Sorsunnernisulli toqorassutaatigaaq

MARILYN 23-nik ukiulik sanigorlunilu qasoqqaannalerami isumaqarsimagaluarpoq erneqqammernini pissutigalugu taamaalluni. Aammattaaq ilungersunaqisumik quersortarpoq, tamannalu nakorsaminut oqaatigisimavaa. Nakorsaq oqarsimavoq anersaartuutaani silarlerni aseruuttoqarsimasoq, nakorsaatissillugulu. Kingusinnnerusukkut Marilyn unnuakkut kiagussuataartalerami assut ernumalerpoq. Nakorsiaqqippoq, sakissamigullu qinnguartartinnissaa nakorsap isumagaa.

Qinnguartaanermi assilissat misissorneqaramik takutippaat Marilyn piaartumik suliarineqartariaqartoq. Oqarasuaatikkulli Marilyn pissarsiarineqarneq ajulerpoq. „Nakorsaq anaanannut sianersimavoq oqarfigalugulu napparsimasorujussuusunga,“ Marilyn oqaluttuarpoq. „Anaanama pissarsiaraanga oqarfigalungalu tuaviorlunga [nakorsamukassasunga]. Taassuma qinnguartarteqqitsippaanga, unitsinneqarpungalu.“

Marilyn tupattorujussuuvoq paasigamiuk tuberkuloserluni (TB-eerluni). Isumaqaleraluarpoq toqusussanngorluni, tuberkulosiiaatinilli nakorsaatitortitaareerluni iluarsivoq.

Marilynip tuberkuloserluni paasigamiuk uissuumminera paasinarpoq. Qanittumut allaat peqqissaanermik immikkut ilisimasallit ilarpassui isumaqarsimagaluarput TB nunani suliffissuaqarfiusuni ajugaaffigineqareersoq. „Isumaqarlunga TB qangarsuarli nungutitaareersoq,“ katsorsaasarfimmi Londonimiittumi napparsimasunik paarsisoq oqarpoq. „Maanili sulilerama paasivara TB aniguilluarsimasoq illoqarfiullu iluani atugaaqisoq.“

Sumiiffinni atugaajunnaarfigisimasaraluamini TB atugaaqqilersimavoq; aniguiffigisamini siaruaassimavoq. TB ajugaaffigineqaqqajarsimanngilaq sorsunnernisullu kaannersuarnisullu toqoraataatigaluni. Paasissutissat makku eqqarsaatigeriakkit:

◼ Nakorsaatitigut ilisimatuussutsikkut siuariarneqarsimagaluaqisoq ukiuni hundredeni kingullerni inuit 200 millionit missingi TB-mik toqquteqarsimapput.

◼ Inuit 2 milliardit missaanniittut — nunarsuup inuisa aggornerisa pingajui — TB-p bakteeriaanit tunillanneqareersimapput. Kiisalu sekundit tamaasa inuk ataaseq TB-mik tunillatsittarpoq!

◼ 1995-imi inuit 22 millionit missingi TB-mik nappaateqarsimapput. Taakkunannga 3 millionit toqupput — amerlanerit nunani ineriartortinniakkaniittut.

Sooq ullumikkut TB-mut akiuussinnaassuseqarluartunik nakorsaateqaraluartoq nappaat inuiannut naalliuutaajuarsinnarpa? Nappaat qaquguluunniit nungutitaasinnaassava? Nappaammut tamatumunnga imminut illersortoqarsinnaava? Allaaserisani tulliunni apeqqutit tamakku akineqassapput.

[Qupp. 3-mi suminngaanneernera]

New Jerseyp Nakorsaanermik Ilisimatusarfia — Naalagaaffiup Tuberkulosimik Akiuiniarfia