Arnanut nakuusernersuaq
ITERITSI!-P NIGERIAMI ILANNGUTASSIORTUANIT
ATUAGASSIAQ FN-imit suliarineqartoq, Human Development Report 1995, naapertussagaanni arnat inunngornerminnit toqunissartik tikillugu nakuuserfigineqartarput. Misissuinerit nunarsuarmit sumit tamaaneersut matuma kingulianiittut qulaarpaat:
Inunngunnginnermi. Nunat ilaanni naartusut ilaasa naartortik nukappiaraanersoq niviarsiaraanersorluunniit paasiniarlugu misissortittarput. Niviarsiaqqat peerneqarajunnerupput.
Meeraanermi. Barbadosimi, Canadami, Hollandimi, New Zealandimi, Norgemi USA-milu nalunaarutit takutippaat arnat pingasuugaangata ataaseq meeraanermini inersimasuunerminiluunniit kinguaassiuutitigut atornerlunneqartarsimasoq. Asiami nunanilu allani ukiut tamaasa meeqqat millionit ataatsit missaanniittut — ingammik niviarsiaqqat — pinngitsaalillugit atortittartunngortinneqartarput. Nunarsuarmi sumi tamaani niviarsiaqqat millionilikkuutaat kinguaassiuutimikkut innarlerneqartarput.
Inersimasunngornermi. Chilemi, Mexicomi, Papua New Guineami Kunngiitsuuffimmilu Koreami arnat uillit pingasuugaangata marluk angerlarsimaffimminni nakuuserfigineqartarput. Canadami, New Zealandimi, Englandimi USA-milu arnat arfiniliugaangata ataaseq pinngitsaalillugu kinguaassiuutitigut atoqatigineqartarpoq.
Inuunerup ilaani kingusinnerusukkut. Bangladeshimi, Braziliami, Kenyami, Papua New Guineami Thailandimilu arnat inuartarineqartut affaannit amerlanerusut aapparisimasaminnit aapparisaminnilluunniit inuartarineqarsimapput. Afrikami, Afrika-Kujallermi, qeqertani Manerassuarmiittuni arlalinni USA-milu aapparmit nakuuserfigineqartarneq arnat imminortarnerannut amerlanertigut pissutaasarpoq.
Arnanut nakuuserneq ’ullussanik kingullernik’ Biibilimi taaneqartunut ilisarnaataalluarpoq, oqaatigineqarami ulluni tamakkunani inuit ’anneruniartuullutillu’, ’soqqusaatsuullutillu’ ’qiningasuujumaartut’. (2 Timûtiuse 3:1-5) Qujamasuutigisinnaavarput Jehova Guuti neriorsuisimammat ’ullussat kingulliit’ atugarliornartut tamakkua qaangiuppata silarsuarmik nutaamik eqqissineqarfiusumik pilersitsiniarluni, silarsuarmigooq tassani inuusut „eqqissisimallutik nunaminniissapput, annilaarsarneqaratillu“. (Hesekiel 34:28; 2 Pîtruse 3:13) Guutinngooq naalagaaffiata ataani Jesus Kristusip „annaatissai piitsoq ikioqqulluni suaartartoq, annikilliortitarlu ikiortissaaleqisoq. Akiliullugit iperagaatissavai qunutitaanermit persuaalliorfigineqarnermillu, inuunerat erlinnangaarmat taassuma isaani“. — Tussiaat 72:12, 14.