Silarsuaq piumatooqanngitsoq

„SILARSUARMI tamarmi eqqarsartaaseq allanngortilluinnarneqanngippat pitsanngortoqarnavianngilaq, ajunaarnersuarlu silarsuup ornitaa . . . pinngitsoortinneqarsinnaanavianngilaq.“ — Tjekkiap præsidentia Václav Havel.

Inuppassuit paasisimavaat silarsuarmi matumani aaqqissuussaanerup naggatissani qanilliartoraa. Ilaat Václav Havelitut isumaqarput aatsaat nunarsuarmi tamarmi inuit tamarmik eqqarsartaasiat allanngorpat aaqqiisoqarsinnaasoq. Assersuutigalugu, silarsuarmi pissutsinik malinnaasut ilaat ima oqarsimavoq: „Piitsuulluinnartunut hundredemillionilikkuutaanut nerisassanik inuunermilu pisariaqartunik allanik pissarsiniartarneq pitsanngoriartornavianngilaq . . . silarsuarmi naalagaaffiit ullumikkut pissutsit atuuttut allanngortinniarlugit iliuuseqanngippata.“ — Food Poverty & Power.

Inuilli pissusiisigut tunngaviusumik allannguinerinnakkut aniguinissamik tunaartarinnissalluni piviusorsiornerua? Naalakkersuisut ’ullumikkut pissutsit allanngortinniarlugit iliuuseqarnissaat’ tatigilluinnarsinnaavarput? Inuit ilaat taamatut isumaqarlutik ima oqartarput: ’Guutip nammineq aalajangiisinnaassutsimik tunisimavaatigut, uagullu pissutsit allanngortinnissaat nammineq akisussaaffigaarput.’ Oqaluttuarisaanerminili pisimasut avaanngunartut eqqarsaatigissagaanni inuit pisariaqartunik allannguinissamut piumassuseqarnerat piginnaassuseqarnerallu pillugit apeqqutit ilungersornartut pilerput. Tamanna isumalluannginnerunngilaq piviusorsiornerullunili. Pilattaasartormi passutaminik tamanik toqusoorsimasoq inuuninnut akisussaaffilerumassagaluarpiuk?

Paasisimasakinneq pissutaava?

„Paasisimasaqarnerulerneq aaqqiissutissaavoq,“ Ted Trainer atuakkami Developed to Death — Rethinking Third World Development-imi oqarpoq. Oqarportaaq inuit allannguisariaqarnermik tamatuminnga takunnissinnaalersinneqanngippata ’silarsuarmi aaqqissuussaanermik atasinnaasumik angusaqarnissarput neriuutigisinnaanngikkipput’. Silarsuaq ataannassappat inooriaatsip iliuutsillu allanngortittariaqarnerannik inuit ilinniartinnissaata pisariaqassusia qularutissaanngilaq. Iluamik oqaatigalugu tamanna pisariaqarluinnartuuvoq, taamatullu ilinniartitsineq Biibilimi eqqartorneqarpoq. Tassani allassimavoq ’Jehovamik ilisarsinerup nuna tamakkerumaaraa’. Taavagooq nunarsuarmi ’ajortumik iliortoqartarunnaarlunilu ajoqusiisoqartarunnaassaaq’. — Jesaja 11:9.

Ilinniartitsinerulli, allaat Guutip ilinniartitsisitsinerata, immini nunarsuaq inunnit piumatuunit annertuumik aseruisunit aniguisissinnaanngilaa. Ilinniartitsineq taamaallaat inunnik allanngorusuttunik, inunnik Guutip najoqqutassiaanut naapertuuttunngorsarusuttunik, allannguisinnaavoq. Jesus Kristus oqarsimavoq inuit taamaattut nunarsuarmi ikinnerussuteqartut. (Matîuse 7:13, 14) Biibilimi neriorsuut inuiaat tamarmik ullut arlaanni ajornartorsiutit qanoq annertutigissusiannik paasinnilerumaarnissaannik allatullu ingerlalerumaarnissaannik piviusorsiunngitsumik tunngaveqanngilaq. Oqaatigineqarporli nunarsuaq inunnit piumatuunit aniguisinniarlugu Guuti toqqaannartumik iliuuseqassasoq.

