pilluarpunga Jehovamut kiffartor­niarlunga toqqarakku, nalunngilaralu siunissami kissaatikka tamaasa piviusun­ngortik­kumaarai.” – Tuss 145:16.

JEHOVA KIFFARTORFIGIUARUK!

17. Naggatissap nalliutingajalernera Guutimut kiffartortut sulilu kiffartor­niarlutik aalajangersiman­ngitsut qanoq sunnerneqaatigaat?

¹⁷ Naggatissaq nalliutingajalerpoq. Apustili Paulusi ima allappoq: “‘Qanittun­nguakkummi’ ‘tikiuttussaq kingusinaarnani tikiutissaaq’.” (Hebr 10:37) Tamanna inunnut qanoq sunniuteqassava? Inuit Jehovamut kiffartor­niarlutik aalajanger­nissaminnut piffissakipput. (Kor 1. 7:29) Guutimullu kiffaasugut misilin­neqassagaluarluta nalunngilarput piffissami sivikitsumi pinertusaar­tariaqarluta.

18. Jehovap Jiisusillu sunissarput kissaatigaat?

¹⁸ Jiisusip ilinniartitani imminik malinnit­tunngoq­qullugit kajumis­saaramigit aamma malittuaq­qulluni kajumis­saarpai. (Mat 16:24) Taamaattumik ukiorpassuarni Jehovamut kiffartor­tuusugut kiffartor­tuarnissarput aalajangiusimatigu. Tunniul­luinnarnikkut neriorsuuterput eqqortik­kumallugu ilungersor­tariaqarpugut. Imaannaan­ngikkaluartoq allaat massakkut pilluarsin­naavugut kiffartor­nermilu nuannersorpas­suarnik misigisaqarsin­naalluta! – Tuss 35:27.

19. Genep misigisaa qanoq ilinniarfigaarput?

¹⁹ Ilaat misigipput Jehovamut kiffartorneq ilungersunarpal­laartoq. Inuusut­tuuguit isumaqarpit Jehovamut kiffartor­niarlutit aalajangeruit nuannaar­tarunnaas­sallutit? Gene, angut inuusuttoq, ima oqarpoq: “Misigivunga Jehovamik Nalunaajaasuugama nuannisarsin­naananga. Peqatikka amerlasuut fiisterneq, peeraqarneq, spillit nakuusernernik imallit sammisarneri nuannaarutigerpasippaat, uangali piffissara ataatsimiinnernut oqaluus­sisarnermullu atortarpara.” Taamatut eqqarsarnini Genep qanoq misigilis­sutigaa? Ima oqarpoq: “Marloqiusamik inooriaaseqalerpunga piffissallu ilaa nuannisaqaanga. Tamannali pilluarnermik piviusumik nassataqanngilaq. Biibilimi ilumoortut ilinniarsimasakka, sumigin­nakkakkali, eqqarsaatigilerpakka aalajangerlungalu Jehova qamannga pisumik kiffartuun­niarlugu. Aalajanger­nermalu kinguneranik Jehovap qinnutikka tusartarpai.”

20. Suna aalajangiusimas­savarput?

²⁰ Jehova erinarsorfigalugu tussiaasiortoq ima allappoq: “Pilluarpoq illit najortigiumallugu qinikkat ineqartitallu silarliutinni.” (Tuss 65:5) Qanortoq Jehova tamatigut kiffartorfiginiarlugu aalajangiusimatigu. Josvap oqaasiinut assingusumik imatut oqarpugut: ‘Uanga inoqutimalu Jehova kiffartorfigiumavarput.’ – Jos 24:15.