Angajoqqaat kisermaat iluatsilluartut

„Angajoqqaat kisermaat tamarmik naammattumik pigisanngisaat tassaavoq piffissaq.“ — The Single Parent’s Survival Guide (Angajoqqaat kisermaat iluatsilluarnissaannut ilitsersuut).

„Aningaasanik amigaateqarneq ajornartorsiutit ilungersunarnersaraat.“ — The London Times.

’Angajoqqaat kisermaat tatineqartutut misiginerannut pissutaanerpaasartoq tassaavoq kiserliorneq.’ — Give Us a Break, angajoqqaat kisermaat sunngiffimmi periarfissaannik misissuinermit.

ANGAJOQQAAT tamarmik unamminiarnartut, nuannersut ajornartorsiutillu misigisarpaat. Angajoqqaalli kisermaat kisimiillutik tamakkua atortarpaat. Tamakkua kingunerisaannik piffissaq, aningaasat kiserliornerlu inuunerannut malunniuteqangaartarput.

Inuunerminni atukkatik piviusut artornaraluartut angajoqqaat kisermaat ilaqutariittut iluatsilluarsinnaapput, amerlasuullumi iluatsilluartarlutik. Najoqqutassat suut malinneqarnersut qanorlu sukumiitigisumik maleruarneqarnersut aalajangiisuusorujussuusarpoq.

Soqutiginarpoq ullumikkut ileqqussatigut pissusiusut inuttullu atugarisatigut allanngornerit qangarsuarli Biibilimi siulittuutigineqarsimammata. Maluginiaruk apustilip kristumiuusup Paulusip ajoqersugaq inuusuttoq Timoteus tamatumunnga qanoq mianersoqqusimagaa: ’Imaattorli ilisimassavat: ullussani kingullerni ajornartunik nalliuttoqassammat, inuit inuujumaarmata imminnik asasut, . . . angajoqqaaminnut naalanngitsut, qujasuitsut, soqqusaatsut, asanniuitsut, saammajuitsut.’ — 2 Timûtiuse 3:1-3.

Biibili tassaaginnanngilaq atuagaq ullumikkut pissutsinik eqqorluartumik siulittuisoq. Najoqqutassanik pitsaasunik imaqarpoq, malinneqarunik ilaqutariittut iluatsinnissamik qulakkeerisinnaasunik. (2 Timûtiuse 3:16, 17) Eqqarsaatigeriaruk tamakkua ilaat angajoqqaat kisermaat piffissamik, aningaasanik kiserliornermillu ajornartorsiutit qaangerniarnissaannut qanoq iluaqutigisinnaagaat.

Piffissamik ’pisisarit’

Qanorluunniit aaqqissuussilluartigigaluaruit piffissaq qaangiutiasuuvoq. Piffissaq atorluarniarlugu sumut pisarnera paasiniartariaqarparput. Taava suliassat suut ilinnut pingaaruteqarnerpaanerat aalajangersinnaanngussavat. Angajoqqaat kisermaat peqatigiiffiata ’piffissamut ullorsiusiornissaq’ siunnersuutigaa. „Tassani ullup imaluunniit sapaatip-akunnerata ingerlanerani sulerinitit tamaasa allattussavatit qanorlu sivisutigisumik atuisimanerit misissorlugu. Taamaalioruit qaqugukkut piffissaqarnerit imaluunniit pitsaanerusumik piffissap qanoq ilineratigut atorluarneqarsinnaanera takusinnaalissavat, pingaarnerutitannut tulleriiaarinivit allanngortinneratigut imaluunniit sammisat aalajangersimasut ilaannik suliaqannginnikkut.“

Siunnersuut peqqinnartoq tamanna apustilip oqaaqqissaarutaanut Biibilimeersumut silatuumut assersuunneqarsinnaavoq: ’Taamaattumik mianersoqqissaaritsi saqilluarniarlusi, ilisimaatsutut pinnasi ilisimatuutulli; ullullu piginnaaffiusut asiutinnaveersigik, ullut ajormata.’ — Evfisumiut 5:16, 17.

