Qatanngutaasusi angutit inuusuttut – Makkorsi Timuutiusilu ilaarsigit

1-2. Makkorsip aamma Timuutiusip allat kiffartuullugit iliuuseqar­nerunis­saminnut suut nangaas­sutigisin­naagaluarpaat?

QATANNGUTAASUTIT angut inuusuttoq, Jehovamut kiffartorninni iliuuseqar­nerorusuppit ilagiinnilu ikiuunnerullutit? Qularnanngilaq taamaaliorusuttutit. Angutit inuusuttut ikiuukkumatuut taama amerlatigimmata nuannaajal­lannaqaaq! (Tuss 110:3) Jehovali pillugu iliuuseqar­nerorusunnerit aporfeqarsinnaavoq. Kiffartorninni iliuuseqar­nerunissat qanoq kinguneqarumaarnersoq ilisiman­nginnakku nangaavit? Imminul­luunniit tatigin­nginnavit suliassamik tigusinissannut tunuarsimaarpit? Taamaappat kisimiin­ngilatit.

² Makkorsi Timuutiusilu assingusumik misigisaqar­nikuupput. Allanulli kiffartuus­serusus­suseqaramik iliuusis­saminnut nalorninertik misilit­tagakitsuuner­tilluunniit uniffigin­ngilaat. Paulusip Barnaballu ungasissumut oqaluus­siartorlutik angalanerannut siullermut Makkorsi ilaserineqarami immaqa anaanamini toqqissis­simaffigisamini najugaqarpoq. (ApS 12:12, 13, 25) Makkorsip kiffartor­nermini iliuuseqar­nerorusulluni ilorrisimaarnartoq sungiusimasani qimappaa. Siullermik Antiokiamut nuuppoq. Taava Paulusi Barnabalu ungasin­nerusunut allanut angalaqatigai. (ApS 13:1-5) Aamma ilimanarpoq Timuutiusi angajoq­qaamini suli najugaqartoq Paulusip oqaluus­seqatigiumallugu ilaserimmagu. Timuutiusi inuusuttuuvoq, Paulusilu angalaqatigis­sallugu ajukkus­simasin­naagaluarpoq. (Aamma takukkit Korintimiunut 1. 16:10, 11 aamma Timuutiusimut 1. 4:12). Taamaak­kaluartorli Paulusip qaaqqusinera akueraa, taamaaliorneralu pilluaq­qussutis­sarpassuarnik kinguneqarpoq. – ApS 16:3-5.

3. (a) Qanoq nalunngilarput Paulusip Makkorsi Timuutiusilu nuannarigai? (Timuutiusimut 2. 4:6, 9, 11) (Aamma assit takukkit). (b) Apeqqutit suut allaaserisami matumani sammissavagut?

³ Makkorsi Timuutiusilu suli inuusut­tuutillutik assigiin­ngitsorpas­suarnik ilagiinni akisussaaf­feqalerput. Paulusip inuusuttut taakku nuannaringaarpai. Ungasin­ngitsukkut toqusus­sanngorluni paasigamiuk angutit taakku imminut aggeqquai. (Timuutiusimut 2. 4:6, 9, 11 atuakkit). Qanoruna Makkorsi Timuutiusilu pissuseqarmata Paulusip taama asatigalugillu tatigitigigai? Ullumikkut qatanngutit angutit inuusuttut qanoq taamatut pissuseqalersin­naappat? Aamma Paulusip ataatatut siunnersuutai angutit inuusuttut qanoq iluaqutigisin­naavaat?

MAKKORSI ILAARUK – IKIUUKKUMATUUGIT

4-5. Makkorsip allat kiffartuuk­kusungaarini qanoq ersersippaa?

⁴ Kiffartuussineq ima isumaqarsinnaavoq: Namminermut ilungersunas­sagaluarpal­luunniit allanik ikiuiniarneq. Makkorsi tamatumunnga tunngatillugu maligas­siuilluarpoq. Paulusip oqaluus­siartorluni angalanermi aappaanni ilagiuman­ngimmani Makkorsi ajuallallunilu pakatsisimas­sagunaraluarpoq. (ApS 15:37, 38) Tamannali uppeqatiminik ikiuinis­saminut nikallus­sutiginngilaa.

