Inuusuttut aperipput:
Aningaasanoorneq ilumut ajoqutaasinnaava?
ANDREWIP 12-inik ukiulip Julianillu 10-nik ukiullip kiisami angajoqqaatik tarrippaat. Ilaqutariit tamarmik umiarsuarmi ilaasartaammiipput, nukappiaqqallu automatit aningaasanoorfiit amerlasuut alutorsaatigeqaat. Aningaasanoortut ilaata alapernaassusiat malugalugu tamaasa aningaasannguamik tunivai namminneq misilinniassammassuk. Taamaaliornera ajorpa? Aap, angajoqqaavisami pinnguaatinut automatinukarnissaannik inertersimavaat.
Andrewili Julianilu misilissallugu aalajangerput. Angajoqqaamik inerteqqutaat eqqarsaatigigaluarlugu automati misilippaat — pinnappullu! Maanna aningaasanik marloriaammik peqalerput! Taamaattumik misileeqqipput. Tupinnartumik aningaasat nakkaaleqaat! ’Navianaateqaramik?’ eqqarsarput. ’Ajornannginaavillugumi pinnassinnaavugut! Aningaasanoorneq ilumut ajoqutaasinnaagami?’
Inuusuttorpassuit nunani aningaasanoorutinik ulluinnarni atuiffiusuniittut assigalugit, Andrewip Julianillu tamakkua ajoqutaasinnaanerat paasisinnaanngilaat. Aningaasanoornikkullu inersimasut ilaasa maligassiaat eqqarsaatigalugu tamanna paasinarluarpoq. Inersimasorpassuit aningaasanoortaannaanngillat assigiinngitsutiguttaarli ileqqupilutsik illersorniarlugu utoqqatsissutissarsiortarput. Assersuutigalugu oqartarput aningaasanoorneq iluaqutaasinnaasoq, tassami allagartatigut eqquiniutissatigut isertitat ilaat siunertanut ajunngitsunut atorneqartarmata. (Assigiinnarpaa oqaraanni ikiaroornartunik tuniniaasartup ajunngitsuliornerata ikiaroornartunik tuniniaaneq eqqortuliornerulersissagaa!) Allat oqartarput pinnguaatit eqquiniutillu tassaasut nuannaarutit aliikkutaasut ajoqutaanngitsullu, allaat inuunermik pisariaqartumik pissanganarnerulersitsisinnaasut.
Taamaattorli Tuluit nunaanni Irlandimilu, nunanilu allani, inuusuttut tusindilippassuit aningaasanoortalersimapput. Immaqa illittaaq iliuuseqarujussuanngikkaluarlutit aningaasarpassuarnik eqquisinnaaneq kajungeraat.
Aningaasanoorneq — navianartut isertukkat
Inuusuttulli aningaasanoortaleraangamik imminnut navianartorsiortilersarput. Nalunaarutini „aningaasanuunngitsoorsinnaajunnaarnikut“ eqqartorneqarput aammalu oqaatigineqarput „aningaasanoornerup kingunipilui annilaarnartut, ingammik eqquiniarneq ajoqutaanngikkaluartoq tassaalersartoq eqqarsaat anigorneq ajornartoq inummik maskinanngortitsissinnaasoq“. The Buzz (tuluit tv-mik aallakaatitassiaat piviusunik imalik) naapertorlugu meeqqat aningaasanoortarnerat „atuanngitsoornermik, nakuusernermik, piiaaffiginninnermik tillinnermillu, aningaasanoorumatussutsimik atortittarnermillu, allaallu pissutsini ingasattuni imminornermik imminoriaraluarnermilluunniit kinguneqarsinnaavoq“. Aningaasanoornerup taama erloqinartigisunik kinguneqarsinnaanera uppernarsarneqarpoq misigisimasanit piviusunit tulliuttunit.
„11-nik ukioqarlunga eqquiniartalerpunga,“ Adrian oqarpoq. „Akkaga nuliaalu ilagalugit qimminik sukkaniutsitsinernukartalerpunga. Siullermik iluatsillunga eqquigajuttarpunga.“ Tamatumannga Adrian qanoq sunnertippa? „Nangaassuteqarnanga oqaluttualiortarpunga — allaat sallusarlunga — ataatannut aningaasanik tuneqqullunga,“ oqaluttuarpoq, „inuusuttuaraagallaramalu nangaananga ataatama pisiniarfianit tillittarpunga aningaasanoorsinnaajumallunga.“
Adrianip kingunipiluk alla eqqartorpaa oqarluni: „Eqiasuttunngornarpoq, peqqusersuillunimi aningaasarsiassat eqqussangatitanut naleqqiullugit tassaannaalersarmata aningaasamininnguakasiit.“ — Naleqqiukkit Ussatit 13:4; Nalunaajaasup oqaasii 2:24.