Guutip akuliunnera

Guutip akuliunnissaanik eqqarsaat inuppassuit sinnattuinnartut takorluugaannartulluunniit isigaat. Atuakkami World Hunger: Twelve Myths-imi imatut allassimasoqarpoq: „1700-kkunni qaammaasaqaleriartuaalernerup Guutip akuliunnissaanik pissutsinillu inuit atugaannik aaqqiinissaanik eqqarsaammik tuppallernartumik qimatsisippaatigut.“ ’Ilisimasalissuilli’ Guutip akuliunnissaanik upperinnikkunnaarsimasut eqqarsaataat isumaliutersuutaallu tunaartarissanerpavut? Taakkua aaqqiissutissatut saqqummiussaat takorluugaannaannginnerpat?

Biibilimi siulittuutit eqquutinngitsoorneq ajortut Guutip akuliunnissaanik tikkuussisut aniguinissamik neriuutitsinnut tunngavigissallugit silatusaarnerungaarpoq. Guutip neriorsuutaanut upperneq tassaannaanngilaq ’eqqarsaat tuppallernartoq’ — tassaavorli aniguinissamik neriuutitta tunngavissaa piviusorsiortutuaq!

Guutip ’nunamik aseruisut aserussavai’

Guuti qanorpiaq neriorsuigami? Ilaatigut neriorsuutigaa nunarsuaq tamatuminnga mingutsitsisunit avatangiisinillu aserorterisunit aniguisikkumaarlugu. sarĸúmersitat 11:18-imi nalunaarpoq ’nunamik aseruisut aserussallugit piffissamik’ aalajangiisimalluni. Tamanna qanoq kinguneqassava? Piitsunik sanngiitsunillu naqisimannittunik nungutitsinermik kinguneqassaaq. Guutip ’annikilliortitat naapertuilluarnermik pineqartissavai, piitsut annaatissallugit, qunutitsisullu sequmisissallugit’. Piumatuut piiassavai taakkualu atugarliortitaat iluanaartillugit. ’Annaatissavaa piitsoq ikioqqulluni suaartartoq, . . . Akiliullugit iperagaatissavai qunutitaanermit persuaalliorfigineqarnermillu.’ — Tussiaat 72:4, 12-14.

Ila allanngorneq angissaqaaq! Apustilip Peterip oqarneratut allanngorneq tamanna ima annertutigissaaq ’qilassat nutaat nunassarlu nutaaq’ pilersinneqassallutik. (2 Peter 3:13) ’Nunassami nutaami’ tamatumani nunarsuup pissarititaanik kikkut tamarmik naapertuilluartumik agguarneqartassapput. (Mika 4:4) Ullumikkut kikkunnut tamanut naammattorsuarnik nerisassaqaraluarpoq. Naligiinngitsumilli agguaassisarneq ajornartorsiutaavoq. „Nunarsuup naatitsivigineqarsinnaasortai tamakkiisumik atorneqartuuppata nunarsuaq tamakkerlugu inunnut 38-48 milliardinut inuussutissaliortoqarsinnaassagaluarpoq,” taama allappoq Anne Buchanan, atuakkiamini Food Poverty & Power-imi.

Nunarsuaq manna aniguissaaq. Tamatuminngami Pinngortitsisup pinngortippaa „soqanngitsussanngornagu, kisianni inoqartussanngorlugu“. (Jesaja 45:18) Guutip inunnik piumatuunik iliuuseqarfiginninnera ’annikilliornartumik angisuumik’ sivikitsumik nassataqassaaq. (Matîuse 24:21) Annikilliornartumit tamatumannga aniguisut nunarsuarmi paratiisi piumatuujunngilluinnartunik inulik nuannaarlutik inuuffigisinnaassavaat. (Tussiaat 37:10, 11; 104:5) Biibilimi neriorsuutigineqartutut pisoqassaaq: „Guutip [Jehovaasup] isit tamaasa qullingiarumaarpai.“ — Jesaja 25:8.

Illittaaq anigueqataasinnaavutit. Guutip nunarsuaq piumatuuiarniarlugu iliuusiinik iluaqutiginnittut nuannaartut akornanniilersinnaavutit. Guutip piumasaatut iliornissat kissaatigilluinnarukku silarsuarmi piumatooqarfioqisumi matumani aniguiniarnissannut ilinnut ikiuutaasinnaasut tamaasa atorluarniakkit. ’Annikilliornartumi angisuumi’ aniguiniarlutit pisariaqartunik iliuuseqarniarit. Jehovap nalunaajaasui ilisimasariaqakkannik ilinniartinnissannut piareersimapput. Ittoornak naalagaaffilersaartarfiannut saaffiginiakkit, imaluunniit adressit quppernermi 5-imiittut ilaannut qaninnerusannut allaffiginiakkit.