⁵ Illuni Barnaba ilagalugu Makkorsi nunap immikkoortuani allami suliassin­neqarami akuersivoq. Ukiut 11-t missaat qaangiuttut Paulusi Romami parnaarus­saaqqaarmat annertoq­qusersuisut Makkorsi ilagaat. (Flm 23, 24) Annertoq­qusersuinera Paulusip ima pingaar­titsigisimavaa allaat Makkorsi ‘tuppallersaataangaartutut’ allaaseralugu. – Kol 4:10, 11.

6. Makkorsip qatanngutinik aalajaatsunik suleqateqar­tarsimanera qanoq sunniuteqarsimava? (Quppernerup ataani ilanngussaq takuuk).

⁶ Qatanngutinik aalajaatsunik peqateqar­tarnini Makkorsip nuannersorpas­suarnik misigisaqarfigil­luarpaa. Paulusi Romami ilagereerlugu kingorna apustili Petrusi Babylonnimi suleqatigaa. Imminnut ima qanitsigilersimapput allaat Petrusip Makkorsi ‘ernermisut’ taasimallugu. (Pet 1. 5:13) Petrusip ikinngunni inuusuttoq Makkorsi suleqatiginerani Makkorsip iivangkiiliuanut ilanngus­simasaanik Jiisusip inuunera pillugu sukumiisumik soqutiginar­tunillu oqaluttuut­tarsimassavaa.a

7. Qatanngutip angutip inuusuttup Seung-Woo-mik atillip Makkorsi qanoq ilaarpaa? (Aamma asseq takuuk).

⁷ Makkorsi Jehovamut kiffartor­nermini ulapputeqar­tuaannarpoq qatanngutillu anersaakkut inersimal­luartut attavigiuar­tarlugit. Makkorsi qanoq ilaarsin­naaviuk? Immaqa Jehovamut kiffartorninni iliuuseqar­nerorusuk­kaluarputit, immaqa ilagiinni kiffartortutut imaluunniit utoqqaanertatut, sulili piukkunarsisimanak. Taamaappat nikalloqinak, Jehovali qanoq allatut kiffartorfigisin­naanerlugu ilagiinnilu qanoq ikiuunnerusin­naanerlutit periarfis­sarsiortuarit. Seung-Woo-p, maanna utoqqaanertaasup, misigisimasaa assersuutigeriartigu. Inuusun­nerugallarami qatanngutinut inuusut­toqatiminut imminut naleqqiuttarpoq. Taakkua ilaat imminik siulliullutik ilagiinni utoqqaanertanit suliassin­neqartalersimapput. Seung-Woo ajuallallunilu pakatsisimavoq, qanorlu misiginini pillugu utoqqaanertanut eqqaavaa. Utoqqaanertap siunnersorpaa allanik ikiuisarnini sapinngisaminik ingerlatiin­nassagai, iliuuserisani allanit maluginiar­neqanngik­kaluaraangataluunniit. Siunnersuut tamanna tigulluarlugu Seung-Woo utoqqarnik ataatsimiigiar­nissamullu biiliun­neqarnis­saminnik pisariaqar­titsisunik ikiuisalerpoq. Tamanna kingumut eqqaallugu ima oqarpoq: “Taamaalillunga allanik kiffartuussineq qanoq isumaqarnersoq paasillualerpara, aamma allat ikiortalerakkit nuannaar­nerulerpunga.”

TIMUUTIUSI ILAARUK – ALLANUT SOQUTIGIN­NINNERMIK ERSERSITSISARIT

8. Sooq Paulusip Timuutiusi angalaqatis­samisut toqqarpaa? (Filippimiut 2:19-22)

⁸ Paulusi illoqarfinnut akerlilersuif­fiusimasunut uteruni annertoq­qutissaminik angalaqateqar­nissani pisariaqartippaa. Siullermik Siilarsi, ukiorpassuarni Jehovamut kiffartorsimasoq, angalaqatis­samisut toqqarpaa. (ApS 15:22, 40) Kingusin­nerusukkut Paulusip Timuutiusi angalaqatis­samisut aamma toqqarpaa. Sooq Paulusip Timuutiusi toqqarpaa? Timuutiusi qatanngutinit tusaamaneqarluar­tuummat. (ApS 16:1, 2) Aamma inunnik ‘ilumoorluni isumassuerusut­tuummat’. – Filippimiut 2:19-22 atuakkit.

