„Sooq juullisiorneq ajortunga“
OQARTOQARTARPOQ Jehovap nalunaajaasuisa meerartaat juullisiortannginnertik pissutigalugu maqaasisaqartartut. Californiamili, USA-mi, nalunaajaasup aqqanilinnik ukiullip atuarfimmi allaaserinninnera imatut qulequtalik „Sooq juullisiorneq ajortunga“ eqqarsaatigeriaruk:
„Inuppassuarnut juulli assigiinngitsorpassuarnik isumaqarpoq — tunissutit, ilaquttat, tunissutit, nerisassat, tunissutit, aveqatiginninneq, tunissutit, asanninneq, tunissutit, juullip inua, tunissutit suli amerlanerusut. Juulli qanoq isumaqarnersoq imaluunniit sooq nalliuttorsiutigisarnerlugu ullumikkut inuit eqqarsaatigineq ajorpaat. Eqqarsaatigigunikkulu juulli Jesus Kristusip inuuviatut, ilaqutariittut katerisimaarfittut soorunalumilu tunissuterpassuit eqqarsaatigisarpaat. Inuit amerlanersaasa Jehovap nalunaajaasui naakkigisarpaat meerartaat maqaasisaqarsorigamikkik. Kisianni ilumut maqaasigisaqarpat? Misissoriartigu sooq Jehovap nalunaajaasui juullisiorneq ajortut.
Jehovap nalunaajaasuisa ilaattut juullisiortannginninnut pissuterpassuaqarpoq. Juullisiorneq ajorpugut ilaatigut Jesusip inuuviginngimmagu. Biibilimi allassimavoq savanik paarsisut savaatitillu narsaammiittut. Jerusalemimi ukiukkut nillertaqaaq aputeqarajuttarlunilu. Ilimananngilaq savaatinik paarsisut qaammammi tassani silamiinnissaat. . . . Suli eqqarsaatigisassaqarpoq.
Juulli Jesusip inuuvigiinnanngilaa, ukiunili hundredeni siullerni kristumiut nalliuttorsiutigisarsimanngilaat. Itsaq Romami saturnaliasiorneq, decembarip 17-iani aallartittoq decembarillu 25-ani naasoq, ’seqernup ajugaaffigineqanngitsup inuuvianik’ nalliuttorsiortarnermit juulli aallaaveqarpoq. Ukiut hundredellit sisamassaanni Romamiut naalagaaffiat aalajangersimavoq decembarip 25-ani Jesus inuuvissiortinneqartassasoq, immaqa nalliuttorsuaq Biibilimik aallaaveqanngitsoq tamanna iluartuutinniarlugu.
Tupinnanngilaq nunani amerlasuuni juullisiorneq inerteqqutaasimammat. Maligassiuinerat ullumikkut maleruarneqarpoq (soorlu Jehovap nalunaajaasuinit). . . .
Sisamanik ukioqalernissara tikillugu juullisiortarsimavunga. . . . Ujariagisaqartoqaruni, Jehovap nalunaajaasuiniunngilaq. Ukioq naallugu tunisittarpugut. Pinngitsuukkavut tassaaginnarput nalliuttorsuit Biibilimik tunngaveqanngitsut nalliuttorsiutigineqartarnerilu aamma Biibilimik tunngaveqanngitsut.“
Ilinniartitsisoq pappiaqqamut ima allassimavoq: „Inuit tamakkeratik tunisinniaannarlutik pisarput,“ aamma allappoq, „ajunngeqaaq,“ allaaserisarlu „A“-mik nalilerlugu.