Robert (ativiginngisaq) 12-inik ukioqarluni aningaasanoortalerpoq. Ajoqutaasoq alla uparuarpaa: „Upperisapalaaqalersinnaavoq.“ Nassuiaavoq: „Ataatama pisiniarfiani automateqarpoq. Ingerlariaasiinut tunngasut tamaasa nalunngilakka, taamaattorli upperisapalaarsorlunga assigiinngitsunik iliuuseqartarpunga inernissaat sunnissasoralugu, soorlu assersuutigalugu tigummivia aalajangersimasumik nusuttarlugu imaluunniit pinnattaat tigunngikkallartarlugit. Ilaasa allaat automatit oqaluffigisarpaat.“ Aap, eqquiniaasut ilaat nalullugu upperisapalaaqalersarput iluanaarnerup guutia pallorfigalugu — Guutip iluarinngisaa. — Jesaja 65:11, NV.
Aningaasanoorumatussuseq?
Aningaasanoornerup navianaataasa ilaat alla tassa inuup tamatuminnga tiguarneqarsinnaanera. „Ukiut tamaasa meeqqat 16-it inorlugit ukiullit 2000-t sinneqartut angajoqqaaminnit ikioqatigiiffimmut ’Aningaasanoortartut kinaassutsiminik issertuisut’-imut pisinneqartarput, Tuluit-nunaannilu pisinneqartut tassaannaapput taamatut ajornartorsiutillit ilamininngui.“ (The Buzz) Qanoq tiguartitsigisoqarsinnaava? Nalunaarusiat ilaat ima allappoq: „Aallartissimagaanni pinnakkaluaraanni pinnanngikkaluaraanniluunniit uninneq ajornarsissaaq.“
Robertip eqqaamavaa takusimallugu arnaq ullormut pundit 90-it annaasarai, tassa koruunit 1000-t missaat. Inuusuttoq aningaasanik automatinut atugassaminik pissarsiumangaarami allaat anaanani toqoriaraluarsimavaa! Paddyttaaq inuusuttuaraalluni aningaasanoortalersimasup aningaasanoorumassutsi nunusinnaasimanngilaa. „Ilaqutakka tamarmik aningaasanoortartuupput,“ oqarpoq. „Suulluunniit aningaasanoorutigisarsimavakka. Inersimasunngorama katillungalu aningaasat nuliama meeqqamalu pilersornissaannut atortussaagaluit aningaasanoorutigisarpakka, naggataatigullu imminoriaraluarpunga.“
Automatit kajuminnangaarnerat
Aningaasanooriaatsit tamarmik taama kingunipiloqarsinnaapput, ullumikkulli inuusuttunut navianartut annerpaartaasa ilaat tassa automatit. „Maannakkut aningaasanoortartunut inuusuttunut ussernartorsiorfittut annertut isigineqarput,“ atuagassiaq Tuluit-nunaanneersoq Journal of Gamling Behavior 1989-imi upernaami taama allappoq. Automatit tamakku naleqqulluartumik ’tillinniamik illuinnarmik talilimmik’ taaneqartartut tassaapput „maskiinat nakutitseriarsinnaasut kajungernartullu,“ The Buzz-imi oqaatigineqarpoq. „Eqquiniaanerujartortillutit qularnanngitsumik eqquiniaarusussuseqarnerujartuinnassaatit.“
Eqquiniarneq qanorluunniit kajungernartigigaluartoq aperisoqarsinnaavoq taamaaliorneq silatusaarnerunersoq, ingammik eqqarsaatigigaanni automatit ajunaarutissat pinnattassanit amerlanerussussanngorlugit sananeqarsimanerat. Atuagassiami Young People Now-imi pinnannissamut periarfissat ima allaatigineqarput: „Oqaasinnaaq imaappoq: Inuk uppertikkuminartoq naapertuilluartumik iluatsissinnaatissanngilat. Automatit taamaaliorneq ajorput. . . . Automatimut pundit 10-t ikigukkit, agguaqatigiissillugu 7-t tigussavai, 3-llu utertillugit.“
Taamaattumik tupinnanngilaq Mark Griffiths, aningaasanoornerup inuusuttunut sunniuteqartarneranik misissuisoq, ima oqarmat: „Automatimik aningaasarsiutiginnissagaanni tamatuminnga piginnittuusariaqarpoq.“ Illit isumaqarpit sammisassamik iluaqutaanngitsumik tamatuminnga sammisaqartuaannarneq silatusaarnerusoq?