9. Timuutiusip uppeqatiminik ilumoorluni isumassuisarnini qanoq ersersippaa?

⁹ Timuutiusip Paulusimik kiffartoqateqaler­nerminiilli imminut salliunnani allanik isumassuerusungaar­tarnini ersersit­tuarsimavaa. Taamaattumik Paulusip tamanna toqqissisimas­sutigalugu ilinniartitat nutaat qiimmas­sarnias­sammagit Beruuamut qimassin­naasimavaa. (ApS 17:13, 14) Tassaniitillutik qularnan­ngitsumik Timuutiusip Siilarsi, aamma Beruuamiiginnartoq, ilinniarfigingaarsimassavaa. Kingorna Paulusip Timuutiusi kisimiitillugu kristumiunut Tessaluunikamiittunut qiimmas­saajartor­tillugu aallartippaa. (Tes 1. 3:2) Ukiuni 15-ini tulliuttuni Timuutiusip uppeqatiminut asanninnera ima sakkortutigilersimavoq allaat ‘qiasut qiaqatigalugillu’ naalliuttut misigin­neqatigisarlugit. (Rom 12:15; Tim 2. 1:4) Kristumiut angutit inuusuttut Timuutiusi qanoq ilaarsin­naavaat?

10. Qatanngutip angutip Woo Jae-mik atillip allanik soqutigin­ninneruler­nissani qanoq ilikkarpaa?

¹⁰ Qatanngutip angutip Woo Jae-mik atillip allanik isumassuinerunissani ilikkarpaa. Inuusun­nerulluni qatanngutinik utoqqaanerusunik oqaloqateqar­nissani sapernar­tittorujus­suusimavaa. Naalagaaf­filersaar­tarfimmi takugaangamigit oqaloqatiginagil­luunniit ilassipal­laannartarpai. Utoqqaanertap Woo Jae siunnersorpaa uppeqatimi pissusaa nammineq nuannarisani pillugu oqaluttuullugu oqaloqatigiinneq aallarner­tarsinnaagaa. Aamma kajumis­saarpaa uppeqatimi suut soqutigineraat eqqarsaatigisaq­qullugit. Woo Jaep utoqqaanertap siunnersuutai maleruarpai. Ullumikkut utoqqaanertatut kiffartorpoq. Ima oqarpoq: “Maannakkut inuit qassinil­luunniit ukiullit isumaqarluartumik oqaloqatigisin­naalernikuuakka. Allat atugaat paasisin­naanerulerlugit misigisaq nuanneqaaq. Uppeqatinnik ikiuinissannut tamanna iluaqutigeqaara.”

11. Qatanngutit angutit inuusuttut uppeqatiminnut soqutiginninneq qanoq ineriar­tortissin­naavaat? (Aamma asseq takuuk).

¹¹ Angutit inuusut­tuususi, ilissi aamma taamatut ilagiin­niittunut soqutiginninneq ilinniarsin­naavarsi. Ataatsimiinnerni utoqqaat meeqqallu assigiin­ngitsunik tunuliaqutallit oqaloqatigisakkit. Qanoq innersut aperisakkit tusarnaarlugillu. Taava qanoq ikiortariaqarnersut paasinarsis­sajunnarsivoq. Imaassinnaavoq aappariit utoqqaat app-imik JW Library^®-mik ikiortariaqartut. Imaassinnaavoq paasilerit oqaluus­seqatis­saqanngitsut. Taakku atortoris­saarutaannik elektroniskiusunik ikiorsin­naavigit? Imaluunniit oqaluus­seqatigiumasin­naavigit? Uppeqatinnik ikiuiniar­tarnikkut ilagiin­niittunut tamanut maligas­saalluassaatit.