Assersuutigalugu, ullut tamaasa piffissarujussuaq TV-mik isiginnaarnermut atortarpiuk? TV-mik isiginnaartarnerit annikillisikkukku meeqqavit oqaloqatiginissaannut sammisaqaqatiginissaannullu piffissaqarnerulissaatit. Tamanna attaveqatigiinnermik pitsaasumik ineriartortitsinissamut iluaqutaasinnaavoq.

’Meeqqannik oqaloqateqarniartarnera nipaallisimanerujussuarmik kinguneqaannartarpoq’, immaqa oqarumassaatit. Taamami pisoqartarsimasinnaavoq, kisianni tamanna annilaangalissutigeqinagu. Angajoqqaanut kisermaanut siunnersortit siunnersuipput misigissutsit meeqqat ulluinnarni ersersittagaat, atuarfimmi ikinngutitik pillugit oqaasii imaluunniit qanoq iliussamaarlutik pilersaarutaat eqqumaffigeqqullugit. Kisianni TV-mut ’tiguartissimaguit’ taamaaliorsinnaanngilatit, ilaa? Aamma allaat isiginnaanngikkaluarlugu ikumaterusaarukku meerartavit eqqarsaataat misigissusiilu itisuut pillugit paasissutissanik pingaarutilinnik pissarsinngitsoorsinnaavutit. Taamaattumik meeqqatit piffissamik atueqatigiumallugit suliassannik aaqqissuussisarit. Illumi suliassat ataatsimoorlusi suliarisarsigik, taamaaliornissinnilu oqaloqatigisakkit kiisalu oqalukkaangata naalaartakkit!

Aamma atuaqatigisakkit. Misissuinerit takutippaat meeqqat tallimanik ukiullit atuarsinnaassusiat kingornalu angusarisartagaat imminnut attuumassuteqarluinnartut. Tamanna atuaqatigiinniarluni piffissaqarnissamut pissutissaavoq suli sakkortunerusoq. Innanngitsiarneranni minutsialunni imaluunniit unnunnerani siusinnerusukkut qasulinnginneranni taamaaliortaruit piffissaq atorluassavat.

Pisariaqarnerinnaat naammagikkit

Angajoqqaat kisermaarpassuit aningaasarsiornerup tungaatigut annernartumik tigusaaqqasutut misigisimasarput. Qanoq iliorlutilluunniit aningaasanik naammattunik naammaginartumik najugaqarnermut, nerisassanut atisassanullu atugassanik pissarsiniartariaqartarput. Suliffeqassagaannili meeqqat paarsisussaqartinnissaat ajornartorsiutaagajuttarpoq.

Meeqqanik paaqqinnittarfinni inissarsinissaq ajornaatsuinnaasanngilaq akikitsuinnaananilu. Angajoqqaat kisermaat ilaat ilaquttaminnit — aataakkunnit, atsakkunnit akkaakkunnillu — ikiorneqarnermikkut iluatsitsilluartarput. Allat meeqqanik paaqqinnittarfiit kiisalu sulisitsisumik meeqqanut paaqqinnittarfiutaat isumalluutigisarpaat. Pisortat tapiissutaat, pineqarsinnaagunik, meeqqanik paaqqinninnermi akigitinneqartunut matussutissiiuaannartanngillat. Taamaattumik nunat ilaanni angajoqqaat kisermaat ilaasa suliffeqannginnissartik qinertarpaat aningaasallu pisortanit tunniunneqartartut inuussutigalugit angerlarsimaannartunngortarlutik.

Angajoqqaat kisermaat isumagineqartussat amerliartuinnarnerat ilutigalugu pisortat akisussaasunik nammakkiinissartik eqqumaffiginerujartorpaat. Tamanna Tuluit Nunaanni ataatat meeqqaminnik najuinngitsut akilersuutinillu akiliisanngitsut sakkortuumik iliuuseqarfigineqartalernerannik kinguneqalereerpoq. Ataatat meeqqanut akilersuutinik akiitsullit allaffeqarfinnit malersorneqartarput akiitsuinik akiliisinniarlugit. Taamaattorli anaanaasut kisermaat ataataasup malersorneqarnissaanut atatillugu allaffeqarfinnik ikiuinissamut itigartitsigaangamik taakkuattaaq aningaasatigut iluanaarutissat ilaannik annaasaqartarput. „Sverigemi naatsorsorneqarsimavoq akilersuiumanngitsut 40 procentii inuinnaat sillimmasiisarfiinit pissarsiarineqartartut Frankrigimilu akilersuiumanngitsut eqqartuussivinnit akiliisussanngortinneqartartut malersorneqartarlutillu,“ Londonimi The Times nalunaarpoq.

