Aningaasanoorneq

Aningaasanoortarneq ajortuugami?

INUIT ILAASA ISUMAAT

Inuppassuit aningaasanoorneq inatsisinik unioqqutitsinerun­ngikkaangat pinnguaatitut ajoqutaan­ngitsutut isigisarpaat. Aningaasanoornerit taakkua ilaat, soorlu naalagaaffiup aaqqissuussaanik lottomik eqquiniaasitsisarneq, inuiaqatigiit iluaqutis­saannut aningaasanik isertitsiniutaapput.

AKISSUT BIIBILIMEERSOQ

Biibilimi aningaasanoortarneq toqqaan­nartumik eqqaaneqanngilaq. Aningaasanoor­tarnerli pillugu Guutip isumaanik ersersitsisumik arlalinnik najoqqutas­siaqarpoq.

Aningaasanoor­tarnerup siunertaraa inuit allat aningaasaataannik iluanaar­niarneq. Tamannalu Biibilimi ‘piumatunermut sumulluunniit mianersoq­qussummut’ akerliuvoq. (Lukkarsi 12:15) Inuppassuit piumatunermik pissuteqartumik aningaasanoortarput. Aningaasanoor­titsinermik suliaqartartut aningaasarpas­suarnik eqquisinnaaneq pilerisaarutigisarpaat, eqquinngin­nissalli ilimanaateqar­nerunera ersersin­naveersaar­tarpaat. Nalunngilaammi inuit pisuunngor­nissamik takorluugallit aningaasarpassuit, assersuutigalugu kasinomi, atortaraat. Aningaasanoorneq ‘piumatus­sutsimut’ pakkersimaarutaanani aningaasan­nanniapal­lannissamik kissaateqalersitsisarpoq.

Aningaasanoortarneq namminis­sarsior­neruvoq: Tassa aningaasat allat annaasaat iluanaarutigerusut­taramikkit. Biibilimi ima allassimavoq: “Tamassi immikkut iluaqutissarsi pinnagu allap iluaqutissaa salliussiuk.” (Korintimiunut 1. 10:24) Aamma inassutit qulit imaattumik ilaqarput: ‘Pileritsaatis­sanngilatit suugaluar­tulluunniit tullivit pigisai.’ (Mosesimik 2. 20:17) Oqartoqarsinnaavoq aningaasanoortup inuit allat aningaasaataat iluanaarutigerusukkai.

Biibilimi mianersoq­quneqarpugut iluatsitsineq nassuiar­neqarsin­naanngitsumik ikiorneqarnertut isigisaqqunagu. Itsaq Israalimi Guutimut uppernikil­lisimasut ‘iluanaarnerup guutiutitaanut nerrivimmik piareersaapput’. (Esaja 65:11, New World Translation) Iluanaarnerup guutiutitaanik tatiginninneq Guutimut iluarinartuua? Naamik, Guutip ima oqarfigai: ‘Iliorpusi uanga isinni ajortumik piumasarin­ngisakkalu qinerlugit.’ – Esaja 65:12.

Ilumoorpoq nunat ilaanni inerteq­qutaanngitsumik aningaasanoor­titsisartut isertitaasa ilaat inuiaqatigiit iluaqutigisaannut, aningaasanik ineriar­tortitsinermut suliniutinullu allanut atorneqar­tarmata. Taamaak­kaluartorli suli aningaasat pinnguaatinit iluanaar­niutinillu allanit pissarsiarineqartarput. Tamannalu piumatuun­ngortitsisarlunilu namminis­sarsiulersitsisarpoq. Aamma eqqasalersitsisarpoq iliuuseqarpiarani aningaasan­nannissaq ajornan­ngitsuararsuusoq.

‘Pileritsaatis­sanngilatit suugaluar­tulluunniit tullivit pigisai.’ – Mosesimik 2. 20:17.

Aningaasanoortarneq aningaasanoortumut qanoq kingunipiloqarsinnaava?

AKISSUT BIIBILIMEERSOQ

Biibilimi mianersoq­qussuteqarpoq imaattumik: ‘Pisuunngorusuttut ussernartunut, napiarniutinut pilerigisarpas­suarnullu sianiitsorpal­lattunut ajoqutaasunullu nakkaan­nartarput, tamannalu erloqinermik toqumillu kinguneqartarpoq.’ (Timuutiusimut 1. 6:9) Aningaasanoortarneq piumatus­sutsimut attuumas­suteqarluinnarpoq, piumatunerlu ima tiguaasin­naatigaaq allaat Biibilimi pissusilersornernut allanut ilanngullugu sakkortuumik mianersoq­qussutigineqarluni. – Efesossimiut 5:3.

Aningaasanoornermi pisuunngupal­lanniarneq siunertaasarpoq, tamannalu aningaaserituun­ngortitsisarpoq – Biibilimi eqqaaneqartutut tamanna “ajortunut tamanut sorlaavoq”. Aningaasaateqalerusunneq inuunermut ima sunniuteqarsin­naatigaaq allaat ernumanermik, uippakajaarnermik Guutimillu tatigin­nikkunnaarnermik kinguneqar­titsisin­naalluni. Aningaaserituut ima kinguneqar­titsisin­naasumik Biibilimi allaatigineqarput: “Imminnut amerlasuunik naalliuutis­sissimapput”. – Timuutiusimut 1. 6:10.

Piumatussutsip inuit aningaasaqar­nermikkut naammagisimaarun­naarsittarpai pilluarun­naarsit­tarlugillu. “Aningaasanik nuannarisaqartoq naammatsif­feqanngilaq.” – Oqaluus­sisartup oqaasii 5:10, The New English Bible.

Aningaasanoornermik tiguartis­simasut millionillit pinngitsuuisin­naajunnaarsimapput. Tamanna ajornar­torsiutaavoq nalinginnaasoq. Assersuutigalugu misissuinerup ersersippaa USA-mi inuit millionillit aningaasanoornermik pinngitsuuisin­naajunnaarsimasut. Danmarkimi misissueq­qissaartarfik naapertorlugu ullumikkut qallunaat 13-iugaangata ataaseq aningaasanoornermik ajornar­torsiuteqartarpoq.

Imaattumik ussateqarpoq: “Pigisaq pilerival­laarluni pigiligaq naggataatigut pilluaatis­saajunnaartarpoq.” (Ussatit 20:21) Aningaasanoornermik pinngitsuuisin­naajunnaarsimasut akiitsoqalertarput, immaqa allaat akiliisin­naajunnaarlutik. Aamma amerlasuut suliffitsik, aappartik ikinngutitillu annaasimavaat. Biibilimi najoqqutassianik maleruaagutta aningaasanoor­tarnerup kingunipiluinut illersugaasin­naavugut.

‘Pisuunngorusuttut ussernartunut, napiarniutinut pilerigisarpas­suarnullu sianiitsorpal­lattunut ajoqutaasunullu nakkaan­nartarput, tamannalu erloqinermik toqumillu kinguneqartarpoq.’ – Timuutiusimut 1. 6:9.