PAULUSIP ATAATATUT SIUNNERSUUTAI ILUAQUTIGIKKIT

12. Angutit inuusuttut Paulusip Timuutiusimut siunnersuutai qanoq iluaqutigisin­naavaat?

¹² Paulusip Timuutiusi inuunermini kiffartor­nermilu iluatsil­luarnissaanik ikiorniarlugu atoriaan­naasunik ilitsersorpaa. (Tim 1. 1:18; Tim 2. 4:5) Qatanngutaaguit angut inuusuttoq illit aamma Paulusip ataatatut siunnersuutai iluaqutigisin­naavatit. Qanoq? Paulusip Timuutiusimut allagai marluk ilinnut allataasutut atuakkit, inuuninnilu qanoq atorsin­naanerlugit eqqarsaatigalugit. Siunnersuutaasa ilaat sammeriartigit.

13. Jehovap ilumoorfiginissaanut suna iluaqutigisin­naaviuk?

¹³ ‘Guutimut tunniusimanermik ersersitsinissaq sungiusartaruk.’ (Tim 1. 4:7b) Guutimut tunniusimaneq qanoq isumaqarpa? Jehova ilumoorfigalugu taassuma iluarisaa kisiat malinniarlugu aalajangiusimanninneq. Tamannali inunnguuserin­nginnatsigu ineriar­tortinnissaanut sungiusar­tuartariaqarpugut. Qanoq? Grækerisut oqaaseq ‘sungiusarneq’ timersortartut unammersuar­nissamut piareersar­nerannut atorneqakulasarpoq. Timersortartoq imminut piumaffigisariaqarpoq. Uagut aamma Jehovamut qanillisitsisin­naasunik ileqqulius­siniarnitsinni imminut piumaffigisariaqarpugut.

14. Suna siunertaralugu Biibilimik atuartassaagut? Assersuuteqarit.

¹⁴ Ullut tamaasa Biibilimik atuartarnerup ileqquliunnissaa pingaaruteqarpoq. Eqqaamajulli atuarninni Jehovamut qaninnerulernissat anguniagarigakku. Jiisusimik angummillu pisuumik oqaluttuaq assersuutigeriartigu. Qanoq ilikkagaqarfigaajuk? (Mak 10:17-22) Angutip inuusuttup Jiisusi Missiarsiusoq upperaa, malinnis­saanulli uppernikip­pallaarpoq. Taamaattorli Jiisusip asavaa siunnersorlugulu. Jiisusip angummut inuusuttumut inussiar­nerluni oqalunnera killitsis­sutigin­nginnerpiuk? Eqqortumik aalajangiinissaa Jiisusip kissaatigaa. Taamaalilluni Jiisusip ersersippaa Jehova qanoq ittuusoq. (Joh 14:9) Oqaluttuaq taanna illillu atukkatit eqqarsaatigiitigalugit imminut ima aperigit: ‘Jehovamut qanillinerunissannut allanillu kiffartuus­sinerunissannut suna sulissutis­saraara?’

15. Sooq qatanngutip angutip inuusuttup allanut maligas­saalluar­niarnini pingaar­tissavaa? Assersuuteqarit. (Timuutiusimut 1. 4:12, 13)

¹⁵ “Aalajaatsunut maligas­siuisunngorit.” (Timuutiusimut 1. 4:12, 13 atuakkit). Paulusip Timuutiusi siunnersorpaa atuffaris­sinissaq ilinniar­titsillaq­qissinissarlu kisiisa sulissutigiin­narnagit aammali pissuserineqartussat, soorlu asanninneq, upperneq minguitsuunerlu, ineriar­torteqqullugit. Sooq? Inuup iliuusii oqaaserisaanit pingaaruteqar­nerusarmata. Takorlooriaruk qanoq oqaluus­sinerusarsin­naanersugut pillugu oqalugias­sasutit. Aatsaat illit nammineq tamanna tunniusimaf­figilluarukku oqaluussineq pillugu ajornan­nginnerusumik oqalugiarsin­naassaatit. Illit maligas­siuinerit oqaatsinnik kimeqar­nerulersitsissaaq. – Tim 1. 3:13.

16. (a) Kristumiut inuusuttut sutigut tallimatigut maligas­siuilluarsin­naappat? (b) Qatanngutit angutit inuusuttut ‘oqalunnermut tunngatillugu’ qanoq maligas­saalluarsin­naappat?