Eqqartuussivitsigut imaluunniit pisortatigut ikiorsiissutit tunniunneqarpata tunniunneqanngippataluunniit assigiimmik angajoqqaat kisermaarpassuit aningaasat sungiusimasaminnit ikinnerusut atorlugit imminnut ikiorniartarput. Qanoq iliorlutik? Allaanerusumik aningaasartuutissaminnik missingersuusiornermikkut.

Allaanerusumik aningaasartuutissanik missingersuusiorneq ilikkagassaavoq. Tamanna nalinginnaasumik isumaqarpoq aningaasartuutissat tulleriiaarnerinik allanngortiterisarnermik, assersuutigalugu aningaasanik immikkoortitsisarnikkut, ineqarnermut kiassarnermullu akiligassat siulliullugit, taava nerisassat kiisalu taarsigassarsiat akilersornissaannut. ’Nerisassaqarlutali atisassaqarutta’, apustili Paulus nassuiaavoq, ’tamakku naammagissavavut.’ — 1 Timûtiuse 6:8.

Aningaasartuutaasartut eqqarsaatigalugit allanik aveqateqarnissat eqqarsaatiginikuuiuk? Angajoqqaat allat peqatigalugit nerisassanik illumilu atortussanik amerlanaarlugit pisiniartarneq aningaasanik ileqqaarutaasinnaavoq. Aningaasartuutissanik missingersuusiortarnerit qanoq iluseqaraluarpalluunniit eqqaamassavat aningaasartuutissavit naatsorsornissaat pisariaqarmat. (Naleqqiuguk Lúkarse 14:28.) Soormi aningaasartuutissavit missingersornerini meeqqatit ikiuutsittarukkit? Taava eqqortinnissaanut ikiuunnissartik akisussaaffittut isigissavaat. Allaammi aningaasanik ileqqaagassanik immikkoortitsisinnaanerlutit paasissagaluarpat.

Ikinngutitaarusukkuit inussiarnersuugit

’Tunisigitsi taava ilississaaq tunineqassaasi’, Jesus siunnersuivoq. ’Uuttuutigisassinnik uuttuiffigineqarumaarpusi.’ (Lúkarse 6:38) Inuttut attaveqatigiinnermi tamannattaaq ilumoorpoq. Allanut soqutiginninnerit inussiarnersumik akineqarnermik kinguneqarsinnaavoq. Kiserliornerup ajugaaffiginissaanut periarfissat pitsaanersaraat ikinngutitaarniarluni nammineq iliuuseqarneq. Imaassinnaavoq ikinngutinik tatiginartunik pulaartussaatillutit meeqqannik paarsisinnaasunik nassaartutit. Sulili pitsaanerussannginnerluni ikinngutitit pulaaqqugukkit?

Matumanili mianersornissaq pisariaqarpoq. Eqqaamajuk ’ajortut ikinngutigalugit ileqqut ajunngitsut aserortarmata’. (1 Korintumiut 15:33) Kiserliorneq aatsaat naammagisimaarnartumik ajugaaffigineqarsinnaavoq ikinngutigiinnerit ineriartornartuuppata naammagisimaarnermillu misigititsippata.

Anaanaasutut ataataasutullu pissusilersorneq

Angajoqqaat kisermaat qitornaminnut anaanaallutillu ataataasariaqartarput, tamannalu kikkunnulluunniit oqitsuinnaasanngilaq. Puioqinagu meeqqat inunnguutsiminnik ilaarsisarmata. Inersimasut akisussaassuseqartumik inooriaaseqartut periaasiinik isiginninnermikkut inersimasutut akisussaassuseqarnissaq ilinniartarpaat. Taamaattumik tassunga atatillugu meeqqannut qanoq pissusilersoriaaseqarnerit pingaaruteqarluinnarpoq. Nukappiaqqat ataataminnit najorneqanngitsut Amerikami illoqarfinni najugallit ilarpassui pillugit Londonimi aviisi The Sunday Times ima allappoq: „Nakuusernerup inuttullu paatsiveerusimaarnerup . . . takutippaatigut kinguaariinni angutit tamakkua affaasa missaat angummik inersimasumik maligassaqarnatik peroriartorsimagaangata qanoq pissusilersortarnerannik.“

