Qitornarsiartaarneq soqutigaajuk?

ITERITSI!-P TULUIT NUNAANNI ILANNGUTASSIORTUANIT

„QITORNARSIARTAARNEQ meeqqap iluaqutissaa, qitornaqanngitsut qitornartaarnissaat pinnagu, siunertaralugu aaqqissuussineruvoq,“ inunnik isumaginninnermi siunnersorti tuluk oqarpoq. Qitornarsiartaarli oqaasissaqartitaasarpa?

Qitornarsiartaarnissarsi eqqarsaatigaasiuk? Taamaappat misigissuseqarfioqisumik, aammattaarli allanngortinneqarsinnaanngitsumik, aalajangigassaqarpusi. Meerarmitaava ilaquttassinni qanoq sungiussitigissava?

Qitornarsiaaguit kikkut angajoqqaaviginerlugit nalunngiliuk? Taamaanngippat nalungikkaluarukkit allaassuteqarsimassagaluarpa?

Anaanaavit qitornaminik qitornarsianngortitsiniartoq? Qitornarsianngortitsineq aaqqiissutissatuaava qitornannullu pitsaanerpaava?

1995-imi USA-mi meeqqat 50.000-it sinnillit qitornarsiartaarineqarput, taakkualu ilaat 8000-it missaat nunanit allaneersuupput. Amerliartuinnartut nunanit allanit qitornarsiartaartarput. Atuagassiaq Time naapertorlugu ukiuni 25-ni kingullerni USA-mi ilaqutariit meeqqat 140.000-it nunanit allaneersut qitornarsiartaarisimavaat. Europami kisitsisit assingupput, Sverigemi 32.000-it, Hollandimi 18.000-it, Tysklandimi 15.000-it Danmarkimilu 11.000-it.

Pissutsit eqqartorneqartut ilaat atugaraagit? Qitornarsiartaarneq qitornarsianngortitsinerluunniit meeqqap inuunerinnaanuunngitsoq, aammattarli ilinnut, allannguilluinnassaaq. Angajoqqaarsiat tupinnanngitsumik nuannaarutissarpassuarnik ilimasupput, ajornartorsiutilli pakatsisarnerillu aamma piareersimaffigisariaqarpaat. Taamatuttaaq anaanaasup qitornaminik qitornarsianngortitsinermini misigissutsikkut anniaataa immaqa piivinngisaannassaaq.

Pisuni tamani meeqqap inuuneranik asanninnikkut ilusilersuineq unamminiarnartuuvoq. Ilanngutassiani tulliuttuni qitornarsiartaarnermut atatillugu nuannaarutit — aamma unamminiarnartut — iserfigissavavut.