Aanaakkut „nutaat“

„Aanaamut aataamullu tikilluarit! Meeqqat nukatsinneqarasuassapput.“ Taama Gene aamma Janep angerlarsimaffiata isaariaani allagartaqarpoq.

ISERUIT aappariinnik utoqqasaanik issiarusaartunik takunavianngilatit. Kisianni aappariit inuusuppasissut eqeersimaarpasissullu 40-kkunni ukiullit takussavatit. ’Utoqqasaatut’ suliassatik pinngitsoornaveersaarnagit Gene aamma Jane erngutaqalersimanertik nuannaralugu atorpaat. „Ilumut, tamanna tassaavoq utoqqalilersimaninnut ilisarnaatit ilaat“, Gene oqarpoq, „kisianni ernutaqalerneq aamma tassaavoq meeqqanik perorsaasimanermut akissarsiassat ilaat.“

Ussat qanganisaq ima nipeqarpoq: ’Utoqqaat ernguttatik niaqorutigaat’ (Ussatit 17:6) Aanaakkut ernguttallu asanninneq qanilaassuserlu akunnerminni misigigajuttarpaat. Atuagassiaq Generations naapertorlugu „Amerikami aatsaat taama amerlatigisut erngutaqalersimapput“. Suna pissutaava? Atuagassiaq naapertorlugu pissutaapput „inuusarnerup sivisunerulernera ilaqutariillu inuuneranni allanngulerneq“. „Toqusoortarnerup kinguaassiorsinnaassutsillu allanngornerisa kingunerisaannik inersimasut sisamararterutaat pingasut missaat erngutaqalersimassapput . . . Erngutaqalersartut amerlanersaat tassaasarput utoqqasaat 45-t missaanni ukiullit.

Erngutallit nutaat nunat ilaanni saqqumilaalersimapput. Ilarpassuisa ernguttatik isumaginneqataaffigileriartuinnarpaat. Assersuutigalugu Genep aamma Janep ernerat ukuakuallu avissimapput tamarmillu angajoqqaatut oqartussaassuseqarlutik. „Ernitta sulinerani erngutatta nukappiaqqap isumagineratigut ikiuunniartarpugut“, Jane nassuiaavoq. Misissuinertigut paasineqarsimavoq USA-mi erngutallit erngutaminnik paarsisarput sapaatip-akunneranut agguaqatigiissillugu nalunaaquttap-akunnerini 14-ini. Tamatuma sulinerup nalinga ukiumut 29 milliardit dollarit naligaat.

Ullumikkut aanaat aataallu nuannersortat suut misigisarpaat? Unamminiarnartullu suut atortariaqarpaat? Allaaserisani tulliuttuni tamakku sammineqassapput.