Biibili qanoq oqarpa?

Guutip maleruaqqusai maleruaruminaappallaarpat?

„GUUTIP TORMIT ATORLUGIT INUIT UUTTORNEQ AJORPAI.“ — SKOTLANDIMIUT USSATITOQAAT.

SORAARUMMEERNERIT, suliffissarsiornermi oqaloqatigiinnerit nakorsamillu misissortinnerit inuttut uuttorneqartarnitta nalilerneqartarnittaluunniit ilaannaraat. Ulluinnarnili Guutip maleruaqqusaanik maleruaaniaraangatta assingusumik pisoqartarpoq, amerlasuullu tamanna artornartittarpaat. Ilinnut aamma taamaappa? Guutip maleruaqqusai maleruarsinnaavigit?

Guutip pallorfiginnitsiminut suut maleruaqqunerai takoqqaariartigu. Inuunerput qanoq atortariaqaripput Biibilip ersersippaa. (Tussiaat 119:105) Biibilimik allattut ilaat, kunngi Salomon silatooq, inerniliivoq „inuup naammassiniagassaa tamarmi“ tassaasoq ’Guuti [ilumoortoq] mianeralugu inassutaalu maleruarlugit’. (Nalunaajaasup oqaasii 12:13, NV) Pruffiiti Mika allappoq: „Nalunngereerpat suut [Jehovap] ilinnit piumasarigai: Iluartumik iliussasutit, ilumoortumik asannissasutit, makitajuillutillu Guutit peqatigalugu inuussasutit.“ — Mika 6:8.

Jesus Kristus, Guutip nammineq ernera, oqarpoq inatsisinit ukunannga annerusoqanngitsoq: ’Asassavat Jehova Guutit uummatikkut iluunngarlutit tarnikkullu iluunngarlutit isumakkullu iluunngarlutit nukisillu tamakkerlugit,’ aamma: ’Tullit ilittut asassavat.’ (Mákorse 12:30, 31) Tassa Guuti asallugu takutissinnaavarput inassutaasa tamaasa naalannerisigut. — 1 Juánase 5:3.

Paasiuminartumik oqaatigalugu inuit Guuti asassavaat ataqqillugulu, inassutai maleruarlugit, eqqortumik iliorlutik, allanut ajunngitsuliorlutik makitajuitsuullutillu. Tamakku maleruagassiaappat maleruarsinnaasatit?

Guuti ingasaassinianngitsoq

Guutip maleruaqqusaminik maleruaaqqulluta piumaffigaatigut, tamannalu eqqortuuvoq. Inoqarpali maleruaqqusanik tamakkuninnga tamakkiisumik maleruaasinnaasunik? Soorunami naamik, siuaasatsinnimmi Adamimit naammalluinnanngitsuuneq kingornussimavarput. (Rûmamiut 5:12) Tassa kukkoqqajaasuuvugut. Tamannali isumaqanngilaq iluarisaasumik Guuti kiffartorfigisinnaanngikkipput.

Biilernermik ilinniarnerup unamminiarnartuunera assersuutitut eqqarsaatigisinnaavat. Biilerneq ima ilikkartigissagaanni biilernermut misilitsinnermi angusisinnaassalluni, eqiinganeq nalunaaquttallu akunnerpaalui pisariaqarput. Biilernermut allagartartaareeraluarluni soorunami biilillaqqinnerulernissaq sulissutigisariaqarpoq; sungiussiartorneq ilutigalugu biilillaqqinnerulersarpugut. Naammalluinnartumilli biilertartoqanngilaq.

Qujanartumik kukkussutivut pillugit Guuti ingasaassiniartuunngilaq. Ajornartunik piumasaqanngilaq, kukkussutinillu ujarlertuaannarani. Qajannartuusugut sanngiitsuusugullu nalunngilaa. Kunngi David sualuttumik ajortuliorsimasoq, oqarpoq: „Iliorfiginngilaatigut ajortuliatta nalissaannik, iluaatsuliatsinnillu akiniaaviginata.“ Sooq? „Soorlu qilak nunamit qutsinnerungaartoq, taama atsigaaq nallittuinera mianerinnitsiminut.“ Ajortuliortartugut Jehovap nalunngilaa, ajortuliavulli peerumavai „soorlu kangia kitaanit ungasissoq“. — Tussiaat 103:10-14.

