Eqquiniaaneq silarsuarmiut tiguartinnarisaat
JOHN, Scotlandimi alliartorsimasoq, neriuuteqartuarsimavoq lottomi eqquinissaminik. „Sapaatip-akunneri tamaasa eqquiniutissannik pisisarpunga,“ oqaluttuarpoq. „Tamanna uannut aningaasartuutaavallaanngilaq, eqquiniutilli pisiama neriuutissittarpaanga kissaatigisannik sunilluunniit pigisaqalernissannik.“
Kazushige Japanimiu hiistinik sukkanniuttunik isiginnaariarumatuujuvoq. „Sukkanniuttarfimmi ikinngutikkalu eqquiniaasarnerput aliikkutarisaqaarput, ilaannilu aningaasarpassuarnik eqquisarpunga,“ Kazushige oqarpoq.
Linda Australiami najugaqartoq oqaluttuarpoq: „Eqquiniutini nuannarinerpaavara bingo. Bingoriartarnera sapaatip-akunneranut 250 kr.-it missaannik aningaasartuutigisarpara, eqquinerulli pissanganartua qatsussinnaanngilara.“
Johnip, Kazushigep Lindallu eqquiniaaneq aliikkutatut ajoqutaanngitsutut isigisimavaat. Nunarsuarmi inuit hundredemillionillit aamma taama isumaqarput. 1999-imi Gallupimit isumasiuinerup takutippaa Amerikamiut pingasuugaangata marluk eqquiniaanermik nuannarisaqartut. 1998-imi Amerikamiut eqquiniaanernut inerteqqutaanngitsunut dollarit 50 milliardit missiliortut atorsimavaat – tassa filmeriarnernut, nipilersukkanik tusarnaagassanik pisinernut, timersuutinik unammisunik isiginnaariarnernut, aliikkusiartarfissuarnukarnernut kiisalu videospilinut aningaasartuutit katikkaanni taakkunannga amerlanerit.
Qanittukkut misissuinerit naapertorlugit ukiup ataatsip ingerlanerani Australiami najugaqartut 80 procentii minnerpaamik ataasiarlutik eqquiniaasimapput 40 procentiilu sapaatip-akunneri tamaasa eqquiniaasarsimallutik. Australiamiut inersimasut eqquiniaanernut ukiumut agguaqatigiissillugu 3000 kr.-init amerlanerusunik aningaasartuuteqartarput, tassa Europamiut Amerikamiullu tamatumunnga aningaasartuutigisartagaasa marloriaataasa missaannik. Taamaalillutik Australiamiut silarsuarmi eqquiniaajumatunersaapput.
Japanimiorpassuit eqquiniutinut pachinko-nut ukiut tamaasa milliardilinnik aningaasartuuteqartarput. Brasiliami ukiumut minnerpaamik koruunit 34 milliardit eqquiniutigineqartarput, amerlanerpaat lottomut allagartanullu eqquiniutinut assigisaanut atorneqartarlutik. Brasiliamiuinnaanngillalli lottomik nuannarisaqartut. Atuagassiami Public Gaming International-imi allassimavoq kisitsisit qanittukkut pissarsiat naapertussagaanni „nunani 102-ni lottomik assigisaanillu eqquiniaasitsinerit assigiinngitsut 306“-iusut. Tassami eqquiniaaneq nunarsuarmiut tiguartinnarivippaat – aammamigooq iluaqutissersueqimmat.
Sharon Sharp, eqquiniaasarneq pillugu misissuiffimmi Public Gaming Research Institute-mi atorfilik, oqarpoq USA-mi 1964-imiit 1999-imut eqquiniaasitsisarnertigut sinneqartoorutit „naalagaaffiup isertitaani dollarsit 125 milliardit missaanniissimasut (1 billion kr.-it sinnerlugit), aammalu aningaasat taakkua amerlanersaat 1993-imiit naalagaaffiup karsianut nakkartinneqarsimasut“. Aningaasat tamakkua ilarpassui aalajangersimasumik atugassiissutigineqartarput paasisitsiniaanernut, nunanut eqqissisimatitanut aammalu timersortarfiit ineriartortinneqarnerinut. Aammattaaq inuppassuit eqquiniaasitsisarfinni sulisorineqarput – Australiamiinnaq inuit 100.000-it missaat suliffeqarfinni eqquiniaasitsisarnernut attuumassuteqartuni 7000-init amerlanerusuni sulisorineqarlutik.
Inatsisitigut akuerisaasumik eqquiniaasitsisarnermut tapersersuisut oqarput eqquiniaaneq aliikkutassiaannaanngitsoq – tassa suliffissanik pilersitsisarami, akileraarutitigut isertitaqaataasarluni aammalu nunap immikkoortuisa aningaasarsiornikkut ingerlalluanngitsut siuarsarnissaannut aningaasassaqalersitsisarluni.
Taamaattumik inuppassuit aperisarput: ‘Eqquiniaaneq ajorami?’ Tamatumunnga akissutissaq allaaserisami tulliuttumi sammineqassaaq immaqalu illit eqquiniaanermut isummannik allanngortitsisinnaalluni.
[Qupp. 3-mi assiliartaq]
John
[Qupp. 3-mi assiliartaq]
Kazushige
[Qupp. 3-mi assiliartaq]
Linda