Automatilli tamakku ima nakutitseriarsinnaatigisumik sanaajummata sammisaleraanni unitsinneq sapilernartarput. Sooq? Aap, assersuutigalugu automatini takuneqarsinnaasarput paarnat sanileriit pingasut, aamma tulliiniittut. Young People Now-imi ima nassuiarneqarpoq: „Sanileriit angusat saniatigut maskiinap aamma takutittarpai sanileriit qulaanniittut ataanniittullu, eqqorniaasut isumaqaqqullugit iluatsinnissamut qaneqalutik, taamaattumillu misileeqqikkusuttarput.“ Eqqorniaasut sanileriinni pingasuni assigiit marluk allalu ataaseq uniffigigunikkik misigissapput iluatsitsiliivillutik, iluatsitsiniarlutillu misileeqqissapput — taamatullu ingerlajuassallutik.
Eqquiniartarfiit tamanna immikkut ilisarnaqutigaat. Eqquiniutinik maskiinaliortartut maskiinat sanasarpaat eqquiniartut isumaqartussanngorlugit iluatsitsiliivillutik — ’iluatsinngajaavippunga,’ oqartarput — ajunaaruteqarnini akueriumanagu! Eqquiniaasut aningaasanik ikiseriaannanngortinneqartarput, tassami pinerit tamaasa iluatsitsingajavissorinertik pinnarujussuarnissaminnut neriullualissutigissamassuk. Aammattaaq qulliit ikeqattaartut nipillu kimitsisut eqqarsaatigalugit paasinarpoq usseeriaatsit sunniuteqarluartut suut atorneqartartut inuit eqquiniartuaqqullugit — ajunaaruteqartuaqqullugillu — killeqanngitsumik.
Eqqortumik aalajangerit
Taamaattumik aningaasanuunngitsoorsinnaajunnaarsinnaaneq pinngitsooruk aningaasanuulinngisaannarnikkut. Eqquiniutit tamakku assigiinngitsut tamaasa ingalanniakkit, immaqa aamma ikisassat ikittuinnaagaluarpataluunniit. Inuunertik naallugu eqquiniaasartut amerlasuut aningaasanoorumatussusiat annikitsunnguamit aallartissimavoq. Aningaasanoornissannullu kajumissaarneqaruit najoqqutassiaq Jesusip Matîuse 7:17-imi oqaatigisaa eqqarsaatigisariaqarpat: ’Orpik ajunngitsoq nungullugit ajunngitsunik inerititaqartarpoq, orpilli ajortoq ajortunik inerititaqartarpoq.’
Imminut aperiniarit: Aningaasanoornerup inuit qanoq sunnertarpai? Eqquiniaaneq ikiortigalugu Guutip anersaavata inerititaanik ineriartortitsisinnaappat, soorlu tipaatsunnermik, eqqissinermik imminullu naalakkersorsinnaanermik, imaluunniit saqitsaakkajuttunngorlutillu kamakkajuttunngorlutillu piumatuunngortarpat? (Galâsiamiut 5:19-23, NV) Eqqaamajuk Guutip piumatussuseq iluarinngikkaa. Piumatussutsimik suliaq ataasiinnarluunniit Guutimit iluarisaajunnaassutigisinnaavat. Aningaasanoortartut tassaanerpat kristumiut inuusuttut eqqortunik ikinngutigisaat? (1 Korintumiut 15:33) Puigoqinak ’silarsuaq tamaat ajortup pissaaneqarfigigaa’. (1 Juánase 5:19, NV) Aningaasanoorneq tassaannginnerpa Satan Diaavulup soqutigisaanut tapersiissutaasoq? Taamaattumik sooq aningaasanoorneq tiguartiffigiumassaviuk?
Irlandimi naalagaaffiup eqquiniaasitsisarnera pilersinneqaqqaarmat, erniinnaq sianiitsut akileraarutigisassaannik taagorneqalerpoq! Tamanna aningaasanoornermut taaguutaavoq naleqqulluartoq. Kina aningaasanoortartut silarsuaannut sinnattukkamut iserluni aningaasanik pisariaqartunik piiaaffigineqarluni sianiitsuusorineqarumassava? Qujanartumik Andrewip Julianillu, ilanngutassiap matuma aallaqqaataani eqqartorneqartut, inortuinatik paasivaat aningaasanoorneq taamaallaat sianiitsunuusoq. Maannakkut navianaatai paasilluarpaat eqquiniaatillu tamakku ingalallugit. „Aningaasat eqquiniarnermut atornagit ineriartornarneroqisunik iliuuseqarsinnaavugut,“ oqarput. (gD 8/11 91)
[Qupp. 30-mi assiliartaq]
Naak ikittuinnarnik aningaasanooraluarlutit immaqa taamaatissinnaajunnaassaatit