Nakkaannaqinak

Angut ilumoorluni Guutimik pallorfiginnittoq, oqarsimavoq: „Nikallungagaangama, isumaqalersinnaasarpunga Guutip maleruaqqusaanik maleruaaniarninni iluatsinngisaannassallunga. Isumalluarneruleraangamali, misigisarpunga Guutip piumasaatut inuusinnaallunga. Oqitsuunngilarli.“ Taamaakkuit nikalloqinak. Taamatut misigisuni siulliunngilatit, aamma kingulliunavianngilatit.

Kristumiu apustili Paulus nassuersimavoq: ’Uannut ajunngitsuliorumagaluartumut inatsisaasoq manna misigisarpara ajortoq qaneqisoq. Guutimmi inatsisai inuutsikkut ilorlikkut nuannarigaluarpakka; kisianni inatsisit allat avatinniittut misigisaraakka eqqarsaatima inatsisaanut akerartortuusut, tigusatullu taakkua kiffartortippaannga ajortip inatsisaanut . . . Uanga inukuluusunga.’ Isumaqanngilarli Guutip maleruaqqusai maleruaruminaappallaartut, imatummi nangippoq: ’Kia timimit matumannga toqup pianit annaatissavaanga? Guuti qujanarsili Jesus Kristusikkut Naalakkatsigut. Tassa maanna uanga nammineq eqqarsaatikkut Guutip inatsisai kiffartuuppakka, uinikkulli ajortip inatsisai.’ (Rûmamiut 7:21-25) Tassa misigivoq Guutimut iluarisaasinnaalluni, naak ajortiliugaluarluni.

Pinngortitsisutta asannittup, Jehovap, ernerata asasaata, Jesusip, pilliutaa utertitsissutaasoq tunngavigalugu kukkunivut isumakkeerfigai. Apustili Johannes allappoq: ’Ajortuliortoqaraluarpallu Ataatami illersuisoqarpugut, Jesus Kristusimik iluartuusumik, taannalu ajortitta matoorneqaatigaat.’ (1 Juánase 2:1, 2) Jesus Kristusip pilliutaata kimittussusiata ajortip assiaqutaanera peerpaa, nungutippaaluunniit. Assiaqutip tamatuma Guutip maleruaqqusaanik maleruaasinnaanitsinnik taassumunngalu ikinngutaasinnaanitsinnik akornuseqqasimavaatigut. Guutimulli ajunngitsumik attaveqarnerput pilerseqqinneqartarpoq Kristusip pilliutaa ilassigaangatsigu.

Asannittumik aaqqissuussinerup tamatuma maniguulluta ilassineratigut isumakkeerfigineqarsinnaavugut, Guutimi „sequmisitaasumi anersaakkullu nikallorsimasumi [maniguuttumi, NV]’ najugaqarpoq. (Jesaja 57:15) Nakussatsissagaatigut tatigisinnaavarput. Neriorsuivoq ’nikanartoq pujualanit makitikkumallugu’. Tamakkiisumik Guuti naalassinnaanngikkaangatsigu nikallungajuaannartariaqanngilagut. Akerlianilli Guuti tatigisinnaavarput najoqqutassiaanik maleruaaniarnitsinni ilungersuutigisavut puiunngisaannassagai. — Tussiaat 113:7; Eprîarit 6:10-12.

Naak Guutimut iluaritinniarluni sorsunnartuugaluartoq, pillualernerulluta misigissavarput. Guutimut tunniusimasuugutta inuuneq atoruminarnerulissaaq, uagutsinnut avatangiisitsinnullu. Aamma siunissaq eqqarsaatigiuk. Guutip maleruaqqusaanik maannakkut maleruaaniartut, nunami paratiisimi naassaanngitsumik inuunissamik neriuutissaqarput. — Jesaja 48:17; Rûmamiut 6:23; 1 Timûtiuse 4:8.

Qaqqasiortartut sungiussisimasut nalunngilaat qaqqap qaavanut qaqigaangamik aqqutissaq aatsaat qiteqqullugu. Isumannaatsumik aternissaq suli amigaatigaat. Taamatulli Guutimik mianerinnittut Guutip maleruaqqusaanik maleruaaniaqqaartariaqarput, taava maleruartualertariaqarpaat. — Lúkarse 21:19; Jâko 1:4.

Guutip maleruaqqusaasa maleruminaappallaannginnerannik ilisimasat tuppallersaatigiuk. Ilaannikkut tamakkiisumik maleruarsinnaanngikkaangakkit isumakkeerfigeqqusarit. Asannittumik tapersersuinera naatsorsuutigisaruk. (Tussiaat 86:5) Jehova erneralu ikiortigalugit, Guutip maleruaqqusai maleruarsinnaavatit taassumanngalu iluarisaallutit. — Ussatit 12:2. (gE 8/10 95)