Meeqqat angajoqqaanit kisermaanit perorsarneqaraangamik peqqissusiat atuarnermillu nakkutiginninnerat allaallu aningaasarsiulernissaannut tunngasut ajortumik sunnerneqarsinnaasarput, Duncan Dormor atuakkami The Relationship Revolution-imi oqarpoq. Misissuisut allat paasisat tamakku akerleriissutigaat. Taakkua piitsuussuseq inuttullu annaasaqarsimaneq pisuutittarpaat. Taamaakkaluartorli allarpassuit inooqatigiinnermik ilisimatuup Charles Murrayip naliliinera isumaqatigaat: „Meeraq anaanaqartoq ataataqanngitsorli anaanaannarnik najugaqarfiusumi najugaqartoq takusani malillugit naliliisarpoq. Inunnik isumaginnittut ilinniartitsisullu aamma palasit angummut inuusuttumut oqaaqqissaaritissinnaavatit inersimasunngoruni meeqqaminut ataataalluassasoq. Kisianni tamanna qanoq isumaqarnersoq nalussavaa takusimanngikkuniuk.“ Aap, nukappiaqqat niviarsiaqqallu tamarmik anaanaqarnissartik ataataqarnissartillu pisariaqartippaat.

Tussiaat 68:6-imi Jehova Guuti ’iliarsuit ataataattut’ oqaatigineqarpoq. Anaanat siunnersorneqarumallutik Guutimut saaffiginnittartut meeqqaminnut maligassamik pitsaanerpaamik nassaartarput. Ataatat kisimiillutik meeqqaminnik perorsaasut arnanit inersimalluartunit akisussaassuseqarluartunillu ikiorneqarneq pingaartittarpaat. Aap, angajoqqaat kisermaat tamarmik asannittumik tapersersorneqarnissartik pisariaqartippaat. Immaqa illit tamatumani ikiuulluarsinnaavutit!

[Qupp. 22-mi ungalusaq]

Ataatat ’anaanaajutigisut’

Angutit angajoqqaatut kisermaajusut ikinnerussuteqarput. Aappariilli avittartut amerliartornerat ilutigalugu angutit amerlanerujartuinnartut kisimiillutik meeqqaminnik perorsaajumasalerput. „Angutit taama nalaataqartut ajornartorsiutiginerpaasartagaasa ilagaat panimmik inuusuttunngortarnerat,“ The Single Parent’s Survival Guide nassuiaavoq. Ittuukulunneq pissutigalugu ataatat ilaasa kinguaassiuutinut tunngasut oqallisiginaveersaartarpaat. Allat ilaquttatik arnat tatiginartut panimminnik oqaloqateqartittarpaat. Angajoqqaat kisermaat tamarmik, angutaagunik arnaagunillu, atuagaq Unge spørger — Svar der duer (Inuusuttut aperipput — akissutit atorluarsinnaasut) meeqqatik ilagalugit atuarunikku iluaqutigissaqaat.a Atuagaq taanna immikkoortortaqarpoq qulequtalinnik ’Ileqqussatigut najoqqutassat ileqqullu allat’ aamma ’Asannilerneq, asanninneq aappariinnerlu’. Kapitalit tamarmik kingornisigut naliliissutaasinnaasunik immikkoortortaqarput taaguuteqartunik ’Apeqqutit oqaloqatigiissutigisassat’, pissutsit inummut tunngalluinnartut allaat itisilerneqarsinnaatillugit ilusilersukkat. (gD 8/10 95)

[Quppernerup ataani ilanngussaq]

[Qupp. 23-mi assiliartaq]

Meeqqatit piffissaqarfigisarukkit attaveqarfigillualissavatit

[Qupp. 23-mi assiliartaq]

Missingersuusioriaatsit qanorluunniit ittuugaluarpat aningaasartuutissatit naatsorsortakkit