Ernerit ajunngitsoq ajortorlu

KAIN Abelilu takoriakkit. Inersimasunngorsimapput. Kain nunalerisuuvoq. Karrinik, paarnanik naatitanillu naatitsisarpoq.

Abel savanik paarsisuuvoq. Savaaqqanik paarsineq nuannaraa. Taakku allipput, taavalu Abel savarpassuarnik paarisassaqalerpoq.

Ullut ilaanni Kain Abelilu Guutimut tunissuteqarput. Kain nerisassanik naatitaminik pilliuteqarpoq. Abelilli savaatimi pitsaanersaat pilliutigaa. Jehovap Abel tunissutaalu iluarai. Kainili tunissutaalu iluarinngilai. Suna pissutaasoq nalunngiliuk?

Pissutigiinnanngilaa Abelip tunissutaa Kainip tunissutaanit pitsaanerummat. Pissutigaali Abel ajunngitsuummat. Taassuma Jehova angajunilu asavai. Kainili ajorpoq; nukkani asanngilaa.

Taamaattumik Guutip Kain oqarfigaa iluarsiniassasoq. Kainili naalanngilaq. Kamattorujussuuvoq Guutip Abel iluarinerummagu. Taava Kainip Abel oqarfigaa: ’Narsamukaqatiginnga.’ Tassani, kisimiillutik, Kainip nukkani Abel unatarpaa toqullugulu. Kaini taamaaliorami peqqarniik, ilaa?

Naak Abel toqugaluartoq Guutip eqqaamavaa. Abel ajunngitsuuvoq, Jehovallu inuk taamaattoq puiunngisaannassavaa. Jehova Guutip Abel makitikkumaarpaa. Taava Abel toqoqqissanngilaq. Nunami maani naassaanngitsumik inuusinnaassaaq. Inuit Abelitut ittut ilisarisimalissallugit nuannerunaq, ilaa?

Guutip inuit Kainitut ittut nuannarinngilai. Taava nukkani toqoreermagu Guutip pillarpaa ilaqutaanit ungasissumut aallartillugu. Qatanngutimi arnat ilaat aallaqatigaa, nuliartaaralugulu.

Kain nulialu qitornaqalerput. Adamikkut Evallu erneri paniilu allat aappanipput qitornaqalerlutillu. Inuit nunami amerliartorput. Ilaat ilisariniariartigik.