¹⁶ Timuutiusimut allakkat siulliit 4:12-imi Paulusip eqqaavaa qatanngut angut inuusuttoq qanoq tallimatigut maligas­siuisinnaasoq. Soormi illit nammineq misissueq­qissaarninni taakku immikkut tamaasa sammigukkit? Assersuutigalugu imaassinnaavoq oqaloriaatsinnik maligas­siuilluarusuttutit. Eqqarsaatigiuk allanut kajumis­saataasumik qanoq oqaaseqarsin­naanerlutit. Suli angajoqqaanni najugaqaruit ilinnut iliuuserisartagaat pillugit qujamasunnerit akulikin­nerusumik ersersit­tarsinnaaviuk? Ataatsimiinnerup kingorna sammisaqarsimasoq saqqummiussaani suna nuannarinerlugu oqarfigisin­naaviuk? Aamma ataatsimiinnermi akigaangavit nammineq eqqarsaatinnik oqaaseqarsin­naavutit. Oqalunnikkut sapinngisannik maligas­siuilluar­niarsariguit allat maluginiassavaat anersaakkut siumukartutit. – Tim 1. 4:15.

17. Qatanngutip angutip inuusuttup anersaakkut anguniak­kaminut suut iluaqutigissavai? (Timuutiusimut 2. 2:22)

¹⁷ ‘Inuusuttut pilerigisaat qimarratigis­savatit, angunias­savalli naapertuil­luarneq.’ (Timuutiusimut 2. 2:22 atuaruk). Paulusip Timuutiusi kaammattorpaa anersaakkut anguniagaanut akornutaasinnaasut Jehovamullu attaveqar­neranut navianar­torsior­titsisinnaasut ingalas­simaqqullugit. Aamma sammisat ilaat, immini ajortuun­ngikkaluartut, sammineranni anersaakkut sammisaqarnissaq piffissaqarfigival­laarunnaarsinnaavat. Assersuutigalugu timersornermut, internetikkut sammisamut spiller­nermullu piffissaq qanoq sivisutigisoq atortarnerit eqqarsaatigiuk. Piffissap tamatuma ilaa anersaakkut sammisaqarnermut atorsin­naagaluarpiuk? Immaqa ataatsimiit­tarfiup aserfal­latsaalior­neqarnerani ikiuuttarsin­naavutit, immaqaluunniit atuagaasiviit angallattakkat atorlugit oqaluus­sinissamut pilersaarusiorsin­naavutit. Taamaalioruit anersaakkut anguniagaqar­nissannut sunniuteqarluartunik ikinngutitaar­torsinnaavutit.

KIFFARTUUSSINEQ NUANNAARUTAAVOQ

18. Makkorsip Timuutiusillu allanik ikiuisar­nermikkut suut misigaat?

¹⁸ Makkorsi Timuutiusilu allanut kiffartuus­sinerujumallutik inuunerminni allannguerujus­suarsimapput, tamannalu nuannersorpas­suarnik misigisaqarfigisimavaat. (ApS 20:35) Makkorsi uppeqatiminik ikiuerusulluni nunarsuup immikkoortuanut allanut angalasarpoq. Aamma Jiisusip inuunera oqaluus­sineralu pillugit pissanganartumik allaaserin­nissimavoq. Paulusi ilagiinnik pilersitsiniarnerani uppeqatiminillu qiimmas­saasarneranik Timuutiusip ikiortarsimavaa. Makkorsip Timuutiusillu imminut pilliutigeriaan­naanerat Jehovap maluginiar­tarsimavaa nuannaarutigingaarlugulu.

19. Sooq qatanngutit angutit inuusuttut Paulusip Timuutiusimut siunnersuutai soqutigisariaqarpaat, tamannalu qanoq kinguneqassava?

¹⁹ Paulusip ikinngumminut inuusuttumut allagaani takuneqarsinnaavoq Timuutiusi asangaaraa. Paulusip isumassarsisitaalluni allagaasa atuarnerisigut erserpoq Jehovap ilissi angutit inuusuttut qanoq asatigigaasi. Kissaatigaa inuunissinni ingerlal­luassasusi. Taamaattumik ilagiinni kiffartuus­sinerunissat anguniarlugu Paulusip ataatatut siunnersuutai sapinngisannik maleruakkit. Taamaalioruit maannamiit inuunerit nuannersuussaaq, ‘inuunivillu tigulluar­titaalissavat’. – Tim 1. 6:18, 19.